Pika (NSS) - မတ် ၂၃

ထိုင်ဝမ်ကျွန်းအနီးရှိ ဖိလစ်ပိုင်နိုင်ငံ၏ ဝေးလံခေါင်ဖျားသော မြောက်ဘက်စွန်းရှိကျွန်းများတွင် ဆိပ်ကမ်းတည်ဆောက်ရေးမှာ အမေရိကန်စစ်တပ်ပါဝင်မည်မဟုတ်ကြောင်း ဒေသဆိုင်ရာအုပ်ချုပ်ရေးမှူးက မတ်လ(၂၂) ရက်တွင် ထုတ်ဖော်ပြောဆိုခဲ့သည်။

ဖိလစ်ပိုင်ဒေသဆိုင်ရာ အုပ်ချုပ်ရေးမှူးသည် ယခုကဲ့သို့ပြောဆိုခြင်းဖြင့် ဒေသတွင်းတွင် အမေရိကန်တည်ရှိမှုနှင့်ပတ်သက်ပြီး တရုတ်နိုင်ငံနှင့် သဘောထားကွဲလွဲမှုများဖြစ်လာနိုင်သည့် အလားအလာများကို ဖယ်ရှားပစ်ခဲ့ကြောင်းသိရသည်။ အဆိုပါကျွန်းများပေါ်တွင် ဆိပ်ကမ်းအသစ်တစ်ခုတည်ဆောက်ရန်အတွက် အမေရိကန်နိုင်ငံထံမှ ရန်ပုံငွေရရှိနိုင်ရန် ကြိုးပမ်းခဲ့ကြောင်း ထိုင်ဝမ်နှင့် ကီလိုမီတာ(၂၀၀)အကွာတွင်ရှိသည့် Batanes ကျွန်းစုများအုပ်ချုပ်ရေးမှူးက ပြီးခဲ့သည့်နှစ် ဩဂုတ်လတွင် ပြောကြားခဲ့သည်။ အမေရိကန်သံတမန်များနှင့် US Army Pacific (USARPAC) ကျွမ်းကျင်ပညာရှင်များသည် အဆိုပါကျွန်းစုများအတွက် ပံ့ပိုးကူညီမှုများလုပ်ဆောင်ရန် ဒေသတွင်းအာဏာပိုင်များနှင့် တွေ့ဆုံခဲ့ကြောင်း အမေရိကန်သံရုံးက အတည်ပြုပြောကြားခဲ့သည်။

အုပ်ချုပ်ရေးမှူး Marilou Cayco က 'အစပိုင်းမှာတော့ အမေရိကန်က ကူညီမယ်ပြောခဲ့ပေမယ့် နောက်ပိုင်းမှာတော့ သူတို့မရှိတော့ပါဘူး။ အဲဒါကြောင့် ကျွန်မ ဖိလစ်ပိုင်ဆိပ်ကမ်းအာဏာပိုင်(PPA)ကို အကူအညီတောင်းခဲ့ပါတယ်'ဟု ပြောဆိုခဲ့သည်။ အဆိုပါစီမံကိန်းသည် မုတ်သုံရာသီအတွင်း မနီလာမြို့မှ ကုန်စည်များသယ်ယူရာတွင် အထောက်အကူဖြစ်စေရန်အတွက် ရည်ရွယ်ထားခြင်းဖြစ်ကြောင်းသိရသည်။ အဆိုပါကိစ္စနှင့်ပတ်သက်ပြီး ချက်ချင်းမှတ်ချက်ပေးမည်မဟုတ်ကြောင်း အမေရိကန်သံရုံးက မတ်လ(၂၂) ရက်တွင် ထုတ်ပြန်ပြောဆိုခဲ့သည်။