Pearl (NSS) - မတ် ၂ 

တာမခန် ရှမ်းနီစာပေနှင့် ရိုးရာယဉ်ကျေးမှုအဖွဲ့၏ အတွင်းရေးမှူးကို  KIA၊ PDF ပူးပေါင်းအဖွဲ့က ဖမ်းဆီးခေါ်ဆောင်သွားခဲ့ကြောင်း မြန်မာပြည်မြောက်ပိုင်းသျှမ်းမျိုးနွယ်စုရေးရာအဖွဲ့ထံမှ သိရသည်။ 

KIA၊ PDF ပူးပေါင်းအဖွဲ့သည် ပြီးခဲ့သည့် ဖေဖော်ဝါရီ (၂၈) ရက်၊ နေ့လည် (၁)နာရီခန့်က ကချင် ပြည်နယ်၊ ဖားကန့်မြို့နယ်၊ တာမခန်ကျေးရွာတွင်နေထိုင်သော ဦးခင်မောင်ကြည်(၅၁) နှစ်ကို ဥရုမြစ်အနောက်ဘက်ရှိ  ဒေသအခေါ်  နမ့်နန်းလှိုင် ရှမ်းစစ်ရှောင်စခန်းတွင် လာရောက်ဖမ်းဆီးသွားခဲ့ကြောင်း သိရသည်။ 

ထိုသို့ ဦးခင်မောင်ကြည်အား ဖမ်းဆီးခေါ်ဆောင်သွားမှုအပေါ်  မြန်မာပြည်မြောက်ပိုင်းသျှမ်းမျိုးနွယ်စုရေးရာအဖွဲ့ (S.E.A.S) က  ပြင်းထန်စွာ ကန့်ကွက်ရှုတ်ချကြောင်း သဘောထား ထုတ်ပြန်ထားသည်။ 

ထို့ပြင် မလိုအပ်သည်များ ဆက်လက်မဖြစ်ပွားစေရေးအတွက် ဦးခင်မောင်ကြည်အား အမြန်ဆုံးလွှတ်ပေးရန်အတွက် ၎င်း၏ မိသားစု၊ ဆွေမျိုး မိသင်္ဂများ ကိုယ်စား တောင်းဆိုကြောင်းလည်း  S.E.A.S က ဆိုသည်။

တာမခန် ရှမ်းနီစာပေနှင့် ရိုးရာယဉ်ကျေးမှုအဖွဲ့ ၏ အတွင်းရေးမှူးဖြစ်သူ ဦးခင်မောင်ကြည်သည် ရှမ်းနီ အမျိုးသားရေးအတွက်တတ်ကြွလှုပ်ရှားခဲ့သူဖြစ်ပြီး လက်ရှိတွင်လည်း စာပေ၊ ရိုးရာယဉ်ကျေးမှု ကိစ္စရပ်များနှင့် ရပ်ရေးရွာရေးကိစ္စများတွင် တတ်စွမ်းသ၍ ပါဝင်ဆောင်ရွက်နေသူတစ်ဦးဖြစ်ကြောင်း သိရသည်။

ပြီးခဲ့သော ၂၀၂၂ ခုနှစ်၊ ဇွန်လတွင်လည်း  ရှမ်းနီစာပေနှင့်ယဉ်ကျေးမှုကော်မတီနာယကဖြစ်သူ ဦးသန်းဖေသည် ၎င်း၏ နေအိမ်တွင်ရှိနေစဉ် အကြမ်းဖက်သမားများက သေနတ်ဖြင့် လုပ်ကြံသတ်ဖြတ်ခဲ့သည့် ဖြစ်စဉ်ဖြစ်ပွားဖူးသည်။