သန့်ဇင် (NSS) - မတ် ၆

ကရင်ပြည်နယ်၊ ဘားအံမြို့တွင် အမျိုးသားတစ်ဦးက Facebookတွင် နောက်ဆုံး Posts တင်နှုတ်ဆက်ကာ သံလွင်မြစ်အတွင်းသို့ ခုန်ချအဆုံးစီမှုဖြစ်ပွားခဲ့ကြောင်း မြန်မာနိုင်ငံလူမှုကယ်ဆယ်ရေးအသင်း ဘားအံမြို့ထံမှ သိရသည်။

ဖြစ်စဉ်မှာ ယမန်နေ့(မတ်လ ၄ ရက်)၊ ညနေ ၄ နာရီ ၄၅ မိနစ်အချိန်ခန့်က အမှတ်-၃ ရပ်ကွက်၊ ၁၅ဝ-ကွက်သစ်၊ ရေ အရင်းမြစ် ရုံးအနောက်ဘက် သံလွင်မြစ်ကမ်း၌ ဖြစ်ပွားခဲ့ခြင်းဖြစ်ကြောင်း သိရသည်။

“အမျိုသားက ကမ်းနားကနေ ခုန်ချသွားတာပေါ့။ မြင်တဲ့သူတွေပြောတာတော့ အနားမှာ ရပ်နေပြီးတော့ ခုန်ချသွားတာလို့ မျက်မြင်တွေက ပြောတယ်” ဟု မြန်မာနိုင်ငံလူမှုကယ်ဆယ်ရေးအဖွဲ့ ဘားအံမြို့မှ တာဝန်ရှိသူတစ်ဦးက NP News ကို ပြောသည်။

မြစ်ထဲသို့ ခုန်ချအဆုံးစီရင်သွားသူ အမျိုးသားမှာ အသက်(၃၈)နှစ်အရွယ်ခန့်ရှိသူဖြစ်ပြီး ဘားအံမြို့၊ အမှတ်(၂) ရပ်ကွက်တွင် နေထိုင်သူဖြစ်ကြောင်း သိရသည်။

“မခုန်ချခင်တောင် သူ့ Facebook အကောင့်ကနေ နှုတ်ဆက်စာ ရေးတင်သွားသေးတယ်။ ကျွန်တော်တို့လည်း တာဝန်ရှိသူတွေကို စောင့်ပြီးရှာဖွေရေးလုပ်တော့ သူခုန်ချသွားတဲ့နေရာလေးမှာပဲ အလောင်းကို ပြန်တွေ့တာပေါ့” ဟု ၎င်းက ဆက်လက်ပြောသည်။

အဆိုပါဖြစ်စဉ်တွင် ခုန်ချအဆုံးစီရင်သူအမျိုးသားကို မြန်မာနိုင်ငံလူမှုကယ်ဆယ်ရေးအဖွဲ့(ရေငုတ်ရှာဖွေ ကယ်ဆယ်ရေးအဖွဲ့- ကရင်ပြည်နယ်) နှင့် အခြားအသင်းအဖွဲ့များပူးပေါင်း၍ ရှာဖွေကယ်ဆယ်ရေးများပြုခဲ့ကြရာ ၃ နာရီကျော်အကြာတွင် ပြန်လည်ရှာဖွေတွေ့ရှိခဲ့ကြောင်း သိရသည်။

သေဆုံးသူအမျိုးသား၏ ရုပ်အလောင်းကို မြန်မာနိုင်ငံလူမှုကယ်ဆယ်ရေးအဖွဲ့ဘားအံက သယ်ဆောင်ကာ ဘားအံမြို့နယ်ပြည်သူ့ဆေးရုံကြီးသို့ ပို့ဆောင်ကူညီပေးခဲ့ကြောင်း သိရသည်။