Pika (NSS) - အောက်တိုဘာ ၁၆

အမေရိကန်အစိုးရသည် အမေရိကန်ဒေါ်လာကို ငွေကြေးလဲလှယ်မှုကြားခံတစ်ခု သို့မဟုတ် တန်ဖိုးရှိသည့်အရာတစ်ခုအဖြစ် လုပ်ဆောင်ခြင်းထက် လက်နက်တစ်ခုအဖြစ် အသုံးချခဲ့ကြောင်း အမေရိကန်စီးပွားရေး ပညာရှင်နှင့် ပြည်သူ့မူဝါဒ ရေးရာလေ့လာသုံးသပ်သူ ဂျက်ဖာရီဆက်ချ်က ပြော ကြားခဲ့သည်။ ဂျက်ဖာရီဆက်ချ်သည် BRICS အဖွဲ့ ဘဏ္ဍာရေးဝန်ကြီးများနှင့် ဗဟိုဘဏ်အုပ်ချုပ်ရေးမှူး များ အစည်းအဝေးသို့ ဗီဒီယိုလင့်ခ်မှတစ်ဆင့် ၎င်း၏မိန့်ခွန်းတွင် အောက်တိုဘာလ(၁၀)ရက်က ယခုကဲ့ သို့ မှတ်ချက်ပြုပြောဆိုခဲ့ခြင်းဖြစ်ကြောင်း သိရသည်။ BRICS အဖွဲ့ဘဏ္ဍာရေးဝန်ကြီးများနှင့် ဗဟိုဘဏ် အုပ်ချုပ်ရေးမှူးများသည် ယခုလနှောင်းပိုင်းတွင် ကာဇန်မြို့၌ကျင်းပမည့် (၂၀၂၄)ခုနှစ် BRICS ထိပ်သီး အစည်းအဝေးမတိုင်မီ နိုင်ငံတကာ ငွေကြေး နှင့်ဘဏ္ဍာရေးစနစ်တိုးတက်ရေးတို့ကို ဆွေးနွေးရန်အတွက် မော်စကိုမြို့တွင်တွေ့ဆုံခဲ့ကြခြင်းဖြစ်ကြောင်း သိရသည်။

အမေရိကန်က အမေရိကန်ဒေါ်လာကို လက်နက်အဖြစ်အသုံးပြုခြင်းသည် ရုရှား၏ပိုင် ဆိုင် မှုများကိုသိမ်းယူခြင်းမှတစ်ဆင့် ထင်ရှားစွာဖြစ်ပေါ်ခဲ့ ခြင်းဖြစ်ကြောင်း ဂျက်ဖာရီဆက်ချ်ကပြောကြားခဲ့သည်။

ထို့ပြင် အီရန်၊ ဗင်နီဇွဲလား၊ အာဖဂန်နစ္စတန် နှင့်အခြားနိုင်ငံများ၏ ဘဏ္ဍာငွေများကို အမေရိကန် အစိုးရက သိမ်းဆည်းထားခြင်းကို ဂျက်ဖာရီဆက်ချ်က ထောက်ပြပြောဆိုခဲ့ကြောင်းလည်းသိရသည်။ ယူကရိန်းစစ်ပွဲနှင့်ပတ်သက်သည့် ပိတ်ဆို့အရေးယူမှုများ၏ တစ်စိတ်တစ်ပိုင်းအဖြစ် အမေရိကန်နှင့် ၎င်း၏မိတ်ဖက်နိုင်ငံများသည် ရုရှားဗဟိုဘဏ်၏ပိုင်ဆိုင်မှု အမေရိကန်ဒေါ်လာ (၃၀ဝ)ဘီလျံဝန်းကျင်ကို သိမ်း ဆည်းထားပြီး ၎င်းတို့အနက် အမေရိကန်ဒေါ်လာ(၅)ဘီလျံဝန်းကျင်မှာ အမေရိကန်ဘဏ်များတွင် ရှိနေ ကြောင်းသိရသည်။ ထို့ပြင် ပြီးခဲ့သည့်ဧပြီလတွင် အမေရိကန် သမ္မတဂျိုးဘိုင်ဒန်သည် အမေရိကန် တွင်ရှိနေသော ရုရှားပိုင်ဘဏ္ဍာငွေများကို သိမ်းယူ ရန်နှင့် ယူကရိန်း ပြန်လည်တည်ဆောက်ရေးရန်ပုံငွေသို့ လွှဲပြောင်းခွင့်ပြုသည့်ဥပဒေမူကြမ်းကို လက်မှတ်ရေးထိုးခဲ့ကြောင်းလည်းသိရသည်။ 

ဂျက်ဖာရီဆက်ချ် က “ အမေရိကန်ဒေါ်လာကို ပေးချေမှုယန္တရားတစ်ခု အနေနဲ့ သုံးလို့မရပါဘူး။ အမေရိကန်ဒေါ်လာဟာ ရန်လိုမှုမူဝါဒရဲ့လက်နက်တစ်ခုဖြစ်လာနေပါတယ်။ ပြီးခဲ့တဲ့(၁၅)နှစ်လောက်အတွင်း အဲဒီလိုလုပ်နေတာ တွေ ရပ်တန့်ဖို့ ကျွန်တော့်အစိုးရကိုပြောခဲ့ပါတယ်။ ဒီလို လုပ်တာက အမေရိကန်ဒေါ်လာအပေါ် ယုံကြည် မှုတွေကို ဖျက်ဆီးပစ်ပါလိမ့်မယ်။ ဒီလိုစနစ်မျိုးနဲ့ ဆက်သွားလို့မရပါဘူး ” ဟုပြောဆိုခဲ့သည်။