သန့်ဇင် (NSS) - ဖေဖော်ဝါရီ ၂ဝ

မန္တလေးတိုင်း၊ ပုသိမ်ကြီးမြို့နယ်တွင် ကချင်ပြည်နယ်ရှိ KTV၊ CLUB၊ BAR နှင့် စားသောက်ဆိုင်များတွင် ရောင်းချ ရန် သယ်ဆောင်လာသည့် ငွေကျပ် ၁ ဘီလျံကျော်တန်ဖိုးရှိ စိတ်ပြောင်းဆေးဝါး(Happy Water) များ ဖမ်းဆီးရမိခဲ့ ကြောင်း မြန်မာနိုင်ငံမူးယစ်ဆေးဝါး တားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

မူးယစ်ဆေးဝါးတားဆီးနှိမ်နင်းရေးတပ်ဖွဲ့က  ဖေဖော်ဝါရီလ ၁၂ ရက်၊ နံနက် ၉ နာရီခွဲအချိန်တွင် မန္တလေးတိုင်း၊ ပုသိမ်ကြီးမြို့နယ်၊ ကျောက်ချောကျေးရွာအနီး၌ စတင်ဖမ်းဆီးရမိခဲ့ခြင်း ဖြစ်ကြောင်း သိရသည်။

အဆိုပါကျေးရွာအနီးတွင် လားရှိုး-မန္တလေးပြေးဆွဲသည့် AD-VAN ခရီးသည်တင်ကားကို မူးယစ်ဆေးဝါးတားဆီး နှိမ်နင်းရေးတပ်ဖွဲ့နှင့် ပူးပေါင်းအဖွဲ့ဝင်များက စစ်ဆေးရှာဖွေခဲ့ရာ ကားပေါ်တွင် လူမပါဘဲ တင်ဆောင်လာသော စိတ်ပြောင်းဆေးဝါး (Happy Water) ၁၃ ဒသမ ၄၇ ကီလိုကို သိမ်းဆည်းရမိခဲ့ကြောင်း သိရသည်။

ထို့နောက် ဖေဖော်ဝါရီ ၁၄ ရက်၊ မွန်းလွဲ ၁ နာရီအချိန်တွင် မြစ်ကြီးနားမြို့၊ တပ်ကုန်းရပ်ကွက်၊ မြစ်ဖျားဧရာ အဝေးပြေးကားဝင်း၌ အထက်ပါဖမ်းဆီးရမိသည့် စိတ်ပြောင်းဆေးဝါးများကို လားရှိုးမှ မြစ်ကြီးနားသို့ သယ်ဆောင် ရောင်းဝယ်သည့် ပြည့်ဖြိုးအောင် (ခ)ဆိုင်လျန်းကို ဆိုင်ကယ်တစ်စီးနှင့်အတူ ဖမ်းဆီးရမိခဲ့သည်။

ထို့ပြင် ယင်းနေ့တွင် မြစ်ကြီးနားမြို့၊ မြို့သစ်ရပ်ကွက်၌ အထက်ပါ ဖမ်းဆီးရမိသူ ပြည့်ဖြိုးအောင်(ခ) ဆိုင်လျန်းနှင့် အတူ မူးယစ်ဆေးဝါးများ သယ်ဆောင်ရောင်းဝယ်ရာတွင် ပူးပေါင်းပါဝင်သူ ဇာနည်မျိုးခိုင်(ခ)ဇာနည်ကို စိတ်ပြောင်း ဆေးဝါး (Happy Water) ၂၁ဝ ဂရမ်၊ LEXUS ကားတစ်စီးနှင့်အတူ ထပ်မံဖမ်းဆီးရမိခဲ့ကြောင်း သိရသည်။

အဆိုပါဖမ်းဆီးရမိခဲ့သည် စိတ်ပြောင်းဆေးဝါးများကို ရှမ်းပြည်နယ်မှ မန္တလေးသို့ သယ်ဆောင်ကာ ယင်းမှတစ်ဆင့် ကချင်ပြည်နယ်သို့ လူမဲ့တန်ဆာဖြင့် ဆက်လက်သယ်ဆောင်၍ KTV/ CLUB/ BAR နှင့် စားသောက်ဆိုင်များတွင် ရောင်းချခြင်းများပြုလုပ်မည်ဖြစ်ကြောင်းသိရှိရသည်။

ထို့ကြောင့် ၎င်းတို့ထံမှ စုစုပေါင်းငွေကျပ် ၁ ဒသမ ၆၄ ဘီလျံတန်ဖိုးရှိ စိတ်ပြောင်းဆေးဝါး(Happy Water) ၁၃ ဒသမ ၆၈ ကီလို သိမ်းဆည်းရမိခဲ့သဖြင့် မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အမှုဖွင့်အရေးယူထားပြီး ကွင်းဆက်များအား စုံစမ်းစစ်ဆေးလျက်ရှိကြောင်း သိရသည်။