Pika (NSS) - မတ် ၁၃

ရုရှားနိုင်ငံအနေဖြင့် မည်သည့်ရွေးကောက်ပွဲကိုမှ ဝင်ရောက်စွက်ဖက်မည်မဟုတ်ကြောင်းနှင့် ရွေးကောက်ခံ အမေရိကန်ခေါင်းဆောင်တိုင်းနှင့် လက်တွဲလုပ်ဆောင်သွားမည်ဖြစ်ကြောင်း ရုရှားသမ္မတပူတင်က မတ်လ (၁၃)ရက်တွင် ထုတ်ဖော်ပြောဆိုခဲ့သည်။

ပူတင်သည် နိုင်ငံပိုင်သတင်းအေဂျင်စီ RIA နှင့် နိုင်ငံပိုင် ရုပ်မြင်သံကြားလိုင်း Rossiya-1 တို့နှင့် အင်တာဗျူးအတွင်း ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ ပူတင်က "အမေရိကန်ရဲ့ရွေးကောက်ပွဲတွေကို ဘယ်လိုနည်းနဲ့မှ ကျွန်တော်တို့ဝင်ရောက်စွက်ဖက်မှာ မဟုတ်ပါဘူး။ ကျွန်တော် အကြိမ်ပေါင်းများစွာ ပြောခဲ့ဖူးသလိုပါပဲ။ အမေရိကန်ပြည်သူတွေ၊ မဲဆန္ဒရှင်တွေ ယုံကြည်စိတ်ချတဲ့ ခေါင်းဆောင်တိုင်းနဲ့ ကျွန်တော်တို့ လက်တွဲလုပ်ဆောင်သွားမှာပါ"ဟု ပြောဆိုခဲ့သည်။

၂၀၂၂ ခုနှစ် ဖေဖော်ဝါရီလတွင် ရုရှားကယူကရိန်းကို ကျူးကျော်တိုက်ခိုက်မှုများ စတင်လုပ်ဆောင်ခဲ့ပြီးနောက်ပိုင်း အမေရိကန်ဦးဆောင်သော အနောက်အုပ်စုနိုင်ငံ အများအပြားသည် ရုရှားအပေါ် ပိတ်ဆို့အရေးယူမှုများကို အကြိမ်ကြိမ်ချမှတ်ခဲ့ကြောင်းသိရသည်။ ထို့ပြင် အနောက်အုပ်စုနိုင်ငံများ သည် ယူကရိန်းကို စစ်လက်နက်ပစ္စည်းများ နှင့် ငွေကြေးများ ထောက်ပံ့ပေးခဲ့ကြောင်း ရုရှား နှင့် အနောက်အုပ်စုနိုင်ငံများကြား ဆက်ဆံရေးမှာ ယိုယွင်းပျက်စီးလာခဲ့ကြောင်း သိရသည်။ အနောက်အုပ်စုနိုင်ငံများ၏ ယူကရိန်းသို့ စစ်လက်နက်ပစ္စည်းများ ကူညီပံ့ပိုးပေးမှုသည် လက်ရှိဖြစ်ပွားနေသော ပဋိပက္ခကို ပိုမိုရှည်ကြာစေရုံသာမက သွေးထွက်သံယိုဖြစ်ပွားမှုများကိုသာ တိုးလာစေမည်ဖြစ်ကြောင်း ရုရှားဘက်က အကြိမ်ကြိမ်သတိပေးပြောဆိုခဲ့သည်။ 

မြောက်ကိုရီးယားသည် ယူကရိန်းနှင့်စစ်ပွဲတွင် အသုံးပြုရန်အတွက် စစ်လက်နက်ပစ္စည်းများနှင့် ခဲယမ်းမီးကျောက်များပါဝင်သည့် ကွန်တိန်နာ(၁)ထောင်ကျော်ကို ရုရှားသို့ပေးပို့ခဲ့ကြောင်း အမေရိကန်က ပြီးခဲ့သည့်နှစ်တွင် စွပ်စွဲပြောဆိုခဲ့ဖူးသည်။ အပြန်အလှန်အနေဖြင့် ရုရှားသည် မြောက်ကိုရီးယားကို အဆင့်မြင့်နည်းပညာများကို လွှဲပြောင်းပေးခဲ့ကြောင်းလည်း အမေရိကန်က စွပ်စွဲပြောဆိုခဲ့သည်။