သန့်ဇင် (NSS) - ဖေဖော်ဝါရီ ၂၇

ရှမ်းပြည်နယ်၊ နောင်ချိုမြို့နယ် ခရီးသည်တင်ကားတစ်စီး ဘရိတ်ပေါက်၍ တိမ်းမှောက်မှုဖြစ်ပွားခဲ့ရာ အမျိုးသမီး တစ်ဦးပွဲချင်းပြီးသေဆုံးသွားခဲ့ကြောင်း မေတ္တာရောင်ခြည်လူမှုကူညီရေးအသင်း-ကံကြီးထံမှ သိရသည်။

ယာဉ်တိမ်းမှောက်မှုသည် ယမန်နေ့ (ဖေဖော်ဝါရီ ၂၆ ရက်)၊ မွန်းလွဲ ၃ နာရီ ၁၃ မိနစ်အချိန်တွင် နောင်ချိုမြို့နယ်၊ နောင်ချို-ရပ်စောက် လမ်းမကြီး၊ ဒုဌဝတီ(၄)ထပ်ကွေ့၌ ဖြစ်ပွားခဲ့ခြင်းဖြစ်ကြောင်း သိရသည်။

“ရပ်စောက်ကနေ နောင်ချိုဘက်ကိုအတက်မှာမတက်နိုင်ဘဲနဲ့ ဘရိတ်ပေါက်ပြီး နောက်ပြန်လိမ့်ကျခဲ့တာ။ ကားက AD VAN ခရီးသည်တင်ကားပေါ့။ မိသားစုတွေ ပါတယ်” ဟု မေတ္တာရောင်ခြည်လူမှုကူညီရေးအသင်း-ကံကြီးမှ တာဝန်ရှိသူတစ်ဦးက NP News ကို ပြောသည်။

အဆိုပါယာဉ်တိမ်းမှောက်မှုကြောင့် AD VAN ကားပေါ်တွင်လိုက်ပါလာသည့် အသက်(၄၀)နှစ်အရွယ် အမျိုးသမီး တစ်ဦးမှာ နေရာတွင်ပွဲချင်းပြီး သေဆုံးသွားခဲ့ပြီး ကလေးငယ်တစ်ဦးမှာလည်း စိုးရိမ်ဖွယ်ထိခိုက်ဒဏ်ရာများ ရရှိခဲ့ ကြောင်း သိရသည်။

“ကားဆရာရောဆို လူ(၆)ယောက်ပါတယ်။ တစ်ယောက်ကတော့ ဆုံးသွားတယ်။ အမျိုးသမီးပါ။ မိသားစုတွေ လိုက်ပါတဲ့ကားဆိုတော့ ကလေးတွေလည်း ပါတယ်။ ကလေးတစ်ယောက်ကတော့ စိုးရိမ်ရတယ်” ဟု ၎င်းက ဆက်လက်ပြောသည်။

၎င်းယာဉ်တိမ်းမှောက်မှုဖြစ်စဉ်တွင် သေဆုံးသူအမျိုးသမီးနှင့် ထိခိုက်ဒဏ်ရာရရှိသူတို့အား မေတ္တာရောင်ခြည် လူမှုကူညီရေးအသင်း-ကံကြီးမှ နောင်ချိုမြို့နယ်ပြည်သူ့ဆေးရုံသို့ ပို့ဆောင်ကူညီပေးခဲ့ကြောင်း သိရသည်။

ယခုနှစ် ဇန်နဝါရီလမှစတင်ကာ ယနေ့အထိ အဆိုပါ ရပ်စောက်-နောင်ချိုကားလမ်းတွင် ယာဉ်တိမ်းမှောက်မှု (၃)ခုထက်မနည်းရှိခဲ့ကြောင်း အထက်ပါလူမှုကူညီရေးအသင်းထံမှ သိရသည်။