သန့်ဇင်(NSS) - ဖေဖော်ဝါရီ ၁၅

ပရိသတ်မြင်ကွင်းရှေ့မှ ပျောက်ကွယ်နေသော နာမည်ကျော်မြန်မာ့လက်ရွေးစင်ကစားသမားဟောင်း ကြည်လင်းသည် ရခိုင်ယူနိုက်တက် အသင်းသို့ အံ့အားသင့်ဖွယ်ရောက်ရှိလာခဲ့ကြောင်း သိရသည်။

ရခိုင်ယူနိုက်တက်အသင်းသည် ပြီးခဲ့သည့် ရက်ပိုင်းအတွင်းက လက်ရွေးစင်ကစားသမားဟောင်းဖြစ်သည့် ကျော်ကိုကို ကိုခေါ်ယူခဲ့ပြီးနောက်  ယနေ့ (ဖေဖော်ဝါရီလ ၁၅ ရက်)တွင် ကြည်လင်းနှင့်စာချုပ်ချုပ်ဆိုနိုင်ခဲ့ပြီဖြစ် ကြောင်း ကြေညာခဲ့ရာ ကျော်ကိုကို-ကြည်လင်းအတွဲကို မြန်မာနေရှင်နယ်လိဂ်ပွဲစဉ်များတွင် ပြန်လည်မြင်တွေ့ရမည်ဖြစ်သည်။

လက်ရှိတွင် အသက်(၃၂)နှစ်ရှိပြီဖြစ်သည့် လက်ရွေးစင်ကစားသမားဟောင်းကြည်လင်းသည် ပြီးခဲ့သည့် ၂၀၂၀ ခုနှစ်တွင် ရန်ကုန်ယူနိုက်တက်အသင်းတွင်နောက်ဆုံးကစားခဲ့ပြီးနောက် ဒဏ်ရာပြသနာများကြောင့် ဘောလုံးလောကမှ အနားယူသွားခဲ့ကာ ယခုတစ်ဖန် ပြန်လည်ဝင်ရောက်လာခဲ့ခြင်း ဖြစ်သည်။

လက်ရွေးစင်ကစားသမားဟောင်း ကြည်လင်းသည် မြန်မာ့လက်ရွေးစင်အသင်းနှင့် ရန်ကုန်ယူနိုက်တက်အသင်းတို့၌ အလယ်တန်းတွင် ကစားခဲ့သူဖြစ်ကာ "Goal.com Reader's Choice Of The Years 2012" Asia Bast XI ဆုရရှိထားသူဖြစ်ကြောင်း သိရသည်။

အလားတူ ယနေ့တွင် မြန်မာ့လက်ရွေးစင်ကစားသမား ကောင်းစည်သူ သည်လည်း ရခိုင်ယူနိုက်တက် အသင်းနှင့်တစ်နှစ်စာချုပ်ခဲ့သည်။ ရခိုင်ယူနိုက်တက်အသင်းအနေဖြင့် ကစားသမား နှင့် နည်းပြအပြောင်းအလဲများစွာ ပြုလုပ်ပြီး ရလဒ်ကောင်းများရရှိရန် ကြိုးပမ်းနေလျက်ရှိသည်ကို တွေ့ရသည်။