ဂျန်ဇက် (NSS) - ဇွန် ၈

ထိုင်းဝန်ကြီးချုပ်ဟောင်း သက်ဆင်ဟာ လက်ရှိအချိန်မှာ ကိုရိုနာဗိုင်းရပ်စ် ကူးစက်ခံရမှုကနေ ပြန်လည်သက်သာကောင်းမွန်လာပြီဖြစ်ကြောင်း ထိုင်းသတင်းတွေက ဖော်ပြထားပါတယ်။ သက်ဆင်ဟာ ပြီးခဲ့တဲ့သီတင်းပတ်အတွင်း ကိုရိုနာဗိုင်းရပ်ကူးစက်ခံရပြီးနောက် စွဲချက်တွေကိုရင်ဆိုင်နိုင်ခြင်းမရှိဘဲ နှောင့်နှေးခဲ့ရတယ်လို့သိရပါတယ်။ 

သက်ဆင်ဟာ ထိုင်းဝန်ကြီးချုပ်အဖြစ်တာဝန်ယူချိန်အတွင်း ထိုင်းဘုရင်စနစ်နဲ့ပတ်သက်ပြီးမှတ်ချက်ပြုပြောဆိုခဲ့ရာ အဲဒီပြောဆိုမှုတွေက ထိုင်းဘုရင်စနစ်ကို ဝေဖန်တယ်ဆိုပြီး စွဲချက်တင်ခံရမှုတွေနဲ့ ရင်ဆိုင်နေရပါတယ်။ သက်ဆင်က ကျန်းမာရေးပြန်လည်ကောင်းမွန်လာတဲ့အတွက်အမှုကို ပြန်လည်ရင်ဆိုင်မယ်လို့ ထုတ်ဖော်ပြောဆိုခဲ့ပါတယ်။ ထိုင်းဝန်ကြီးချုပ်ဟောင်းသက်ဆင်ဟာ ထိုင်းဘုရင်စနစ်ကိုဝေဖန်တိုက်ခိုက်တယ်ဆိုတဲ့ စွဲချက်တင်ခံရပြီးနောက် ထိုင်းနိုင်ငံအတွင်းကနေ ထပ်မံထွက်ပြေးဖွယ်ရှိတယ်လို့သတင်းတွေလည်းထွက်ပေါ်ခဲ့ဖူးပါတယ်။ ဒါပေမဲ့ သက်ဆင်က ကျန်းမာရေးကောင်းမွန်လာတဲ့အတွက်အမှုကို ရင်ဆိုင်မယ်လို့ပြောဆိုခဲ့သလို ထိုင်းဝန်ကြီးချုပ် တာဆီဗီဆင်ကလည်း သက်ဆင်ဟာ ပြည်ပမှအချိန်အကြာကြီးနေထိုင်ခဲ့လို့ နောက်တပ်တစ်ကြိမ်ပြည်ပထွက်ပြေးမှာမဟုတ်ဘူးလို့ပြောဆိုခဲ့ပါတယ်။

သက်ဆင်ဟာ ပြည်တော်ပြန်လာခဲ့ပြီးနောက်ပိုင်း ရင်ဆိုင်ရမယ့်ပြစ်ဒဏ်တွေကို အကျဉ်း ထောင်အတွင်းက မရင်ဆိုင်ဘဲကျန်းမာရေးအကြောင်းပြကာ ရဲတပ်ဖွဲ့အထူးဆေးရုံမှာနေထိုင်ပြီး သက်တမ်းကုန်ဆုံးစေခဲ့တယ်လို့ ဝေဖန်သံတွေလည်းထွက်ပေါ်နေပါတယ်။ သက်ဆင်ဟာ ထိုင်းနိုင်ငံမှာ သြဇာကြီးမားတဲ့ ဝါရင့်နိုင်ငံရေးသမားတစ်ဦးဖြစ်ပြီး လက်ရှိ အာဏာရပါတီဖြစ်တဲ့ ဖြူထိုင်းပါတီဟာ ၎င်းဦးဆောင်တည်ထောင်ထားတဲ့ပါတီဖြစ်ပါတယ်။