ရောင်နီ (NSS) - ဖေဖော်ဝါရီ ၂၉

စင်ကာပူမှာ အမျိုးသမီးတစ်ဦးဟာ မကြာသေးမီက Yeo  တံဆိပ် ဂန္ဓမာလက်ဖက်ရည်ထုပ်များစွာကို ဝယ်ယူခဲ့ပေမယ့် ဖျော်ပြီး သောက်သုံးကြည့်တဲ့အခါမှာတော့ ရိုးရိုးရေလိုပဲ အရသာရှိနေတာကို တွေ့ရခြင်းကြောင့် အံ့သြဒေါသထွက်သွားခဲ့ပါတယ်။ 

အသက် ၅၈ နှစ်အရွယ် မစ္စကျန်ဟာ တရုတ်နှစ်သစ်ကူး အခမ်းအနားအတွက် ဂန္ဓမာလက်ဖက်ရည်ပုံးတစ်ပုံးကို ဖေဖော်ဝါရီ ၁ ရက်က White Sands ဈေးဝယ်စင်တာရှိ FairPrice စူပါမားကတ်မှ ဝယ်ယူခဲ့ပါတယ်။

သူဝယ်ထားတဲ့ လက်ဖက်ရည်ထုပ် ၂၄ ထုပ်ထဲက ၃ ထုပ်ကို ဖွင့်ကြည့်လိုက်တဲ့အခါမှာတော့ အထဲက လက်ဖက်ရည်ဟာ အရည်တွေက အရောင်ကင်းစင်ပြီး အရသာက ထူးထူးခြားခြားမရှိ ရေအတိုင်းဖြစ်နေတာ တွေ့ခဲ့ပါတယ်။ 

ဒါနဲ့သူမက ကျန်လက်ဖက်ရည်ထုပ်တွေပါယူပြီး စူပါမားကတ်ကို ပြန်ပေးဖို့ ဆုံးဖြတ်ခဲ့ပါတယ်။ 

Yeo ရဲ့ပြောရေးဆိုခွင့်ရှိသူက ကုမ္ပဏီအနေနဲ့လည်း မစ္စကျန် ရဲ့ အဆင်မပြေမှုသိရှိရပြီးနောက် ၎င်းရဲ့ထုတ်လုပ်ရေးကို စုံစမ်းစစ်ဆေးမှုပြုလုပ်ခဲ့တယ်လို့ ဖေဖော်ဝါရီ ၂၈ ရက်မှာ ပြောကြားခဲ့ပါတယ်။ 

၎င်းတို့ရဲ့စုံစမ်းစစ်ဆေးမှုမှာ ကုန်ထုတ်လုပ်မှုလုပ်ငန်းစဉ်အတွင်း ပုံမှန်မဟုတ်တဲ့ နည်းပညာဆိုင်ရာချို့ယွင်းချက်တစ်ခုကိုတွေ့ရှိခဲ့ပြီ၊ ဂန္ဓမာလက်ဖက်ရည်ထုပ် အသုတ်ထဲ ရေပါဝင်မှု ပိုများသွားတာ တွေ့ရတယ်လို့ ပြောရေးဆိုခွင့်ရှိသူက ပြောကြားခဲ့ပါတယ်။

ဒီအဆင်မပြေဖြစ်ခဲ့မှုအတွက် မစ္စကျန်ဟာ ၁၀ ဒေါ်လာ စူပါမားကတ်ဘောက်ချာ၊ ရေနွေးကြမ်းပုံးတစ်ပုံးနဲ့ ဂန္ဓမာလက်ဖက်ရည်တစ်ပုံး လျော်ကြေးရခဲ့တယ်လို့ သိရပါတယ်။