Pika (NSS) - မတ် ၂၅

အမေရိကန်သည် ရုရှားနှင့် အကြမ်းဖက်မှုတိုက်ဖျက်ရေး ပူးပေါင်းဆောင်ရွက်မှုကို ဖျက်သိမ်းလိုက်ကြောင်း အမေရိကန်နိုင်ငံဆိုင်ရာ ရုရှားသံအမတ်ကြီး အန်နာတိုလေးအန်တိုနော့ဗ်က ပြောကြားခဲ့သည်။

အကြမ်းဖက်မှုတိုက်ဖျက်ရေး ပူးပေါင်းဆောင်ရွက်မှုသည် နှစ်နိုင်ငံကြား မိတ်ဖက်ဆက်ဆံရေး၏ အဓိကကျသော အခန်းကဏ္ဍများထဲတွင်ပါဝင်ကြောင်း အန်နာတိုလေးအန်တိုနော့ဗ်က ထပ်မံပြောဆိုခဲ့သည်။ ရုရှားနိုင်ငံ မော်စကိုမြို့ရှိ ပြဇာတ်ရုံတစ်ခုကို သေနတ်သမားအများအပြားက ဝင်ရောက်တိုက်ခိုက်ခဲ့ပြီးနောက် အန်နာတိုလေးအန်တိုနော့ဗ်၏ မှတ်ချက်များထွက်ပေါ်လာခြင်းဖြစ်သည်။ အဆိုပါပြဇာတ်ရုံတိုက်ခိုက်ခံရမှုအတွင်း အနည်းဆုံးလူ(၁၃၇)ဦးသေဆုံးခဲ့ပြီး အခြားလူရာကျော် ထိခိုက်ဒဏ်ရာရရှိခဲ့ကြောင်းလည်း သိရသည်။

ရုရှားနိုင်ငံ မော်စကိုမြို့တွင် အကြမ်းဖက်တိုက်ခိုက်မှုဖြစ်လာနိုင်သည့် ခြိမ်းခြောက်မှုများရှိနေခြင်းကြောင့် လူစုဝေးခြင်းမှ ရှောင်ရှားရန် ၎င်း၏နိုင်ငံသားများကို ရုရှားရှိအမေရိကန်သံရုံးက ယခုလအစောပိုင်းတွင် သတိပေးခဲ့ကြောင်းသိရသည်။ အန်နာတိုလေးအန်တိုနော့ဗ်က 'ကျွန်တော်တို့ရဲ့ သမ္မတပူတင်ဟာ အမေရိကန်တွေကို လက်ဆွဲနှုတ်ဆက်ခဲ့တဲ့ ပထမဆုံးလူတစ်ဦးဖြစ်ပြီး ကူညီမှုတွေလုပ်ဆောင်ပေးဖို့ အသင့်ရှိနေတဲ့အကြောင်း ၂၀၀၁ ခုနှစ်က တည်းက ပြောဆိုခဲ့တာပါ။ ကျွန်တော်တို့ကြားမှာ အကြမ်းဖက်မှုတိုက်ဖျက်ရေး ပူးပေါင်းဆောင်ရွက်မှုတွေကို လုပ်ဆောင်ခဲ့ပါတယ်။ ဒါပေမဲ့ ဒီနေ့မှာတော့ ကျွန်တော်တို့ကိုယ်တိုင်လုပ်တဲ့ အမှားမဟုတ်ဘဲနဲ့ ပူးပေါင်းဆောင်ရွက်မှုတွေကို အမေရိကန်က ဖျက်ဆီးပစ်လိုက်ပါတယ်'ဟုပြောဆိုခဲ့သည်။

သေနတ်သမားများက မော်စကိုမြို့ရှိ ပြဇာတ်ရုံကို တိုက်ခိုက်ခဲ့ပြီးနောက် နာရီပိုင်းအကြာတွင် အမေရိကန်အမျိုးသားလုံခြုံရေးကောင်စီ ပြောရေးဆိုခွင့်ရှိသူ ဂျွန်ကာဘိုင်က ယခုလအစောပိုင်းတွင် အမေရိကန်အစိုးရ၏ သတိပေးမှုများနှင့်ပတ်သက်ပြီး မှတ်ချက်ပြုပြောဆိုခဲ့ကြောင်းသိရသည်။ ဂျွန်ကာဘိုင်က 'မော်စကိုမြို့မှာ လူစုဝေးခြင်းကို ရှောင်ရှားဖို့ အမေရိကန်နိုင်ငံသားတွေကို သံရုံးက ယခုလအစောပိုင်းမှာ သတိပေးခဲ့ပါတယ်။ ဒါပေမဲ့ အမေရိကန်အစိုးရရဲ့ သတိပေးမှုတွေဟာ မော်စကိုမြို့မှာရှိတဲ့ ပြဇာတ်ရုံ တိုက်ခိုက်ခံရမှုနဲ့ ပတ် သက်တာမျိုးမရှိပါဘူး။ ဒီတိုက်ခိုက်မှုနဲ့ပတ်သက်ပြီး ကျွန်တော်တို့ဘက်က ကြိုသိထားတာမျိုးလည်း မရှိပါဘူး'ဟု ပြောဆိုခဲ့သည်။