ယွန်း (NSS) - ဇူလိုင် ၂၆

ပြည်သူများ၏ လိုအပ်ချက်ပေါ်မူတည်၍ နေပြည်တော်နှင့် မန္တလေးမြို့တို့၌ သက်သာသောဈေးနှုန်းများဖြင့်ရောင်းချသည့် ဆေးအရောင်းပြခန်းများ ထပ်မံဖွင့်လှစ်သွားမည်ဖြစ်ကြောင်း မြန်မာနိုင်ငံဆေးနှင့် ဆေးပစ္စည်းလုပ်ငန်းရှင်များအသင်းထံမှ သိရသည်။

မြန်မာနိုင်ငံဆေးနှင့် ဆေးပစ္စည်းလုပ်ငန်းရှင်များအသင်းမှ ပြည်သူများ သင့်တင့်မျှတသောဈေးနှုန်းများဖြင့် ဆေးဝါးများသုံးစွဲနိုင်‌ရေးအတွက် ပြီးခဲ့သည့် ဇူလိုင်လ(၁၇)ရက်မှစ၍ ရန်ကုန်မြို့၊ ကုန်သည်လမ်းနှင့် လမ်း(၃၀) ထောင့်ရှိ “မြန်မာကုန်သွယ်မှုမြှင့်တင်ရေးဌာန အဆောက်အဦး”တွင် အရောင်းပြခန်းဖွင့်လှစ်ကာ ဆေးဝါးများရောင်းချပေးခဲ့ခြင်းဖြစ်သည်။

ထို့ပြင် အရောင်းပြခန်းများကို ထပ်မံတိုးချဲ့သွားမည်ဖြစ်ပြီး ပဲခူးမြို့ရှိ သီရိဥဿဈေးကြီး အပေါ်ထပ်၊ ပဲခူးတိုင်းဒေသကြီး ထုတ်ကုန်များ အ‌ရောင်းစင်တာ နှင့် ရန်ကုန်မြို့တွင် အရောင်းပြခန်း(၂)အဖြစ် ကမ္ဘာအေးဘုရားလမ်း၊ နဝဒေးရုပ်ရှင်ရုံအတွင်းရှိ မြန်မာ့ရုပ်ရှင်မြှင့်တင်ရေးဦးစီးဌာန အဆောက်အအုံတွင် ယခင်ရောင်းချပေးနေသည့် အစီအစဉ်အတိုင်း ရောင်းချပေးသွားမည်ဖြစ်သည်။

“အရောင်းပြခန်း(၁)မှာ ဈေးသက်သက်သာသာနဲ့ရတော့ ပြည်သူတွေဝယ်ကြတယ်။ ကျေနပ်ကြတယ်။ အဆင်ပြေကြတယ်။ အခက်အခဲက တစ်နေရာထဲရှိတဲ့အခါကြတော့ လာဝယ်တဲ့သူတွေက လှည်းကူးတို့၊ တညင်တို့ အဝေးကြီးကနေလာကြတာ။ လာရတာလည်းအခက်အခဲရှိမှာဆိုးလို့ အဆင်ပြေတဲ့နေရာတွေမှာ ထပ်ဖွင့်တာပါ။ အရောင်းပြခန်း(၁)ကလည်း ရောင်းနေတုန်းပဲ”ဟု မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်းမှ တာဝန်ရှိသူတစ်ဦးက NSS ကို ပြောသည်။

အဆိုပါ‌အရောင်းပြခန်းများကို လာမည့် ဇူလိုင်လ(၂၉)ရက်နေ့မှ သြဂုတ်လ (၃)ရက်နေ့အထိ ဖွင့်လှစ်ရောင်းချရန် စီစဥ်ထားသော်လည်း ပြည်သူများ၏ လာရောက်ဝယ်ယူမှုပေါ်မူတည်၍ ဆေးရောင်းချသည့် ရက်ကိုထပ်တိုးသွားမည်ဖြစ်ကြောင်း သိရသည်။ ထို့ပြင် ပြည်သူများ၏ လိုအပ်ချက်ပေါ်မူတည်၍ ဆေးအရောင်းပြခန်းများကို ထပ်မံတိုးချဲ့ဖွင့်လှစ်သွားမည်ဖြစ်ပြီး နေပြည်တော် အပါအဝင် မြို့ကြီးများတွင်လည်း ဖွင့်လှစ်နိုင်ရန် စီစဥ်နေကြောင်း သိရသည်။

“အခုလောလောဆယ်တော့ တကယ်ကိုလိုအပ်တဲ့သူတွေလာဝယ်ကြတယ်။ ကျွန်တော်တို့ကလည်း လက်လီပဲရောင်းတယ်။ ပြန်ရောင်းမယ့်သူတွေကို ရောင်းချတာမျိုးမဟုတ်ဘူး။ တကယ်ကိုဆေးလိုအပ်နေတဲ့သူတွေက သူတို့အတွက် တစ်လစာ၊ နှစ်လစာ၊ တစ်ပတ်စာ လာဝယ်ကြတယ်။ အရောင်းပြခန်း(၂)မှာတော့ ဆေးကုမ္ပဏီ(၄၀)ဝန်းကျင်လောက်က ရောင်းသွားမှာပေါ့။ ပြည်သူတွေရဲ့ လိုအပ်ချက်ပေါ်မူတည်ပြီးတော့ လိုအပ်ရင်လိုသလို ထပ်မံတိုးချဲ့ဖွင့်လှစ်သွားဖို့ရှိပါတယ်။ နေပြည်တော်တို့၊ မန္တလေးတို့အပြင် ရန်ကုန်မှာလည်း အရောင်းပြခန်းတွေထပ်ပြီး ရှိကောင်းရှိလာနိုင်ပါသေးတယ်”ဟု အထက်ပါ တာဝန်ရှိသူက ပြောသည်။

လက်ရှိရောင်းချပေးနေသည့် အရောင်းပြခန်း(၁)တွင် အခြေခံအိမ်သုံးဆေးများအပြင်  ဆီးချို၊ နှလုံး၊ သွေးတိုး၊ ပိုးသတ်ဆေးဝါးများကိုပါရောင်းချပေးနေပြီး ဆေးကုမ္ပဏီ(၁၀၀)ကျော်မှ အလှည့်ကျရောင်းချပေးနေခြင်းဖြစ်ကြောင်း သိရသည်။ ယခုနောက်ပိုင်းကာလတွင် ဈေးကွက်အတွင်း၌ ဆေးဝါးပြတ်လပ်မှုများနှင့် ဆေးဈေးနှုန်းကြီးမြင့်မှုများဖြစ်ပေါ်နေရာ ရောဂါကြောင့်ဆေးကို စွဲသောက်နေရသော နာတာရှည်လူမမာများအနေဖြင့် ဆေးဝါးပြတ်လပ်မှုကြောင့် အခက်အခဲများနှင့် ကြုံတွေ့နေရကြောင်း သိရသည်။

သို့သော် လက်ရှိတွင် ပြည်ပမှဆေးဝါးတင်သွင်းခွင့်အတွက် သွင်းကုန်လိုင် စင်များ ချပေးထားပြီဖြစ်သောကြောင့် လာမည့် သြဂုတ်လမှစ၍ ပြည် တွင်း၌ ဆေးဝါးပြတ်လပ်မှုများ လျော့ကျသွားနိုင်ကြောင်း သုံးသပ်မှုများလည်းရှိနေသည်။