သုတကျော် (NSS) - ‌ဇွန် ၈

မန္တလေးတိုင်းဒေသကြီး၊ အမရပူရမြို့နယ်၊ ငယ်တိုးကျေးရွာအုပ်စု၊ လက်ဝဲမြင်းတိုင်ရပ်ရှိ ရတနာဂူ အလယ်နန်းရင်းမှ ပျောက်ဆုံးသွားသော ရှေးဟောင်း နတ်ရုပ် ၂ ရုပ်ကို ပျောက်ဆုံးသွားသည့် ရက်မှ ၂ ပတ်ခန့်အကြာတွင် ခိုးယူသူများက နန်းထိန်း ကိုမင်း၏ အိမ်ရှေ့၌ တိတ်တဆိတ် ပြန်လည်ထားသွားခဲ့ကြောင်း သိရသည်။ 

အဆိုပါ ပျောက်ဆုံးသွားသည့် နတ်ရုပ် ၂ ရုပ်မှာ ပုပ္ပါးမယ်တော်ရုပ်ထု နှင့် သခင်မသာ ရုပ်ထု ဖြစ်ပြီး မေလ ၂၄ ရက် နံနက်ပိုင်း ၅ နာရီခန့်က ပျောက်ဆုံးသွားခဲ့ပြီးနောက် ဇွန်လ ၇ ရက် နံနက် ၃ နာရီ အချိန်တွင် ပြန်တွေ့ရခြင်း ဖြစ်ကြောင်း နန်းထိန်း ကိုမင်းက NSS ကို ပြောသည်။ “ကျွန်တော်က အပေါ်ထပ်မှာ အိပ်တာပေါ့။ မနက်သုံးနာရီလောက်မှာ အပေါ့သွားချင်လို့ဆိုပြီး ဆင်းတဲ့အချိန် ကျွန်တော့်အိမ်ရှေ့မှာ နေ့ဆို ထိုင်ဖို့ခုံတန်းလျားချထားတာ ရှိတယ်။ အဲဒီအပေါ်မှာ ဂျပ်ဖာလေးနဲ့ ပုံတော်ကို စက္ကူနဲ့ပတ်ပြီး တင်ထားတာ တွေ့တာ။ စစတွေ့ချင်တော့ ပုံတော်မှန်း မသိဘူး ဘာလဲမသိဘူးဆိုပြီး သွားကြည့်မှ ပုံတော်မှန်းသိတာ” ဟု ၎င်းက ရှင်းပြသည်။ 

လက်ရှိတွင် ရုပ်ထု ၂ ခုကို မူလနေရာတွင် ပြန်လည်မထားသေးပဲ ဓလေ့အရ ချိုးတော်သုံးခြင်း နှင့် ရွှေပွန်းသည့် နေရာများကို ရွှေချမည်ဖြစ်ကာ လက်ရှိတွင် နန်းထိန်း ကိုမင်း၏ အိမ်၌အပူဇော်ခံထားရှိကြောင်း သိရသည်။ “ကျွန်တော့်အိမ်မှာ အပူဇော်ခံမယ်၊ ရွှေတွေဘာတွေချပြီးတော့မှ နယုန်လဆန်း ၁၂ ရက် (ဇွန်လ ၁၈ ရက်) မှာ အခမ်းအနားနဲ့ နန်းပေါ်ကို ပြန်ပင့်မယ်ပေါ့။ နယုန်လဆန်း ၁၃ ရက်၊ ၁၄ ရက်မှာ နှစ်စဉ်ရိုးရာ မယ်တော်ကြိုပွဲရှိတယ်။ တဆက်တည်း ကျင်းပမှာပေါ့။ အဲဒီလိုတော့ စီစဉ်ထားတယ်”ဟု နန်းထိန်းကိုမင်းက ဆိုသည်။ ပြန် လည်ရရှိသည့် ပုံတော်မှာ မူလလက်ရာပျက်ခြင်းမရှိသော်လည်း ရုပ်ထု ၂ ခု၏ မျက်နှာတွင် မူလထက် ရွှေပိုပွန်းကာ အောက်ခံပေါ်နေသည်ကို တွေ့ရကြောင်းလည်း ၎င်းက ဆိုသည်။ 

“ကျွန်တော့်အထင်တော့ တစ်နိုင်ငံလုံးအတိုင်းအတာနဲ့ သိသွားတော့ သူတို့လည်း ရောင်းလို့ မလွယ်ဘူးဗျာ။ ဒီပုံတော်ဆိုတာကလည်း ဘယ်နတ်ကတော်မှ ဝယ်ရဲမှာမဟုတ်ဘူး။ တစ်နိုင်ငံလုံးသိနေတဲ့ပုံတော် ဖြစ်နေတာလည်းပါမယ်၊ ကြောက်တာလည်းပါမယ်။ သူတို့ဆီလည်း အကြာကြီး မထားရဲဘူး ကြောက်လန့်ပြီး ပြန်ပို့တယ်လို့ ယူဆပါတယ်”ဟု နန်းထိန်း ကိုမင်းက ပြောသည်။ 

ပြီးခဲ့သည့်နှစ် အောက်တိုဘာလအတွင်းကလည်း စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ လယ်ကြီးကျေးရွာရှိ အိမ်တွင်းဖခင်နတ်နန်းမှ ညောင်ရမ်းခေတ်လက်ရာ အိမ်တွင်းမင်းမဟာဂီရိနတ်ရုပ် အပါအဝင် နတ်ရုပ် (၇)ရုပ် ခိုးယူခံရသည့်ဖြစ်စဉ်ဖြစ်ပွားခဲ့ကာ ပျဉ်းပင်ရွှေချမယ် တော် နတ်နတ်နန်းတွင်လည်း တံခါးဖျက်ခံထားရသည်ကို တွေ့ရသည့်ဖြစ်စဉ် ဖြစ်ပွားခဲ့သေးသည်။