ALynn (NSS) - ဇူလိုင် ၂၅

 Universiti Pertahanan Nasional Malaysia (UPNM) မှ ကျောင်းသားဟောင်း (၆)ဦးကို လွန်ခဲ့သည့် ခုနစ်နှစ်က ရေတပ်ဗိုလ်လောင်း Zulfarhan Osman Zulkarnain အား သတ်ဖြတ်မှုဖြင့် မလေးရှားတရားရုံးက အင်္ဂါနေ့ (ဇူလိုင်လ ၂၃) တွင် သေဒဏ်ချမှတ်ခဲ့သည်။ 

တရားသူကြီး Hadhariah Syed Ismail ဦးဆောင်သော အယူခံတရားရုံးသည် ကွာလာလမ်ပူတရားရုံးက ချမှတ်ခဲ့သည့် ကနဦးထောင်ဒဏ် (၁၈)နှစ်ကို ရာဇသတ်ကြီးပုဒ်မ ၃၀၂ အရ သေဒဏ်ဖြင့် ပြောင်းလဲသတ်မှတ်လိုက်သည်။ တရားသူကြီး Hadhariah ၏စီရင်ချက်တွင် ကျောင်းသားငါးဦးသည် သေဆုံးသူ၏ အတွင်းအစိတ်အပိုင်းများကို မီးပူဖြင့်အလှည့်ကျ အပူပေးခဲ့ကြောင်း တရားသူကြီးသုံးဦးမှတွေ့ရှိခဲ့ပြီး ကျန်ကျောင်းသား Abdoul Hakeem သည် လှုံ့ဆော်ခြင်း၊ ညွန်ကြားခြင်းများ ပြုလုပ်ခဲ့ကြောင်းတွေ့ရှိရသည်။ ကျောင်းသား (၆)ဦးမှာ Muhammad Akmal Zuhairi Azmal၊ Muhammad Azamuddin Mad Sofi၊ Muhammad Najib Mohd Razi၊ Muhammad Afif Najmudin Azahat၊ Mohamad Shobirin Sabri နှင့် Abdoul Hakeem Mohd Ali တို့ဖြစ်သည်။ “တရားခံ ၆ ဦးစလုံးအတွက် ပြစ်ဒဏ်တစ်ခုတည်းက သင့်လျော်ကြောင်း တညီတညွတ်တည်း ဆုံးဖြတ်ပြီး ၎င်းတို့အား ကြိုးဆွဲချ သေဒဏ်ချမှတ်သွားမည်ဖြစ်ကြောင်း၊ ထို့ကြောင့် တရားရုံးက တရားခံ ၆ ဦးအပေါ် အထက်တရားရုံးက ချမှတ်ထားသည့် ထောင်ဒဏ် ၁၈ နှစ်ကို ပယ်ဖျက်ပြီး သေဒဏ်နဲ့ အစားထိုးလိုက်တာ” ဟု တရားသူကြီးက ပြောသည်။

ကနဦးတွင် ကျောင်းသား(၅) ဦးသည် ရာဇသတ်ကြီးပုဒ်မ ၃၀၂၊ လူသတ်မှုဖြင့် စွဲချက်တင်ခံခဲ့ရပြီး ပြစ်မှုထင်ရှားစီရင်ခြင်းခံရလျှင် သေဒဏ်မဖြစ်မနေ ချမှတ်ခံရမည်ဖြစ်သည်။ Abdoul Hakeem သည် သေဒဏ်ပေးရမည့် အလားတူကျင့်ထုံးဥပဒေပုဒ်မ ၁၀၉ အရ ကြံရာပါအဖြစ် စွဲချက်တင် ခံရသည်။ ကွာလာလမ်ပူတရားရုံးသည် ၎င်းတို့ ၆ ဦးအား ဇူးလ်ဖာဟန်ကို သတ်ဖြတ်ရန် ရည်ရွယ်ချက်မရှိဘဲ ဒဏ်ရာရစေရန် ကြံရွယ်ချက်ဖြင့် ကျူးလွန်ခဲ့သော်လည်း သတ်ဖြတ်ရန် အပြစ်ရှိကြောင်းတွေ့ရှိရသဖြင့် ရာဇသတ်ကြီး ပုဒ်မ ၃၀၄ (က) အရ ထောင်ဒဏ်နှစ် ၃၀ နှင့် ငွေဒဏ် ချမှတ်နိုင်သည်။ ၎င်းတို့ ၆ ဦးသည် ၂၀၁၇ ခုနှစ်၊ မေလ ၂၂ ရက်၊ နံနက် ၄ နာရီ ၄၅ မိနစ်မှ ညနေ ၅ နာရီ ၄၅ မိနစ်ကြား Jebat Hostel ဘလောက်၊ UPNM ရှိ အခန်းတစ်ခုတွင် ၎င်းပြစ်မှုကို ကျူးလွန်ခဲ့သည်။ ဇူးလ်ဖာဟန်သည် ၂၀၁၇ ခုနှစ်၊ ဇွန်လ ၁ ရက်နေ့တွင် Serdang ဆေးရုံ၌ ကွယ်လွန်ခဲ့သည်။ ဒေသတွင်း မီဒီယာများ၏ အဆိုအရ ဇူးလ်ဖာဟန်၏ ခန္ဓာကိုယ်ပေါ်သို့ မီးပူသည် ထပ်ခါထပ်ခါ ဖိထားခံရသည့်အပြင် ရိုက်နှက်ခြင်း၊ ကန်ကျောက်ခြင်းနှင့် လက်သီးများဖြင့် ထိုးနှက်ခြင်းများ ခံခဲ့ရကြောင်း သိရသည်။ သို့သော် မေလ ၂၁ ရက်နှင့် ၂၂ ရက်တို့တွင် နှိပ်စက်ခံရပြီး ၁၀ ရက်အကြာ၊ ထိုနှစ် ဇွန်လ ၁ ရက်နေ့တွင် ကွယ်လွန်ချိန်အထိ ဇူးလ်ဖာဟန်သည် Akmal Zuhairi ၏ လက်တော့ပ်ကို ယူဆောင်သွားသည်ကို ဝန်ခံခဲ့ခြင်းမရှိပေ။