Htay Oung (NSS) - ဖေဖော်ဝါရီ ၂ 

ကြာသပတေးနေ့ ညနေပိုင်း မလေးရှားနိုင်ငံ ကွာလမ်လမ်ပူမြို့ မြောက်ဘက် မိုင် ၈ဝ ခန့်အကွာ ဘီဒိုး ထိန်းသိမ်း ရေးစခန်းမှ အထောက်အထားမဲ့မြန်မာရွှေ့ပြောင်းနေထိုင်သူ ၁ဝဝ ကျော် ထွက်ပြေးလွတ်မြောက်သွားခဲ့ပြီး အဲဒီ အထဲက တစ်ဦးမှာ လမ်းဖြတ်ကူးစဉ် မတော်တဆဖြစ်မှုကြောင့် သေဆုံးသွားတယ်လို့ ရိုက်တာသတင်းအေဂျင်စီက ဖေဖော်ဝါရီလ ၂ ရက်မှာ ရေးသားခဲ့ပါတယ်။

အဲဒီဖြစ်ရပ်ဟာ နှစ်ပေါင်းများစွာအတွင်း မလေးရှားနိုင်ငံ ထိန်းသိမ်းရေးစခန်းတစ်ခုမှ  ဒုတိယမြောက် ဖောက်ထွင်း ထွက်ပြေးမှုဖြစ်ကြောင်း သိရှိရပါတယ်။ ၂ဝ၂၂ ခုနှစ် ဧပြီလတုန်း မြန်မာနိုင်ငံမှ ဘင်္ဂါလီဒုက္ခသည် ၅၈၂ ဦး တို့ဟာ ကီဒါးပြည်နယ်မြောက်ပိုင်း လူဝင်မှုကြီးကြပ်ရေးဌာနမှ ထွက်ပြေးလွတ်မြောက်သွားခဲ့ဖူးပါတယ်။ အဲဒီတုန်းကလည်း ရွှေ့ပြောင်းနေထိုင်သူများအနက် ခြောက်ဦးတို့ဟာ အဝေးပြေးလမ်းမကြီးပေါ်မှာ ယာဉ်တိုက်ခံရပြီး သေဆုံးခဲ့ရပါတယ်။

ကြာသပတေးနေ့ ညနေ မလေးရှားနိုင်ငံ အနောက်ပိုင်း ပီရတ်ပြည်နယ် ဘီဒိုးလူဝင်မှုကြီးကြပ်ရေး ထိန်းသိမ်း ရေးစခန်းမှ ထွက်ပြေးလွတ်မြောက်သွားတဲ့ရွှေ့ပြောင်းနေထိုင်သူ စုစုပေါင်း ၁၃၁ ဦးရှိတယ်လို့ သက်ဆိုင်ရာက သောကြာနေ့မှာ သတင်းထုတ်ပြန်ခဲ့ပါတယ်။

အထောက်အထားမဲ့ ရွှေ့ပြောင်းနေထိုင်သူများအနက် တစ်ဦးမှာ လမ်းမတော်တဆမှုကြောင့် သေဆုံးသွားကြောင်း၊ ကျန်လွတ်မြောက်နေသူများကို ရှာဖွေရေးအတွက် ဆက်လက်လုပ်ဆောင်နေတယ်လို့ ထုတ်ပြန်ချက်မှာ ဖော်ပြ ထားပါတယ်။

ရွှေ့ပြောင်းနေထိုင်သူများမှာ လူကုန်ကူးစခန်းမှ ထွက်ပြေးလွတ်မြောက်လာသူ ဘင်္ဂါလီဒုက္ခသည် ၁၁၅ ဦးနဲ့ အခြားတိုင်းရင်းသား မြန်မာနိုင်ငံသား ၁၆ ဦးတို့ ပါဝင်ကြောင်း၊ သေဆုံးသွားသူဟာ အဝေးပြေးလမ်းမကြီးပေါ်မှာ ယာဉ်တိုက်ခံရခြင်းကြောင့်ဖြစ်တယ်လို့ ပါရတ်ရဲတပ်ဖွဲ့၏ ထုတ်ပြန်ချက်ကို ကိုးကားပြီး နိုင်ငံပိုင် ဘာနာမာ သတင်းဌာနက ရေးသားပါတယ်။

ဒုက္ခသည်အဆင့်အတန်းကို အသိအမှတ်မပြုတဲ့ မလေးရှားနိုင်ငံဟာ မြန်မာနိုင်ငံမှာ ဖိနှိပ်ခံရမှုများ (သို့မဟုတ်) ဘင်္ဂလားဒေ့ရှ်နိုင်ငံ ဒုက္ခသည်စခန်းများမှ ထွက်ပြေးလာတဲ့ ရိုဟင်ဂျာဆိုသူများအတွက် နှစ်သက်ဖွယ် ခရီးပန်းတိုင်တစ်ခု မဟုတ်ခဲ့တာ အတော်ကြာပြီဖြစ်ပါတယ်။

#ရိုဟင်ဂျာလူမျိုးဆိုသူ #အထောက်အထားမဲ့_မြန်မာရွှေ့ပြောင်းလုပ်သား #ကီဒါးမြို့ #ဘီဒိုးမြို့

(Reuters., 2 Fabruary 2024,” More than 100 Myanmar migrants flee Malaysian detention centre, one dead” #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)