ယွန်း (NSS) - မတ် ၁

ကိုရီးယားနိုင်ငံသို့ လာရောက်အလုပ်လုပ်ကြသည့် E-9 မြန်မာလုပ်သားများထံမှ တားမြစ်ထားသည့်ပစ္စည်းများ စစ်ဆေးတွေ့ရှိပါက ဒဏ်ကြေးငွေ ဝမ်သိန်း (၅၀)အထိ တိုးမြှင့်ကောက်ခံမည်ဖြစ်ကြောင်း သိရသည်။

EPS Center in Myanmar မှ ဖေဖော်ဝါရီလ ၂၉ ရက်တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ကိုရီးယားနိုင်ငံသို့ သွားရောက်အလုပ်လုပ်ကြမည့် E-9 လုပ်သားများကို အင်ချောန်လေဆိပ်သို့‌ ရောက်ရှိသည်နှင့် ကိုရီးယားနိုင်ငံ လူဝင်မှုကြီးကြပ်ရေးရုံး တာဝန်ခံများမှ ၎င်းတို့ယူဆောင်လာသည့် ခရီးဆောင်အိတ်များအား တားမြစ်ပစ္စည်းများ ယူဆောင်လာခြင်း ရှိ/မရှိ စစ်ဆေးလျက်ရှိကြောင်း HRDK (မြန်မာEPSစင်ဝာာ) နှင့် POEA (အလုပ်သမားပို့ဆောင်ရေးဌာန) တို့မှ သတိပေးမှာကြားပြီးဖြစ်ကြောင်း သိရသည်။

သို့သော် ကိုရီးယားလေဆိပ်၌ ရှာဖွေစစ်ဆေးရာတွင် ၎င်းတို့နိုင်ငံမှ တားမြစ်ထားသော လယ်ယာထွက်ကုန်နှင့် စားသောက်ကုန်ပစ္စည်းများကို  E-9 မြန်မာလုပ်သားများအနေဖြင့် ယူဆောင်လာခြင်းကို အပတ်စဥ်ရှာဖွေတွေ့ရှိနေကြောင်း EPS Center in Myanmar မှ ဆိုထားသည်။

ထိုသို့တွေ့ရှိပါက အင်ချောန်လေဆိပ်တာဝန်ရှိသူများမှ အဆိုပါပစ္စည်းများအား သိမ်းယူပြီး ဒဏ်ကြေးငွေ ဝမ် ၁ သိန်းအတွင်းသာ ဒဏ်ရိုက်ခြင်းပြုခဲ့ကြောင်း သိရသည်။

သို့သော် ဆက်လက်ယူဆောင်လာခြင်းများတွေ့ရှိနေရသောကြောင့် ဒဏ်ကြေးငွေပမာဏအား ဝမ် ၁ သိန်းမှ ဝမ်သိန်း ၅၀ အထိ တိုးမြှင့်လိုက်ကြောင်း သိရသည်။

သို့ဖြစ်၍ ကိုရီးယားနိုင်ငံသို့ ထွက်ခွာမည့် E-9 မြန်မာလုပ်သားများအနေဖြင့် အဆိုပါတားမြစ်ပစ္စည်းများ ယူဆောင်သွားခြင်းကို လုံးဝမပြုလုပ်ရန် EPS Center in Myanmar မှ သတိပေးထားသည်။