ALynn (NSS) - ဇွန် ၃ 

စနေနေ့ (ဇွန်လ ၁ ရက်) က ဂျာမနီနိုင်ငံ၊ မြို့တော်ဘာလင်တွင် ရာနှင့်ချီသော ဆန္ဒပြသူများ ချီတက်ခဲ့ကြပြီး ယူကရိန်းအတွက် စစ်ရေးအကူအညီများပေးခြင်းနှင့် အန္တရာယ်ရှိသော ရုရှား ဆန့်ကျင်ရေးကြွေးကြော်သံများကို ရပ်တန့်ရန် တောင်းဆိုခဲ့ကြသည်။ ယူကရိန်းသည် ရုရှားပြည်တွင်းရှိ တိုက်ခိုက်မှုများအတွက် အနောက်နိုင်ငံမှ ပံ့ပိုးပေးသောလက်နက်များအား အသုံးပြုခြင်းနှင့်ပတ်သက်၍ ဂျာမနီအစိုးရမှ ထိလွယ်ရှလွယ်ဖြစ်စေသော ကြေညာချက်များ ယခုသီတင်းပတ် အစောပိုင်းတွင် ထွက်ပေါ်လာပြီးနောက် ထိုကဲ့သို့ ချီတက်ဆန္ဒပြမှုများ ပေါ်ပေါက်လာခြင်းဖြစ်သည်။ 

ဆန္ဒပြပွဲ ဗီဒီယိုဖိုင်များတွင် ဆန္ဒပြသူများသည် “ရုရှားကိုဆန့်ကျင်သည့် စစ်နှင့် အမုန်းစကားများ ရပ်ရန်”၊ “နိုင်ငံရေး နှင့် မီဒီယာတွင် ရုရှားကြောက်ရောဂါကို ရပ်တန့်ရန်” နှင့် “ရန်လိုသူသည် ရုရှားမဟုတ်ဘဲ နေတိုး” ဟု ရေးသားထားသောဆိုင်းဘုတ်များကို ကိုင်၍ ဘာလင်မြို့၊ အလက် ဇန္နားပလက်ဇ်ပြည်သူ့ရင်ပြင်မှ ချီတက်လာကြ ကြောင်း တွေ့ရသည်။ 

တက်ကြွလှုပ်ရှားသူများသည် ဂျာမန်အစိုးရသည် အမေရိကန်၏ အမိန့်ညွှန်ကြားချက်များအပေါ်မူတည်ပြီး နိုင်ငံရေး ဆုံးဖြတ်ချက်များချသည်ဟု စွပ်စွဲကာ ရုရှားနှင့် တိုက်ရိုက်ပဋိပက္ခများဖြစ်လာနိုင်သည့် အကျိုးဆက်များ ကို သတိပေးခဲ့သည်။

နေတိုးနှင့် ၎င်း၏ အနောက်အုပ်စုမဟာမိတ်များက ယူကရိန်းအား လက်နက်နှင့် ကိရိယာများ ထောက်ပံ့ပေးခဲ့သော် လည်း ၎င်းတို့၏ အသုံးပြုမှုအပေါ် ကန့်သတ်ချက်များ ဆက်လက်ထားရှိခဲ့သည်။ သို့သော် ယူကရိန်းသည် မကြာသေးမီက ၎င်းကန့်သတ်ချက်များကို ဖြေလျှော့ပေးရန် တောင်းဆိုမှုများ အရှိန်မြှင့်လာခဲ့သည်။ ဂျာမနီ အပါအဝင် နေတိုးနိုင်ငံအများစုက အဆိုတောင်းဆိုချက်အား ထောက်ခံကြောင်း ပြောဆိုခဲ့ကြသည်။

ယခုသီတင်းပတ်အစောပိုင်းတွင် ဂျာမန်အစိုးရပြောရေးဆိုခွင့်ရှိသူ Steffen Hebestreit က ယူကရိန်း၏ ခံစစ် တိုက်ခိုက်မှုများသည် ၎င်း၏ပိုင်နက်တွင် အကန့်အသတ်မရှိလုပ်ဆောင်နိုင်သလို ရန်သူ၏နယ်မြေအထိပါ ချဲ့ထွင်နိုင်ကြောင်း” ပြောကြားခဲ့သည်။ 

ထို့ပြင် သောကြာနေ့တွင် ခါကော့ဗ်ဒေသတွင် ယူကရိန်းစစ်တပ်၏နေရာများအား တိုက်ခိုက်နေသော ရုရှားနယ်စပ် ဒေသများကို တိုက်ခိုက်ရန်အတွက် အနောက်နိုင်ငံများမှ ထောက်ပံ့ပေးသောလက်နက်များကို ယူကရိန်းက အသုံးပြုနိုင်ကြောင်း ၎င်းကအချက်ပြခဲ့သည်။ ရုရှားက ယူကရိန်းသို့ အနောက်နိုင်ငံမှ လက်နက်များ ထောက်ပံ့မှု သည် ပဋိပက္ခကို ရှည်ကြာစေမည်ဖြစ်ကြောင်း သတိပေးထားသည်။