သန့်ဇင် (NSS) - ဖေဖော်ဝါရီ ၂၁

ရန်ကုန်တိုင်း၊ ဒဂုံမြို့သစ်(တောင်ပိုင်း)မြို့နယ်တွင် လမ်းဘေးဆီဆိုင်မှတစ်ဆင့် မီးလောင်မှုဖြစ်ပွားခဲ့ရာမှ ကားတစ်စီးမီးလောင်ပျက်စီးပြီး လူတစ်ဦးထိခိုက်ဒဏ်ရာရရှိခဲ့ကြောင်း သီရိမင်္ဂလာပရဟိတလူမှုကူညီရေးအသင်းထံမှ သိရသည်။

မီးလောင်မှုသည် ယနေ့(ဖေဖော်ဝါရီ ၂၁ ရက်)၊ မွန်းလွဲ ၁၂ နာရီ ၄ဝ မိနစ်အချိန်တွင် ဒဂုံမြို့သစ်(တောင်ပိုင်း)မြို့နယ်၊ (၆၆)ရပ်ကွက်၊ ဧရာဝဏ်လမ်း၌ ဖြစ်ပွားခဲ့ခြင်းဖြစ်ကြောင်း သိရသည်။

“လမ်းဘေးဆီဆိုင်ကနေ စလောင်တာပါ။ အဲဒီဆီဆိုင်က ပေ(၂ဝ)လောက်ရှိတယ်။ တစ်ဆိုင်လုံးနဲ့ ဆိုင်နားမှာ ရပ်ထားတဲ့ကားတစ်စီးလုံး လောင်သွားတယ်” ဟု သီရိမင်္ဂလာပရဟိတလူမှုကူညီရေးအသင်းမှ တာဝန်ရှိသူတစ်ဦး က NP News ကို ပြောသည်။

အဆိုပါမီးလောင်မှုဖြစ်စဉ်တွင် Hyndai Porter II အမျိုးအစား ကားတစ်စီးနှင့် ပေ(၂ဝ)ဝန်းကျင်ရှိ လမ်းဘေးဆီဆိုင် တစ်ခုလုံး မီးလောင်ပျက်စီးသွားခဲ့ပြီး အသက်(၃၀)ကျော် အမျိုးသားတစ်ဦးသည်လည်း ထိခိုက်ဒဏ်ရာများရရှိခဲ့ ကြောင်း သိရသည်။

“အမျိုးသားတစ်ဦးလည်း မီးလောင်ဒဏ်ရာရတယ်။ ပေါင်တွေလောင်သွားတာ။ သူက မီးစလောင်တဲ့ ဆီဆိုင်က လူလို့ သိရတယ်။ ဆိုင်ထဲမှာရှိတဲ့ ဆီ ပီပါတွေလည်း မီးလောင်သွားတယ်” ဟု ၎င်းက ဆက်လက်ပြောသည်။

ထို့ကြောင့် ထိခိုက်ဒဏ်ရာရရှိသူအမျိုးသားကို သင်္ဃန်းကျွန်းမြို့နယ် စံပြဆေးရုံသို့ ပို့ဆောင်ပေးထားပြီး မီးလောင်မှု ဖြစ်စဉ်နှင့် ပျက်စီးဆုံးရှုံးမှုတန်ဖိုးအား မီးသတ်တပ်ဖွဲ့ဝင်များက စုံစမ်းစစ်ဆေးလျက်ရှိကြောင်း သိရသည်။