ALynn (NSS) - ဖေဖော်ဝါရီ ၂၈ 

ကနေဒါအစိုးရသည် ကလေးသူငယ်များ လိင်ပိုင်းဆိုင်ရာလှုံ့ဆော်မှုနှင့် အမုန်းပွားစေသောကိစ္စများ ပါဝင်သည့် အွန်လိုင်းအကြောင်းအရာများကို အမြန်ဆုံးဖယ်ရှားပေးရန် နည်းပညာကုမ္ပဏီများကို တွန်းအားပေးမည့် ဥပဒေကြမ်းတစ်ခုကို ထုတ်ဖော်ခဲ့သည်။ 

ဝန်ကြီးချုပ် ဂျက်စတင် ထရူးဒိုးက ၎င်းအွန်လိုင်းခြိမ်းခြောက်မှုဆိုင်ရာအက်ဥပဒေကို ဖေဖော်ဝါရီလ ၂၆ ရက် (တနင်္လာနေ့) က စတင်မိတ်ဆက်ခဲ့ပြီး ၎င်းဥပဒေသည် ရာဇဝတ်မှုနှုန်းမြင့်မားစေမည့်အန္တရာယ်ရှိသော အွန်လိုင်း အကြောင်းအရာ အမျိုးအစား ၇ မျိုးကို နည်းပညာကုမ္ပဏီများ တာဝန်ယူဖြေရှင်း နိုင်ရန်ရည်ရွယ်၍ ပြဋ္ဌာန်းလိုခြင်း ဖြစ်သည်။ ယင်းဥပဒေအရ အန္တရာယ်ဖြစ်စေမည့် အွန်လိုင်းရေးသားချက်များကို ၂၄ နာရီအတွင်း ဖယ်ရှားပစ်မည် ဖြစ်ပြီး ထိုအကြောင်းအရာများကို ဖြန့်ဝေသူများအား လူအခွင့်အရေးဆိုင်ရာခုံသမာဓိရုံးတွင် အမှုဖွင့်တိုင်ကြား နိုင်သည်။  

အန္တရာယ်ရှိသော အွန်လိုင်းအကြောင်းအရာ အမျိုးအစား ၇ မျိုးမှာ သဘောဆန္ဒမပါဘဲ ဆက်သွယ်ပြောဆိုမှုများ၊ အမုန်းပွားစေမည့် အကြောင်းအရာများ၊ အစွန်းရောက်သည့် အကြောင်းအရာများ၊ အကြမ်းဖက်မှုကို လှုံ့ဆော်သည့် အကြောင်းအရာများ၊ ကလေးသူငယ်များအား အနိုင်ကျင့်နှောင့်ယှက်သည့်အကြောင်းအရာများ၊ ကလေးသူငယ် များ ၎င်းတို့ကိုယ်တိုင်အန္တရာယ်ပြုစေမည့်အကြောင်းအရာများ ဖြစ်ပါသည်။ 

၎င်းဥပဒေအရ ဒီဂျစ်တယ်လုံခြုံရေးကော်မရှင်တစ်ခုကို ဖွဲ့စည်း တည်ထောင်သွားမည်ဖြစ်ပြီး ကလေးသူငယ်များကို ကာကွယ်ရန် မိဘအုပ်ထိန်းမှုနှင့် လုံခြုံသောရှာဖွေမှုကဲ့သို့ setting များ ပါဝင်သည့် နည်းပညာပလက်ဖောင်းများ ကိုလည်း ထည့်သွင်းအသုံးပြုသွားမည်ဖြစ်သည်။ 

အစိုးရ၏ထုတ်ပြန်ကြေညာချက်တွင် “ကနေဒါနိုင်ငံသားများ၏ လွတ်လပ်စွာထုတ်ဖော်ပြသခွင့် ကိုလေးစားသော် လည်း ၎င်းတို့၏ ဘဝလုံခြုံရေးအတွက် စိုးရိမ်ကြောင့်ကြကင်းသော အွန်လိုင်းစနစ်တစ်ခုကို အားလုံးရရှိခံစားစေ လိုခြင်းဖြစ်ကြောင်းနှင့် ယခုထုတ်ပြန်သောဥပဒေကြမ်းသည် ဆိုရှယ်မီဒီယာအသုံးပြုသူများနှင့် ကလေးသူငယ်များ လုံခြုံဘေးကင်းရေးအတွက် အရေးတကြီး လိုအပ်နေသောဥပဒေတစ်ခုဖြစ်ကြောင်း” ဖော်ပြပါရှိသည်။ 

၎င်းဥပဒေကြမ်းကို ကော်မတီတွင် ဦးစွာဆွေးနွေးမည်ဖြစ်ပြီး ထိုမှတစ်ဆင့် အထက်လွှတ်တော်၏ အကဲဖြတ် ဆန်းစစ်ခြင်းကို ဆောင် ရွက်ကာ နောက်ဆုံးမှ ဥပဒေအဖြစ်ပြဋ္ဌာန်းသွားမည်ဖြစ်သည်။ 

ထိုဥပဒေနှင့်ပတ်သက်၍ အစိုးရ၏အဆိုပြုချက်များကို ကွန်ဆာဗေးတစ်များက ဆန့်ကျင်ကြသည်။ ကွန်ဆာဗေး တစ်ပါတီခေါင်းဆောင် Pierre Poilievre က “ဝန်ကြီးချုပ်ထရူးဒိုးသည် အာဏာရှင်ဆန်ပြီး အစိုးရ၏ စီမံချက်များ သည် ကနေဒါနိုင်ငံသားများ၏ လွတ်လပ်စွာထုတ်ဖော်ပြသခွင့်ကို ထိပါးနှောင့်ယှက်နေကြောင်း” ပြီးခဲ့သီတင်းပတ် က စွပ်စွဲပြစ်တင်ခဲ့သည်။ 

ကနေဒါ၏ ထိုဥပဒေမူကြမ်းသည် ယူကေအွန်လိုင်းလုံခြုံရေးဥပဒေ၊ ဥရောပသမဂ္ဂ ဒီဂျစ်တယ် ဝန်ဆောင်မှု အက်ဥပဒေနှင့် အမေရိကန်နိုင်ငံ ဖလော်ရီနှင့်တက္ကဆက်ပြည်နယ်တို့တွင် ကျင့်သုံးသည့် အွန်လိုင်းဥပဒေများနှင့် ဆင်တူသည်။