မြူနစ် (NSS) - မတ်  ၂ 

ရှမ်းပြည်နယ်အရှေ့ပိုင်း တာချီလိတ်မြို့ပေါ်၌ လုံခြုံရေးအဖွဲ့ အယောင်ဆောင်၍ ဓားပြမှုကျူးလွန် နေသည့် ရွေးကော်ဒုဦးစီးမှူး ဦးဆောင်သောအဖွဲ့ကို ဖော်ထုတ်ဖမ်းဆီးလိုက်ကြောင်း လုံခြုံရေးအရာရှိများထံမှ သိရသည်။

တာချီလိတ်မြို့နယ် ရွေးကောက်ပွဲကော်မရှင် ရုံး၏ ဒုဦးစီးမှူး အေးကိုကိုဦး အပါအဝင် (၇)ဦးကို ဖေဖော်ဝါရီ ၂၉ ရက် ည ၁၁ နာရီအချိန်ခန့်တွင် မယ်ခေါင်ရပ်ကွက် စိုက်ပျိုးရေးလမ်း ခရိုင်ကော်မ ရှင် ရုံးအိမ်ရာဝန်းအတွင်း ရှိနေအိမ်တွင် ဖမ်းဆီးရမိခဲ့ခြင်း ဖြစ်ကြောင်း သိရသည်။ အဆိုပါနေအိမ်သို့ သတင်း အရ လုံခြုံရေးအဖွဲ့ဝင်များ က ဝင်ရောက်ရှာဖွေစဉ် ဒုဦးစီးမှူး အေးကိုကိုဦး၊ စိုင်းမောင်ထွန်း(ခ) အိုက်ပီး၊ စိုင်းလှမောင်၊ စိုင်းခမ်းတွီ၊ ရဲသီဟလွင်၊ ကျိုင်းဆံ ဟိုင်းနှင့် စိုင်းဆိုင်မိန်းတို့ကို သက်သေခံ ပစ္စည်းများနှင့် အတူ ဖမ်းဆီးရမိခဲ့ကြောင်း သိရသည်။

ယခုကဲ့သို့ ဖမ်းဆီးရမိသူများသည် တပ်မတော် နှင့် ရဲတပ်ဖွဲ့ဝင်များ အယောင်ဆောင်ကာ တာချီလိတ် မြို့ပေါ်ရှိ ရပ်ကွက်များတွင် လုယက်မှု၊ ဓားပြတိုက်မှု များကို ကျူးလွန်နေကြောင်း အထက်ပါလုံခြုံရေး အရာရှိ သတင်းအရင်းအမြစ်က ပြောသည်။ ၎င်းတို့ ထံမှ တပ်မတော်ယူနီဖောင်းများ၊ ရဲတပ်ဖွဲ့ယူနီဖောင်းများအပါအဝင် ဩစတြေးလျနိုင်ငံထုတ် STEYR M9 A1 ပစ္စတို သေနတ်(၁)လက်၊ ၎င်းကျည်အိမ်(၁)ခု၊ တူရကီနိုင်ငံထုတ်   ZORAKI M 906-T ပစ္စတို သေနတ်(၁)လက်နှင့် ကျည်အိမ်(၁) ခု၊ COLT အမျိုးအစား ပစ္စတိုသေနတ်(၁) လက်နှင့် ကျည်အိမ် (၁)ခုတို့ကို သိမ်းဆည်းရရှိခဲ့ကြောင်း သိရသည်။

ထို့ပြင် USA နိုင်ငံထုတ်၊ M4 A1 CarvineM-320461 (၁)လက်နှင့် ကျည်အိမ် (၂) ခု၊ ပွိုင့် ၂၂ သေနတ်အရှည်(၁)လက်၊ ကျည်အိမ်(၁)ခု၊၅.၅၆ ကျည်(၅၉)တောင့်၊ ၉ မမကျည်(၂၀) တောင့်၊ ၃၈ ကျည် (၉) တောင့်၊ ၂၂ ကျည်(၄)တောင့်၊ သေနတ်အိတ် (၃)ခုတို့ကိုလည်း သိမ်းဆည်းရရှိခဲ့ ကြောင်း သိရသည်။ဆက်လက်ပြီး ဓားပြမှုကျူးလွန် သူများထံမှ ပြည်သူ့စစ်ယူနီ ဖောင်းအပါအဝင်အခြားစစ်ဘက်ယူနီဖောင်းများ၊ စကားပြောစက်၊ မျက်နှာဖုံးအဖြူရောင်၊ ဆံပင်အတု၊ လက်ထိပ်များ၊ ဓားများနှင့်အတူ ကားများကိုလည်း သိမ်းဆည်းရမိခဲ့ကြောင်း သိရသည်။ ထိုသို့ ဓားပြမှုကျူးလွန်နေသူများအနက် စိုင်းဆိုင်မိန်းကို တာချီလိတ်မြို့ ဆေခမ်းရပ် ကွက်ရှိ နေအိမ်တစ်လုံးတွင် ဖမ်းဆီးရမိခဲ့ခြင်းဖြစ်ပြီး ၎င်းထံမှ တူရကီနိုင်ငံထုတ် ပစ္စတိုသေနတ် နှင့်ကျည်ဆန်များကို သိမ်းဆည်းရရှိခဲ့ကြောင်း သိရသည်။

 “အရင်တုန်းကတော့ ဒီမှာက ဓားပြတိုက်တဲ့ ဖြစ်စဉ်တွေရှိတယ်။ အခုကိစ္စနဲ့ပတ်သက်ပြီးတော့ သေချာမ သိပေမယ့် အဲဒီသတင်းကိုတော့ ကြားမိတယ်။ ကြားမိသလိုပဲ ဒီလိုဒီကြောင်း ဖမ်းမိတယ် ဆိုတာပဲ သိရတာပါ”ဟု တာချီလိတ်မြို့ရှိ လူမှုကူ ညီရေးအသင်းမှ တာဝန်ရှိသူတစ်ဦးက NSS ကိုပြောသည်။

လက်ရှိတွင် လုံခြုံရေးအဖွဲ့အယောင်ဆောင်၍ ဓားပြမှုကျူးလွန်နေသူ (၇)ဦးကို တာချီလိတ်မြို့ မရဲစခန်းတွင် ဖမ်းဆီးထိန်းသိမ်းထားကြောင်း သိရသည်။