Pika (NSS) - မတ် ၂၃

ရုရှား၏ရေနံအခြေခံအဆောက်အဦးများကို တိုက်ခိုက်ခြင်းသည် ကမ္ဘာလုံးဆိုင်ရာ စွမ်းအင်ဈေးနှုန်းများကို မြင့်တက်လာစေနိုင်သည်ဟု ယူကရိန်းစစ်တပ် တပ်မှူးများကို အမေရိကန်အရာရှိများက အကြိမ်ကြိမ်သတိပေးပြောဆိုခဲ့ကြောင်း Financial Times သတင်းစာက မတ်လ(၂၂)ရက်တွင် ရေးသားဖော်ပြခဲ့သည်။

ရုရှား၏ ရေနံသန့်စင်ရေး စက်ရုံများနှင့် အခြားရေနံအခြေခံအဆောက်အဦးများအပေါ် ယူကရိန်း၏ဒရုန်းဖြင့် တိုက်ခိုက်မှုများကို အမေရိကန်အစိုးရက တစ်ဖြည်းဖြည်း စိတ်ပျက်လာနေပြီဖြစ်ကြောင်း သတင်းရင်းမြစ်တစ်ခုကို ကိုးကားပြီး Financial Times သတင်းစာက ဖော်ပြခဲ့သည်။ အမေရိကန်နိုင်ငံတွင် ယခုနှစ်အတွင်း လောင်စာဆီဈေးနှုန်းများ (၁၅)ရာခိုင်နှုန်းနီးပါးမြင့်တက်လာမှုနှင့်အတူ သမ္မတဂျိုးဘိုင်ဒန်သည် ယခုနှစ်တွင် ယှဉ်ပြိုင်မှုပြင်းထန်သည့် ရွေးကောက်ပွဲနှင့် ရင်ဆိုင်နေရသည်။

အမေရိကန်နိုင်ငံတွင် သမ္မတရွေးကောက်ပွဲ မကျင်းပမီ လအနည်းငယ်အလိုတွင် ယခုကဲ့သို့ သတိပေးပြောဆိုမှုများထွက်ပေါ်လာခြင်းဖြစ်သည်။ အမေရိကန်အစိုးရ၏ စွမ်းအင်အကြံပေးဟောင်း Bob McNally က 'ရွေးကောက်ပွဲနှစ်အတွင်းမှာ လက်ရှိအမေရိကန်သမ္မတအတွက် လောင်စာဆီဈေးနှုန်းတွေတက်တာထက် ပိုပြီးကြောက်ဖို့ကောင်းတဲ့အရာ မရှိပါဘူး'ဟု ပြောဆိုခဲ့သည်။

ရုရှား၏ရေနံအခြေခံအဆောက်အဦးများကို မကြာသေးမီက တိုက်ခိုက်မှုများ၏ နောက်ကွယ်တွင် ယူကရိန်းလုံခြုံရေးဝန်ဆောင်မှု (SBU) နှင့် စစ်ထောက်လှမ်းရေး (GUR) တို့ရှိနေကြောင်း Financial Times သတင်းစာကဖော်ပြခဲ့သည်။ အမေရိကန်အစိုးရ၏ သတိပေးပြောဆိုမှုများကို အဆိုပါအေဂျင်စီများ၏ အကြီးတန်းအရာရှိများထံသို့ တိုက်ရိုက်ပေးပို့ခဲ့ကြောင်း သတင်းရင်းမြစ်များက ပြောကြားခဲ့သည်။ ယူကရိန်းအတွက် အဆိုပြုထားသော အမေရိကန်ဒေါ်လာ(၆၀)ဘီလျံ အကူအညီကို အတည်ပြုပေးရန်အတွက် အမေရိကန်ကိုဖိအားပေးနိုင်ရန် ယူကရိန်းအစိုးရက ရုရှား၏ရေနံအခြေခံအဆောက်အဦးများကို ပစ်မှတ်ထားတိုက်ခိုက်နေခြင်းဖြစ်နိုင်ဖွယ်ရှိကြောင်း အချို့သတင်းရင်းမြစ်များက အကြံပြုပြောဆိုခဲ့သည်။