ဂျန်ဇက် (NSS) - မတ် ၈ 

ယူကရိန်းနိုင်ငံခြားရေးဝန်ကြီးဌာနသည် ရာထူးမှထုတ်ပယ်ခံလိုက်ရသော ယူကရိန်းကာကွယ်ရေးဦးစီးချုပ်ကို ဗြိတိန်နိုင်ငံဆိုင်ရာ ယူကရိန်းသံအမတ်ကြီးအသစ်အဖြစ် ခန့်အပ်လိုက်ကြောင်း သိရသည်။

ယူကရိန်းသမ္မတသည် ယူကရိန်းကာကွယ်ရေးဦးစီးချုပ် ဗာလီရီဇာလူနီ  နှင့် အငြင်းပွားမှုများဖြစ်လာခဲ့ပြီး နောက်ပိုင်း ပြီးခဲ့သောလတွင် ကာကွယ်ရေးဦးစီးချုပ်ရာထူးမှ ထုတ်ပယ်ခဲ့ရာ ယူကရိန်းစစ်အတွင်း အငြင်းပွားမှုများ ဖြစ်လာခဲ့ကြောင်း သိရသည်။ 

ယူကရိန်းကာကွယ်ရေးဦးစီးချုပ်ဟောင်းဖြစ်သူ ဇာလူနီသည် လက်ရှိအချိန်တွင် ယူကရိန်းသမ္မတထက် လူကြိုက် များနေကြောင်း သိရသည်။ ယူကရိန်းနိုင်ငံခြားရေးဝန်ကြီးက "ယူကရိန်းသမ္မတဟာ ကာကွယ်ရေးဦးစီးချုပ်ဟောင်း ကို ဗြိတိန်နိုင်ငံဆိုင်ရာယူကရိန်းသံအမတ်ကြီးအဖြစ်ခန့်အပ်ဖို့ ခွင့်ပြုထားပြီဖြစ်ပါတယ်" ဟု ပြောသည်။ 

ယူကရိန်းစစ်ပွဲနှင့်ပတ်သက်ပြီး ယူကရိန်းကာကွယ်ရေးဦးစီးချုပ်နှင့် ယူကရိန်းသမ္မတကြား ကြီးမားသော သဘောထားကွဲလွဲမှုများ အငြင်းပွားမှုများဖြစ်လာခဲ့ပြီးနောက် ရာထူးက ထုတ်ပယ်ခံရကာ ပြောင်းရွှေ့ခံရခြင်းမျိုး ဖြစ်ကြောင်း နိုင်ငံတကာသတင်းများတွင် ဖော်ပြထားသည်။

ယူကရိန်းသမ္မတဇီလန်စကီးက "ဇာလူနီဟာ ကျွန်တော်ကို ပြောခဲ့တယ်။ ယူကရိန်း နိုင်ငံအတွက် သံတမန်ရေး လုပ်ငန်းတွေ လုပ်ကိုင်ပေးဖို့ ဆန္ဒရှိတယ်လို့ ပြောခဲ့တယ်" ဟု ပြောသည်။

ယူကရိန်းသမ္မတသည် ဇာလူနီကို ကာကွယ်ရေးဦးစီးချုပ်ရာထူးမှ ထုတ်ပယ်ကာ ကာကွယ်ရေးဦးစီးချုပ်အသစ် ထပ်မံခန့်အပ်ပြီး ရုရှားနှင့်ဖြစ်ပွားနေသည့် စစ်ပွဲအတွက် ချဉ်းကပ်မှုအသစ်များ ထပ်မံလုပ်ဆောင်ခဲ့ကြောင်း သိရသည်။ ရုရှား နှင့် ယူကရိန်းကြားဖြစ်ပွားနေသည့် စစ်ပွဲနှင့်ဆက်နွယ်ပြီး မျှော်လင့်သလောက် ရလဒ်မကောင်း သည့်အတွက် သမ္မတဇီလန်စကီး နှင့် ကာကွယ်ရေးဦးစီးချုပ်ဖြစ်ခဲ့သူ ဇာလူနီတို့ကြား အငြင်းပွားမှုများ၊ သဘောထားကွဲလွဲမှုများဖြစ်ပွားလာခဲ့ခြင်းဖြစ်ကြောင်း သိရသည်။ 

ယူကရိန်း နှင့် ရုရှားကြားစစ်ပွဲဖြစ်လာခဲ့ပြီးနောက်ပိုင်းရုရှားသည် ယူကရိန်းပိုင်နက်ဒေသလေးခုကို သိမ်းပိုက်ထား ပြီး ယူကရိန်းက  သိမ်းပိုက်ခံထားရသောနယ်မြေများကို ပြန်လည်သိမ်းယူနိုင်ရန်အတွက် ကြီးမားသော တန်ပြန် ထိုးစစ်ဆင်မှုလုပ်ခဲ့သော်လည်း အောင်မြင်မှုမရခဲ့ကြောင်း သိရသည်။