NSS - ဖေဖော်ဝါရီ ၂၆

စစ်ကိုင်းတိုင်းဒေသကြီး၊ ကလေးတက္ကသိုလ်အနီး၌ တိုက်ပွဲဖြစ်ပွားစဉ် တက္ကသိုလ်အတွင်း အဆောင်များတွင်နေထိုင်သည့် ဆရာ/ဆရာမများနှင့် ကျောင်းသား၊ ကျောင်းသူများကို PDF ပူးပေါင်းအဖွဲ့က ဝင်ရောက်ဖမ်းဆီးခေါ်ဆောင်မှုဖြစ်ပွားခဲ့ကြောင်း သတင်းရရှိသည်။

အဆိုပါ ကလေးတက္ကသိုလ်အနီးတွင် ဖေဖော်ဝါရီလ ၂၅ ရက် ညပိုင်းမှစတင်ကာ တပ်မတော် နှင့်  PDF ပူးပေါင်းအဖွဲ့အကြား အပြန်အလှန် ပစ်ခတ်မှု ဖြစ်ပွားခဲ့ကြောင်း သိရသည်။

ထိုသို့ ပစ်ခတ်မှု ဖြစ်ပွားနေစဉ် ကလေးတက္ကသိုလ်အတွင်းရှိ ဇလပ်နီအဆောင်အပါအဝင် ကျောင်းအတွင်းနေထိုင်သည့် ဆရာ/ဆရာမနှင့် ကျောင်းသား/ကျောင်းသူများကို PDF ပူးပေါင်းအဖွဲ့က ဖမ်းဆီးခေါ်ဆောင်သွားခဲ့ကြောင်း အဆိုပါတက္ကသိုလ်နှင့် နီးစပ်သည့် သတင်းအရင်းအမြစ်များက NSS ကိုပြောသည်။

“တိုက်ပွဲတွေက ကျောင်းနားပတ်ချာလည်မှာ ညထဲကဖြစ်နေတာ။ ဖြစ်နေတဲ့အချိန်မှာ တောထဲကနေ နောက်ပေါက်ကနေဝင်ပြီးတော့ ဆရာ၊ ဆရာမတွေ အဆောင်ပေါ့ တံခါးတွေလိုက်ခေါက်ပြီးတော့ သေနတ်တွေထောက်ပြီးခေါ်သွားတာပေါ့။ အပြင်ကိုခေါ်သွားတာ။ ကျောင်းကိုတော့ မသိမ်းဘူး။ လူတွေကိုခေါ်သွားတာ။ နည်းနည်းတော့များတယ်။ ပုန်းပြီးတော့ကျန်ခဲ့တဲ့သူတွေကတော့ လွတ်တာပေါ့။ ကျောင်းနဲ့နီးနီးလေးပဲ တစ်ဖက်မှာတော့ ချနေကြတဲ့အချိန် တစ်ဖွဲ့ကနေ တစ်ဖက်ကနေတောထဲကနေဝင်လာပြီးတော့ တံခါးတွေဖွင့်ပြီးဖမ်းခေါ်သွားတာ။ တိုက်ပွဲတွေက ညကတည်းကဖြစ်နေတယ်။ လက်ရှိလည်း ဖြစ်နေတယ်။ ပစ်နေကြတယ်”ဟု အထက်ပါသတင်းအရင်းအမြစ်က NSS ကို ပြောသည်။

PDF ပူးပေါင်းအဖွဲ့၏ ဖမ်းဆီးခေါ်ဆောင်ခြင်းခံရသည့် အရေအတွက်ကို လက်ရှိအချိန်အထိ မသိရသေးသော်လည်း ယနေ့(ဖေဖော်ဝါရီလ ၂၆ ရက်) နေ့လည်ပိုင်း၌ ဖမ်းဆီးခံရသူများအနက်မှ ဆရာ/ဆရာမနှင့် ကျောင်းသား/သူ ၂၃၂ ဦး ပြန်လည်လွတ်မြောက်လာသည်ကို တွေ့ရှိရကြောင်းလည်း ယင်းတက္ကသိုလ်ရှိ ဆရာ/ဆရာမများနှင့် နီးစပ်သည့် သတင်းအရင်းအမြစ်တစ်ဦးက NSS ထပ်မံပြောကြားသည်။

“ထိတွေ့ပစ်ခတ်မှုဖြစ်နေတယ်။ ပါချုပ်အပါအဝင် တော်တော်များများက တော့ ရှောင်ထွက်နိုင်ခဲ့တယ်။ နေ့လယ် (၁၂)နာရီထိကတော့ ပြန်တွေ့တဲ့သူ ဆရာ၊ ဆရာမ ကျောင်းသား/ကျောင်းသူဦးရေ (၂၃၂)ဦးရှိပါတယ်။ (၂၃၂)ဦး လုံးက လုံခြုံတဲ့နေရာမှာရှိနေတယ်။ ဒါပေမဲ့ အခုအချိန်အထိ တိုက်ခိုက်မှုတွေက မပြီးသေးပါဘူး။ အဆောင်နာမည်က ဇလပ်နီ။ လုံခြုံရေးလွတ်ကင်းနေတဲ့နေရာပေါ့နော်။ ကလေးတက္ကသိုလ်ထဲမှာက စစ်သားတွေရှိတယ်။ ဇလပ်နီကတော့ အစွန်လည်းဖြစ်မှာပေါ့နော်။ အဲဒီတော့ PDF ကဝင်ပြီးတော့ ဓားစားခံဖမ်းတာ”ဟု အဆိုပါ သတင်းအရင်းအမြစ်က ပြောသည်။

အလားတူ ပြီးခဲ့သည့် ၂၀၂၃ ခုနှစ်၊ နိုဝင်ဘာလကလည်း လွိုင်ကော်တက္က သိုလ်မှ တက္ကသိုလ်ပါမောက္ခချုပ် အပါအဝင် ဆရာ/ဆရာမ၊ ဝန်ထမ်းနှင့် ကျောင်းသား/ကျောင်းသူများကို KNPP နှင့် PDF များက ဖမ်းဆီးခေါ်ဆောင်မှုဖြစ်စဉ် ဖြစ်ပွားခဲ့ဖူးသည်။