NSS - ဖေဖော်ဝါရီ ၁၁

ရန်ကုန်မြို့တွင်းပြေးဆွဲနေသော YBS ခရီးသည်တင်ယာဉ်များ ညအိပ်ရပ်နားနိုင်ရန် ယာဉ်ရပ်ကွင်း ၁၅ ကွင်းကို ယခု ၂၀၂၄ ခုနှစ်အတွင်းမှာ အပြီးတည်ဆောက်သွားမည်ဟု ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) မှ သိရသည်။

YBS ယာဉ် ညအိပ်ရပ်နားကွင်းများကို ၂ဝ၂၃ ခုနှစ်က စတင်ကာ မြို့နယ် ၈ ခုမှာ ဖော်ဆောင်ခဲ့တာဖြစ်ပြီး  လက်ရှိ တွင် ကျန်ရှိနေသေးသော ဒဂုံတောင်မြို့နယ်ရှိအိုးအိမ်ဦးစီးဌာနမှ ခွင့်ပြုချပေးထားသည့် သုခဒဂုံအိမ်ရာဝင်းရှိ  ၅ ဧကအကျယ်ရှိသည့် မြေပေါ်တွင် ဆောက်လုပ်နေကြောင်း YRTC ထံမှ သိရသည်။

"အဓိကအားဖြင့် YBS ယာဉ်တွေ လုံခြုံမှုရှိစေဖို့ ကုန်ခဲ့တဲ့ ၂၀၂၃ ခုနှစ်မှာ စတင်အကောင်အထည်ဖော်နေတာ ဖြစ်ပါတယ်။ ယာဉ်ရပ်ကွင်း ၁၅ ကွင်း ရှိပါတယ်။ ဒါတွေကို ယခုနှစ်ထဲမှာ အပြီးတည်ဆောက်ပြီး အားလုံးပြီးစီးသွားရင်တော့ YBS ယာဉ်အားလုံးရဲ့ဂိတ်စအဖြစ် ပြောင်းလဲပေးသွားမှာဖြစ်ပါတယ်" လို့ YRTC ၏ တာဝန်ရှိသူတစ်ဦးမှ ပြောသည်။ 

အဆိုပါ ယာဉ်ရပ်နားကွင်းများကိုဒဂုံမြို့သစ်(ဆိပ်ကမ်း)၊ ဒဂုံမြို့သစ်(တောင်ပိုင်း)၊ သာကေတ၊ မြောက်ဥက္ကလာ၊ ရွှေပေါက်ကံမြို့သစ်၊ မင်္ဂလာဒုံ၊ ထောက်ကြန့် နဲ့ လှိုင်သာယာမြို့နယ်များတွင် တည်ဆောက်နေခြင်းဖြစ်သည်။ 

YBS ကားများ ညအိပ်ရပ်နားချိန် နှင့် မြို့နယ်အလိုက်ပြေးဆွဲနေသောဂိတ်ရင်း၊ ဂိတ်ဖျားများရှိ လမ်းပေါ်မှာ ညအိပ် ရပ်နားရချိန်များတွင် ကားပစ္စည်းဖြုတ်ခိုးခံရမှုများ၊ လမ်းပိတ်မှုများ ရှိလာသည့်အတွက် YBS ယာဉ်တွေ ရပ်နားရန် ကားကွင်း တည်ဆောက်ခြင်းဖြစ်ကြောင်း ရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီထံမှ သိရသည်။