Pika (NSS) - ဇန်နဝါရီ ၂၇

ယီမင်အခြေစိုက် ဟူသီလက်နက်ကိုင်အဖွဲ့သည် အေဒင်ပင်လယ်ကွေ့တွင် ဗြိတိန်ရေနံတင်သင်္ဘောကို တိုက်ခိုက်မှုများလုပ်ဆောင်ခဲ့ပြီးနောက် အမေရိကန်တပ်ဖွဲ့များ သည် ဇန်နဝါရီလ(၂၇)ရက် အစောပိုင်းတွင် ဟူသီလက် နက်ကိုင်အဖွဲ့၏ ပစ်လွှတ်ရန်အသင့်ပြင်ထားသော သင်္ဘောဖျက်ဒုံးကျည်များကို တိုက်ခိုက်မှုများလုပ်ဆောင်ကာ ဖျက်ဆီးပစ်ခဲ့ကြောင်းသိရသည်။

ပင်လယ်နီအတွင်းသွားလာနေသော သင်္ဘောများကို ပစ်မှတ်ထားတိုက်ခိုက်မှုများလုပ်ဆောင်နေသည့် ဟူသီလက်နက်ကိုင်အဖွဲ့၏ တိုက်ခိုက်ရေးစွမ်းရည်များကို လျော့ကျစေရန်အတွက် အမေရိကန်နှင့်ဗြိတိန်တပ်ဖွဲ့တို့သည် ပူးတွဲတိုက်ခိုက်မှုများကို မကြာသေးမီက ထပ်မံလုပ်ဆောင်ခဲ့ကြောင်းသိရသည်။ အစ္စရေး-ဟားမက်စစ်ပွဲ စတင်ဖြစ်ပွားပြီးနောက် ဂါဇာကမ်းမြောင်ဒေသရှိ ပါလက်စတိုင်းလူမျိုးများကိုထောက်ခံသည့်အနေဖြင့် ကုန်တင်သင်္ဘောများကို ပစ်မှတ်ထားတိုက်ခိုက်နေခြင်းဖြစ်ကြောင်း ဟူသီလက်နက်ကိုင်အဖွဲ့ကပြောဆိုခဲ့သည်။အမေရိကန်တပ်ဖွဲ့များသည် ဟူသီလက်နက်ကိုင်အဖွဲ့၏ ပစ်မှတ်များကို လေကြောင်းမှတိုက်ခိုက်မှုများအား ဆက် တိုက်လုပ်ဆောင်ခဲ့သော်လည်း ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများအား ဆက်လက်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ကတိပြုခဲ့သည်။

အမေရိကန်တပ်ဖွဲ့များသည် ဇန်နဝါရီလ(၂၇)ရက်အစောပိုင်းတွင် ပင်လယ်နီအတွင်းရှိ သင်္ဘောများကို ပစ်မှတ်ထားတိုက်ခိုက်ရန်အတွက် ပြင်ဆင်ထားသော ဟူသီလက်နက်ကိုင်အဖွဲ့၏ သင်္ဘောဖျက်ဒုံးကျည်များကို တိုက်ခိုက်ဖျက်ဆီးခဲ့ကြောင်း အမေရိကန်ဗဟိုကွပ်ကဲမှုဌာနချုပ်(CENTCOM)က ပြောကြားခဲ့သည်။

CENTCOM က "အမေရိကန်တပ်ဖွဲ့တွေဟာ မိမိကိုယ်ကိုကာကွယ်မှုအဖြစ် ဟူသီလက်နက်ကိုင်အဖွဲ့ရဲ့ သင်္ဘောဖျက်ဒုံးကျည်တွေကို တိုက်ခိုက်ဖျက်ဆီးခဲ့ပါတယ်"ဟုပြောဆိုခဲ့သည်။

ဟူသီလက်နက်ကိုင်အဖွဲ့က ဇန်နဝါရီလ(၂၆)ရက် ညနေပိုင်းတွင် ပစ်လွှတ်လိုက်သော ဒုံးကျည်များသည် ဗြိတိန်ရေနံတင်သင်္ဘော Marlin Luanda ကို ထိမှန်ခဲ့ကြောင်း ဟူသီလက်နက်ကိုင်အဖွဲ့ပြောရေးဆိုခွင့်ရှိသူ Yahya Saree က ပြောကြားခဲ့သည်။ ၎င်းက "ကျွန်တော်တို့တပ်ဖွဲ့ဝင်တွေ ပစ်လွှတ်လိုက်တဲ့ ဒုံးကျည်တွေဟာ ဗြိတိန်ရေနံတင်သင်္ဘောကို ထိမှန်ခဲ့ပြီး မီးလောင်ကျွမ်းမှုတွေဖြစ်စေခဲ့ပါတယ်"ဟု ပြောဆိုခဲ့သည်။