Pika (NSS) - ဖေဖော်ဝါရီ ၃

ဆိုမာလီယာနိုင်ငံ ကမ်းလွန်ပင်လယ်ပြင်တွင် ဆိုမာလီပင်လယ်ဓါးပြများ ပြန်ပေးဆွဲထားသော ငါးဖမ်းသင်္ဘောပေါ်မှ သင်္ဘောသား(၁၉)ဦးကို အောင်မြင်စွာကယ်ဆယ်နိုင်ခဲ့ကြောင်း အိန္ဒိယရေတပ်က ဖေဖော်ဝါရီလ(၂)ရက်တွင် ထုတ်ပြန်ပြောကြားခဲ့သည်။

အိန္ဒိယရေတပ်သည် အီရန်အလံလွှင့်တင်ထားသော FV Omari ငါးဖမ်းသင်္ဘောပေါ်မှ ဖုန်းခေါ်ဆိုမှုကို ဇန်နဝါရီလ(၃၁)ရက်က ရရှိခဲ့ခြင်းဖြစ်ပြီး အိန္ဒိယ ရေတပ်ကင်းလှည့်သင်္ဘော INS Sharda သည် ဖေဖော်ဝါရီလ(၂)ရက်အစောပိုင်းတွင် FV Omari ငါးဖမ်းသင်္ဘောကို ကြားဖြတ်ဟန့်တားမှုများလုပ်ဆောင်ခဲ့ပြီး ယခုကဲ့သို့ကယ်ဆယ်နိုင်ခဲ့ခြင်းဖြစ်ကြောင်း ထုတ်ပြန်ချက်တွင်ရေးသားဖော်ပြထားသည်။ ထုတ်ပြန်ချက်တွင်"အဲဒီငါးဖမ်းသင်္ဘောနဲ့အတူ သင်္ဘောသားတွေကို ဆိုမာလီပင်လယ်ဓါးပြတွေ လက်ကနေ အောင်မြင်စွာကယ်ဆယ်နိုင်ခဲ့ပါတယ်။ ဆိုမာလီပင်လယ်ဓါးပြတွေ ဖမ်းဆီးခြင်းကို ခံခဲ့ရတဲ့ သင်္ဘောသားတွေရဲ့ ကျန်းမာရေးကိုလည်း စစ်ဆေးမှုတွေလုပ်ဆောင်ပေးခဲ့ပါတယ်"ဟု ရေးသားထားသည်။

အဆိုပါငါးဖမ်းသင်္ဘောပေါ်တွင် အီရန်နိုင်ငံသား(၁၁)ဦးနှင့် ပါကစ္စတန်နိုင်ငံသား(၈)ဦးတို့ လိုက်ပါလာခဲ့ခြင်းဖြစ်ကြောင်း ထုတ်ပြန်ချက်တွင်ရေးသားဖော်ပြထားသည်။ အိန္ဒိရေတပ်မှ ထုတ်ပြန်ထားသော ဓါတ်ပုံများတွင် ရေတပ်ကွန်မန်ဒိုများသည် အီရန်အလံလွှင့်တင်ထားသော ငါးဖမ်းသင်္ဘောပေါ်ကို တက်နေကြသည်ကိုလည်း တွေ့မြင်ခဲ့ရသည်။ အခြားဓါတ်ပုံတစ်ပုံတွင် ပြန်ပေးဆွဲမှုများလုပ်ဆောင်ခဲ့သော ဆိုမာလီပင်လယ်ဓါးပြများက လက်နက်ချ အညံ့ခံသည့်အနေဖြင့် လက်မြှောက်ထားသည်ကိုလည်း တွေ့မြင်ခဲ့ရသည်။ FV Omari ငါးဖမ်းသင်္ဘောကို ဆိုမာလီပင်လယ်ဓါးပြ(၇)ဦးက ပြန်ပေးဆွဲခဲ့ခြင်းဖြစ်ကြောင်း ထုတ်ပြန်ချက်တွင်ရေးသားဖော်ပြထားသော်လည်း ၎င်းတို့ကို ဖမ်းဆီးခဲ့ခြင်းရှိ/မရှိဆိုသည့် အသေးစိတ်အချက်အလက်များကို ဖော်ပြထားခြင်းမျိုးမရှိကြောင်းလည်းသိရသည်။

အဆိုပါဖြစ်ရပ်သည် ပြီးခဲ့သည့်သီတင်းပတ်များအတွင်း ဆိုမာလီပင်လယ်ဓါးပြများ ပြန်ပေးဆွဲထားသည့် ငါးဖမ်းသင်္ဘောများပေါ်မှ သင်္ဘောသားများကို အိန္ဒိယရေတပ်က အောင်မြင်စွာကယ်ဆယ်နိုင်ခဲ့သည့် တတိအကြိမ်မြောက်ကယ်ဆယ်မှုတစ်ခုဖြစ်ကြောင်းလည်းသိရသည်။