သန့်ဇင် (NSS) - မတ် ၂၆

ရန်ကုန်တိုင်းဒေသကြီး၊ မရမ်းကုန်းမြို့နယ်ရှိ ဆိပ်ကမ်းတစ်ခုတွင် ကုန်တင်သင်္ဘောတစ်စီးပေါ်မှ AA လက်နက်ကိုင်အဖွဲ့က သယ်ဆောင်ခိုင်းသော ငွေကျပ် ၁ ဘီလျံတန်ဖိုးရှိ  WY ဆေးပြားများ ဖမ်းဆီးရမိခဲ့ကြောင်း နစက၏သတင်းထုတ်ပြန်ချက်အရ သိရသည်။

စစ်တွေမြို့တွင်နေထိုင်သည့် AA လက်နက်ကိုင်အဖွဲ့၏ ထောက်ပို့ရေးတာဝန်ခံ သန့်ဇင်ဦးသည် ဘူးသီးတောင်မြို့တွင်နေထိုင်သည့် ထောက်ပို့ရေးတာဝန်ခံ မေယုထွန်းနှင့် ချိတ်ဆက် ၍ မူးယစ်ဆေးဝါးများကို ရန်ကုန်မြို့မှ စစ်တွေမြို့ နှင့် ဘူးသီးတောင်မြို့များသို့ ပို့ဆောင်နေခဲ့ကြောင်း လုံခြုံရေးတပ်ဖွဲ့ဝင်များက သတင်းရရှိခဲ့ကြောင်း သိရသည်။ 

အဆိုပါ သတင်းအရ မတ်လ ၂၁ရက်၊ ညနေပိုင်းအချိန်တွင် လုံခြုံရေးတပ်ဖွဲ့ဝင်များသည် မူးယစ်ဆေးဝါးများ သယ်ဆောင်ပေးသည့် ထွန်းသိန်းအောင်နှင့် ၎င်း၏ဇနီးဖြစ်သူ စုမြတ်ဝေတို့ (၂)ဦးကို တာမွေမြို့နယ်၊ စက်မှု(၅)လမ်း၊ အိမ်အမှတ်(၃၀၁)၌ စတင်ဖမ်းဆီးရမိခဲ့ကြောင်း သိရသည်။

ထို့နောက် ဖမ်းဆီးရမိခဲ့သည့် လင်မယား(၂)ဦး၏ ထွက်ဆိုချက်များအရ လုံခြုံရေးတပ်ဖွဲ့ဝင်များက အဆိုပါနေ့ ညပိုင်းချိန်တွင် မရမ်းကုန်းမြို့နယ်၊ ဘုရင့်နောင်ဆိပ်ကမ်းရှိ အမှတ်(၂) တံတား၌ ဆိုက်ကပ်ထားသော ရန်ကုန်-စစ်တွေပြေးဆွဲနေသည့် “အမ်ဗွီ-စိန်ပြည့်မင်း” ကုန်တင်သင်္ဘောကို  ဝင်ရောက်ရှာဖွေခဲ့ရာ ကတ်ထူဖာအတွင်းမှ ငွေကျပ် ၁ ဘီလျံတန်ဖိုးရှိ WY စာတန်းပါ(ပန်းရောင်) စိတ်ကြွရူးသွပ် ဆေးပြား ၁ သန်းကိုသိမ်းဆည်းရမိခဲ့ကြောင်း သိရသည်။

ဆက်လက်စစ်ဆေးခဲ့ရာ စုမြတ်ဝေ၏ ထွက်ဆိုချက်အရ မတ်လ ၁၄ ရက်တွင် စစ်တွေမြို့၊ ဘောက်စူးရပ်ကွက်တွင်နေထိုင်သည့် အစ်မဝမ်းကွဲတော်စပ်သူ၏ ခင်ပွန်းဖြစ်သူ သန့်ဇင်ဦးက အဆိုပါမူးယစ်ဆေးဝါးများကို ရန်ကုန်မှ စစ်တွေမြို့သို့ ပို့ဆောင်ပေးပါက ငွေကျပ်သိန်း(၂၀၀)ပေးမည်ဟု ပြောဆိုခဲ့ကြောင်း သိရသည်။

ထို့နောက် ခင်ပွန်းဖြစ်သူ ထွန်သိန်းအောင်နှင့်တိုင်ပင်ကာ သဘောတူလက်ခံခဲ့ပြီး မတ်လ ၂၀ ရက်တွင် သန့်ဇင်ဦး၏ သားဖြစ်သူ ကျော်ပိုင်သူ လာရောက်ပို့ဆောင်သော မူးယစ်ဆေး ဝါးများကို “ဂေါ်ဇီလာ”ဆပ်ပြာတောင်များနှင့်အတူ ရောနှောထုတ်ပိုးကာ အမ်ဗွီ-“စိန်ပြည့်မင်း” ကုန်တင်သင်္ဘောဖြင့်စစ်တွေမြို့သို့ ပို့ဆောင်ရန်လုပ်ဆောင်ပေးခဲ့ကြောင်း သိရသည်။

ထို့ကြောင့် ဖမ်းဆီးရမိသူများကို သက်ဆိုင်ရာမြို့မရဲစခန်းတွင် ဥပဒေအရ ထိရောက်စွာအမှုဖွင့်အရေးယူနိုင်ရေး ဆက်လက်လုပ်ဆောင်လျက်ရှိကြောင်း သိရသည်။