Pika (NSS) - အောက်တိုဘာ ၁၆

မြောက်ကိုရီးယားက တောင်ကိုရီးယားနဲ့ဆက်သွယ်ထားတဲ့ လမ်းတွေနဲ့ရထားလမ်းတွေကို ဖောက်ခွဲပစ်ခဲ့ပြီးနောက် ကိုရီးယားကျွန်းဆွယ်မှာ တင်းမာမှုအရှိန်တွေမြင့်တက်လာတာနဲ့ပတ်သက်ပြီး ဂျပန်အစိုးရက အောက်တိုဘာလ(၁၆)ရက်မှာ သတိပေးပြောဆိုလိုက်တယ်လို့ သိရပါတယ်။

ဂျပန်အစိုးရအဖွဲ့ လက်ထောက်အတွင်းဝန် ကာဇူဟီကိုအေအိုကီက "မြောက်ကိုရီးယားအစိုးရရဲ့လုပ်ရပ်တွေဟာ တောင်ကိုရီးယားနဲ့မြောက်ကိုရီးယားကြားမှာ တင်းမာမှုတွေကို မြင့်တက်လာစေနိုင်ပါတယ်။ မြောက်ကိုရီးယားရဲ့ လုပ်ရပ်တွေက တင်းမာမှုအရှိန်တွေမြင့်တက်လာအောင် လုပ် ဆောင်မယ့်ဘက်ကို ဦးတည်မသွားဖို့က အရေးကြီးပါတယ်"လို့ ပြောဆိုခဲ့ပါတယ်။ 

အောက်တိုဘာလ(၁၅)ရက်မှာ မြောက်ကိုရီးယားအစိုးရဟာ နှစ်နိုင်ငံကြားဆက်သွယ်ထားတဲ့လမ်းတွေရဲ့ အစိတ်အပိုင်းတွေကို ဖောက်ခွဲပစ်ခဲ့ပြီးနောက် နယ်စပ်အနီးမှာ တန်ပြန်ပစ်ခတ်မှုစစ်ဆင်ရေးတွေကို လုပ်ဆောင်ခဲ့တယ်လို့ တောင်ကိုရီးယားစစ်တပ်က ပြောကြားခဲ့ပါတယ်။ မြောက်ကိုရီးယားဟာ နှစ်နိုင်ငံကြားဆက်သွယ်ထားတဲ့ လမ်းတွေကို ပိတ်ဆို့ပစ်ဖို့ ရည်ရွယ်ချက်တဲ့ ဖောက်ခွဲမှုစစ်ဆင်ရေးတစ်ခုကို လုပ်ဆောင်ခဲ့ပြီးနောက် တောင်ကိုရီးယားစစ်တပ်ဟာ စစ်ဘက်ဆိုင်ရာနယ်နမိတ်မျဉ်း (MDL) လိုင်းတောင်ဘက်ခြမ်းက ဧရိယာတွေမှာ တန်ပြန်ပစ်ခတ်မှုစစ်ဆင်ရေးကို လုပ်ဆောင်ခဲ့တာဖြစ်တယ်လို့ တောင်ကိုရီးယားစစ်ဦးစီးချုပ်များရုံး(JCS)ကပြောကြားခဲ့ပါတယ်။ တောင်ကိုရီးယားနဲ့ ဆက်သွယ်ထားတဲ့ လမ်းကြောင်းတွေအားလုံးကို ပိတ်ပစ်တော့မယ် မြောက်ကိုရီးယားအစိုးရက ပြီးခဲ့တဲ့သီတင်းပတ်မှာ ထုတ်ပြန်ကြေညာခဲ့ပြီးနောက် ယခုလိုဖြစ်ရပ်တွေဖြစ်ပွားခဲ့တာလည်းဖြစ်ပါတယ်။ ဒါ့ပြင် ဝါဒဖြန့်ချိရေးလက်ကမ်းစာစောင်တွေကို သယ်ဆောင်လာတဲ့ တောင်ကိုရီးယားရဲ့ဒရုန်းတွေဟာ ပြုံးယမ်းမြို့ကောင်းကင်ယံကို ဝင်ရောက်လာခဲ့တယ်လို့ မြောက်ကိုရီးယားအစိုးရက အောက်တိုဘာလ(၁၁)ရက်မှာ စွပ်စွဲပြောဆိုခဲ့ပါတယ်။ ပြီးတော့ တောင်ကိုရီးယားဒရုန်းတွေ ထပ်မံဝင်ရောက် လာမယ်ဆိုရင် ဆိုးရွားတဲ့ဘေးအန္တရာယ်တွေကို တောင်ကိုရီးယားက ရင်ဆိုင်ရလိမ့်မယ်လို့ မြောက်ကိုရီးယားခေါင်းဆောင်ကင်ဂျုံအန်းရဲ့ ညီမဖြစ်သူ ကင်ယိုဂျုံက ပြီးခဲ့တဲ့ရက်ပိုင်းမှာ သတိပေးပြောဆိုခဲ့ဖူးပါတယ်။

ကာဇူဟီကိုအေအိုကီက "မြောက်ကိုရီးယားရဲ့ အနာဂတ်ဖွံ့ဖြိုးတိုးတက်မှုတွေအတွက် လိုအပ်တဲ့အချက်အလက်တွေကို စုဆောင်း၊ခွဲခြမ်းစိတ်ခြာပြီး စောင့်ကြည့်သွားဖို့ ဂျပန်အစိုးရက အစွမ်းကုန်လုပ်ဆောင်သွားမှာပါ"လို့ပြောဆိုခဲ့ပါတယ်။