ဂျန်ဇက် (NSS) - ဇန်နဝါရီ ၂၈ 

အီရန် နဲ့ ပါကစ္စတန်နိုင်ငံနယ်စပ်ဒေသမှာ ဇန်နဝါရီ ၂၇ ရက်က ပစ်ခတ်မှုဖြစ်ပွားခဲ့ပြီးနောက် အီရန်နိုင်ငံသား မဟုတ်တဲ့ နိုင်ငံခြားသား ၉ ဦး သေဆုံးခဲ့ကြောင်း သိရပါတယ်။ အီရန် နဲ့ ပါကစ္စတန်နိုင်ငံကြား အပြန်အလှန် ပစ်ခတ်မှုဖြစ်ပွားခဲ့ပြီးနောက် သီတင်းပတ်တစ်ပတ်အကြာမှာ နယ်စပ်ဒေသမှာ ပစ်ခတ်မှုထပ်မံဖြစ်ပွားခဲ့တာပါ။ 

"မျက်မြင်တွေ့ရှိသူတွေကတော့ ပြောဆိုကြတယ်။ အမည်မသိသေနတ်သမားအုပ်စုတွေဟာ Sirkan အရပ်ဒေသရှိ အိမ်မှာ အီရန်နိုင်ငံသားမဟုတ်တဲ့ နိုင်ငံခြားသား ၉ ဦးကို ပစ်သတ်ခဲ့တယ်လို့ ပြောကြတယ်။ အဲဒီတိုက်ခိုက်မှုနဲ့ ပတ်သက်ပြီး ဝန်ခံပြောဆိုထားတဲ့ အဖွဲ့အစည်းမရှိသေးဘူး" လို့ အီရန်အခြေစိုက်သတင်းဌာနက ပြောပါတယ်။

အဆိုပါပစ်ခတ်မှုဖြစ်ပွားခဲ့တဲ့နေရာဟာ အီရန် နဲ့ ပါကစ္စတန်နိုင်ငံနယ်စပ်ဒေသဖြစ်တဲ့ ဆစ်တန်-ဘလူချီစတန် ဒေသနားရှိ အိမ်ဖြစ်ကြောင်း၊ အဆိုပါ ဆစ်တန်-ဘလူချီစတန်ဒေသမှာ ဆွန်တီ မွတ်စလင်အများစုနေထိုင်နေတဲ့ ဒေသဖြစ်ကြောင်း သိရပါတယ်။

အီရန်နိုင်ငံဟာ ဇန်နဝါရီ ၁၆ ရက်က ပါကစ္စတန်နိုင်ငံအတွင်းရှိ အီရန်ဆန့်ကျင်ရေးအုပ်စုတွေကို တိုက်ခိုက်ခဲ့ပြီး ပါကစ္စတန်ကလည်း  ဇန်နဝါရီ ၁၈ ရက်မှာ အီရန်နိုင်ငံအတွင်းရှိ ပါကစ္စတန်ဆန့်ကျင်ရေးလက်နက်ကိုင်အုပ်စုတွေကို ပစ်မှတ်ထားတိုက်ခိုက်ခဲ့ကြောင်း သိရပါတယ်။

အီရန်စစ်တပ်က ၎င်းတို့ဟာ အစွန်းရောက်လက်နက်ကိုင်အဖွဲ့အစည်းဖြစ်တဲ့ Jaish al-Adl အဖွဲ့ကို တိုက်ခိုက်ခဲ့ခြင်း ဖြစ်ကြောင်း သတင်းထုတ်ပြန်ထားပြီး၊ အီရန်က အဲဒီလက်နက်ကိုင်အဖွဲ့အစည်းကို အကြမ်းဖက်အဖွဲ့အစည်းအဖြစ် ၂ဝ၁၂ ခုနှစ်မှာ သတ်မှတ်ခဲ့ဖူးပါတယ်။ အစ္စရေး နဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲနဲ့ ဆက်နွယ်ပြီး အရှေ့အလယ်ပိုင်းဒေသအတွင်း တင်းမာမှုတွေရှိနေချိန်မှာ အီရန် နဲ့ ပါကစ္စတန်နိုင်ငံကြား အပြန်အလှန်တိုက်ခိုက်မှုတွေဖြစ်လာခဲ့တာဖြစ်ပါတယ်။