Pika (NSS) - မတ် ၁၂ 

တရုတ်နိုင်ငံတွင် ပြီးခဲ့သည့်(၂၄)နာရီအတွင်း ကျောက်မီးသွေးမိုင်းတွင်းမတော်တဆမှုနှစ်ခုဖြစ်ပွားခဲ့ပြီး အနည်းဆုံး လူ(၁၂)ဦး သေဆုံးခဲ့ကြောင်း နိုင်ငံပိုင်ရုပ်သံလိုင်း CCTV က ဖော်ပြခဲ့သည်။

တရုတ်အစိုးရသည် မိုင်းတွင်းဘေးကင်းရေးဥပဒေကို မကြာသေးမီက ပြန်လည်ပြင်ဆင်ခဲ့ပြီးနောက် ယခုကဲ့သို့ ဖြစ်ရပ်များဖြစ်ပွားခဲ့ခြင်းဖြစ်သည်။ Shanxi ပြည်နယ် Zhongyang ကောင်တီတွင် ကုမ္ပဏီတစ်ခုပိုင်ဆိုင်သော မြေအောက်ကျောက်မီးသွေးဘန်ကာသည် မတ်လ(၁၁)ရက် ညတွင် ပြိုကျခဲ့ပြီး အနည်းဆုံးလူ(၅)ဦး သေဆုံးကာ အခြားလူ(၂)ဦး ပျောက်ဆုံးနေကြောင်း CCTVက မတ်လ(၁၂)ရက်တွင် ဖော်ပြခဲ့သည်။

အဆိုပါဘန်ကာကို Taoyuan Xinlong Coal Industry ကုမ္ပဏီက ပိုင်ဆိုင်ခြင်းဖြစ်ပြီး ရှာဖွေကယ်ဆယ်ရေး လုပ်ငန်းများကို ဆက်လက်လုပ်ဆောင်လျက်ရှိကြောင်း သိရသည်။ မိုင်းတွင်း မတော်တဆမှုများကို ကာကွယ်ရန် အတွက် မိုင်းတွင်းဘေးကင်းရေးဥပဒေကို ပြီးခဲ့သည့််လတွင် ထုတ်ပြန်ခဲ့ပြီးနောက် Shanxi ပြည်နယ်တွင် အဆိုပါ ဖြစ်ရပ်ဖြစ်ပွားခဲ့ခြင်းဖြစ်သည်။ 

တရုတ်နိုင်ငံ၏ ကျောက်မီးသွေးထုတ်လုပ်မှုအများဆုံးဖြစ်သော အဆိုပါဒေသတွင် သေဆုံးမှုများမှာ ၂၀၂၃ ခုနှစ် အတွင်း မြင့်တက်လာခဲ့ကြောင်း သိရသည်။ တရုတ်နိုင်ငံ အရှေ့ပိုင်း Anhui ပြည်နယ်ရှိ Huaihe Energy ကုမ္ပဏီ၏ ကျောက်မီးသွေးတွင်းတွင် ဓါတ်ငွေ့ပေါက်ကွဲမှုဖြစ်ပွားခဲ့ပြီးနောက် အနည်းဆုံးလူ(၇)ဦးသေဆုံးကာ အခြားလူ(၂)ဦး ပျောက်ဆုံးနေဆဲဖြစ်ကြောင်း CCTV က မတ်လ(၁၁)ရက် နှောင်းပိုင်းတွင် ဖော်ပြခဲ့သည်။

၂၀၂၃ ခုနှစ်တွင် တရုတ်နိုင်ငံမှာ လူအသေအပျောက်များသော ကျောက်မီးသွေးမိုင်းတွင်း မတော်တဆမှုများ ဆက်တိုက်ဖြစ်ပွားခဲ့ခြင်းကြောင့် နိုင်ငံ၏မိုင်းတွင်းဘေးကင်းရေးစီမံခန့်ခွဲရေးမှ တာဝန်ရှိသူတစ်ဦးက ပြဿနာများ ရှိနေသည်ဟုဆိုက တည်ဆဲဥပဒေကို ပြန်လည်ပြင်ဆင်ရန် ဖိအားပေးခဲ့ကြောင်း သိရသည်။

ပြီးခဲ့သည့်လတွင် တရုတ်နိုင်ငံ အလယ်ပိုင်းရှိ Pingdingshan မြို့တွင် မိုင်းတွင်းမတော်တဆမှုတစ်ခုဖြစ်ပွားခဲ့ကာ လူ(၁၀)ဦး သေဆုံးခဲ့ပြီးနောက် ဒေသတွင်းအာဏာပိုင်များက လုံခြုံရေးစစ်ဆေးမှုများကို လုပ်ဆောင်ခဲ့ကြကြောင်း သိရသည်။