ဂျန်ဇက် (NSS) - မတ် ၃ 

ယူကရိန်းတပ်ဖွဲ့များဟာ မတ်လ ၂ ရက်က ရုရှားနိုင်ငံထိန်းချုပ်ထားတဲ့ ခရိုင်းမီးယားဒေသကို တိုက်ခိုက်ရေးသုံး ဒရုန်းအများအပြား အုပ်စုဖွဲ့ ပျံသန်းတိုက်ခိုက်ခိုက်ဖို့ ကြိုးပမ်းခဲ့ပြီး ယူကရိန်းဒရုန်းအစီးရေပေါင်း အနည်းဆုံး ၃၈ စင်းကို ပစ်ချနိုင်ခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ခဲ့ပါတယ်။ 

ရုရှားကာကွယ်ရေးဝန်ကြီးဌာနက "ယူကရိန်းဟာ ဒရုန်းတွေကို ပျားတွေလိုမျိုး စုဖွဲ့ ပျံသန်းပြီးတိုက်ခိုက်ဖို့ ကြိုးပမ်းခဲ့တယ်။ အဲဒီဒရုန်းတွေထဲက ဒရုန်းအစီးရေပေါင်း အနည်းဆုံး ၃၈ စင်းကို ပစ်ချနိုင်ခဲ့တယ်။ ရုရှား လေကြောင်းရန်ကာကွယ်ရေးစနစ်တွေက ယူကရိန်းဒရုန်းတွေကို ပစ်ချနိုင်ခဲ့တာဖြစ်ပါတယ်" လို့ ပြောပါတယ်။ 

ယူကရိန်းရဲ့ဒရုန်းနဲ့တိုက်ခိုက်ဖို့ ကြိုးပမ်းမှုတွေကြောင့် သေဆုံး၊ ဒဏ်ရာရတာမျိုး မရှိခဲ့ကြောင်း၊ ယူကရိန်းဒရုန်း တွေဟာ ခရိုင်းမီးယားတံတားကို ဦးတည်ပျံသန်းလာခဲ့ခြင်းဖြစ်ကြောင်း ရုရှားကာကွယ်ရေးဝန်ကြီးဌာနက ပြောပါတယ်။ ခရိုင်းမီးယားဒေသမှာ ရုရှားနိုင်ငံရဲ့အဓိကရေတပ်စခန်းရှိနေပြီး ယူကရိန်းက ဒရုန်းတွေ၊ ဒုံးကျည် တွေနဲ့မကြာခဏတိုက်ခိုက်ဖို့ ကြိုးပမ်းနေကြောင်း သိရပါတယ်။ 

ခရိုင်းမီးယားတံတားအရှည်ဟာ ၁၉ ကီလိုမီတာအရှည်ရှိပြီး၊ ပြီးခဲ့တဲ့နှစ် ဇူလိုင်လအတွင်းက ဒရုန်းနဲ့ အတိုက်ခံရမှု ကြောင့် ဆိုးရွားစွာပျက်စီးခဲ့ရာ အောက်တိုဘာလမှာ အပြည့်အဝ ပြန်လည်ဖွင့်လှစ်ခဲ့ကြောင်း သိရပါတယ်။ ရုရှား ထောက်လှမ်းရေးအဖွဲ့တွေဟာ မေလ ၂ ရက် အစောပိုင်းမှာပဲ ခါဆွန်ဒေသကနေ ခရိုင်းမီးယားဒေသကို ပေါက်ကွဲ စေတဲ့ပစ္စည်းများ တင်ဆောင်လာတဲ့ကားနဲ့ ပစ်မှတ်ထားတိုက်ခိုက်ဖို့ ကြံစည်မှုတွေကိုလည်း ဟန့်တားနိုင်ခဲ့ကြောင်း သိရပါတယ်။

အဆိုပါကားပေါ်မှာတွေ့ရှိခဲ့တဲ့ ပေါက်ကွဲစေတဲ့ပစ္စည်းအများစုဟာ ယူကရိန်းကိုအနောက်အုပ်စုနိုင်ငံတွေ ကူညီ ထောက်ပံ့ပေးထားတဲ့ပစ္စည်းတွေဖြစ်ကြောင်း သိရပါတယ်။