သန့်ဇင် (NP News) - မေ ၂၃

မွန်ပြည်နယ်၊ ဘီးလင်းမြို့နယ်၊ ရန်ကုန်-မော်လမြိုင်လမ်းပေါ်ရှိ မစောတံတား မိုင်းခွဲဖျက်ဆီးခံရပြီးနောက် ဆိုင်ကယ်(၃)စီး ချောင်းအတွင်းသို့  ပြုတ်ကျကာ တစ်ဦးသေဆုံးခဲ့ကြောင်း ဒေသခံများထံမှ သိရသည်။

ယနေ့(မေလ ၂၃ ရက်)၊ နံနက် ၂နာရီ ၄၀မိနစ်အချိန်ခန့်က ဘီးလင်းမြို့နယ်၊ ရန်ကုန်-မော်လမြိုင်ကားလမ်း၊ တောင်ကလေးကျေးရွာအထွက်ရှိ မစောတံတားကို အကြမ်းဖက်အဖွဲ့က မိုင်းခွဲဖျက်ဆီးခဲ့ကြောင်း သိရသည်။ “တံ တားကတော့ မိုင်းခွဲခံရတာပါ။ မနက်အစောပိုင်းလောက်က ပေါက်ကွဲသံအကျယ်ကြီးကြားလိုက်ရပြီးတော့ တံတားကကျိုးကျ သွားတာပါ”ဟု ဒေသခံတစ်ဦးက NSS ကိုပြောသည်။

အဆိုပါ မစောတံတားမိုင်းခွဲဖျက်ဆီးခံရမှုကြောင့် အလျား (၁၀၆)ပေ၊ အကျယ်(၂၄)ပေရှိ ကွန်ကရစ်တံတား၏ (၃)ပုံ(၂)ပုံခန့်မှာ ချောင်းအတွင်းသို့ ကျိုးကျပျက်စီးသွားခဲ့ကြောင်း သိရသည်။ ထို့ပြင် လူငယ်(၄)ဦးသည် မိုင်းခွဲဖျက်ဆီးခံရ၍ ကျိုးကျနေသော မစောတံတား၏ အခြေအနေကိုမသိရှိပဲ ဆိုင်ကယ် စီးနင်းမောင်းနှင်လာသည့်အတွက် ချောင်းအတွင်းသို့ပြုတ်ကျကာ အသက်(၂၀)ကျော်အမျိုးသားတစ်ဦးပွဲချင်းပြီးသေဆုံး သွားခဲ့ကြောင်း သိရသည်။

“တံတားကျိုးကျပြီးတော့ ဘားအံဘက်ကနေဆင်းလာတဲ့ ဆိုင်ကယ်ဘီးကြီး(၃)စီးက တံတားကျိုးထားကိုမသိပဲ စွတ်မောင်းတော့ အောက်ကို ပြုတ်ကျသွားတာ။ အဲဒီမှာ လူ(၄)ယောက်ပါပြီး လင်မယား(၂)ယောက်စီးလာတဲ့ဆိုင်ကယ်က အမျိုးသားက ဆုံးသွားတယ်။ အမျိုးသား တစ်ယောက်က လက်(၂)ဖက်လုံးကျိုးသွားတယ်။ ကျန်တဲ့လူ(၂)ယောက်တော့ ပွန်းပဲ့လောက်ပဲရကြတယ်”ဟု ၎င်းက ဆက်လက်ပြောသည်။

ထို့နောက် သေဆုံးသူအမျိုးသားနှင့် ထိခိုက်ဒဏ်ရာရရှိသူများကို ဘီးလင်းမြို့နယ်ပြည်သူ့ဆေးရုံးသို့ ပို့ဆောင်ပေးထားကြောင်း သိရသည်။ လက်ရှိတွင် မစောတံတားကျိုးကျပျက်စီးသွားသည့်အတွက် ရန်ကုန်-မော်လမြိုင်လမ်းပန်းဆက်သွယ်ရေးပြတ်တောက်လျက်ရှိကာ ကုန်စည်စီးဆင်းမှုနှင့် ခရီးသွားလာမှုများကို ယခင်ကကျုံအိတ်တံတားကျိုးကျသည့်ဖြစ်စဉ်နောက်ပိုင်းအသုံးပြုခဲ့သည့် တောလမ်းကိုသာ ပြန်လည်အသုံးပြုနေရကြောင်း  ဒေသခံများကဆိုသည်။

အလားတူ ပြီးခဲ့သည့် ၂၀၂၃ ခုနှစ်၊ ဇွန်လအတွင်းကလည်း ရန်ကုန်-မော်လမြိုင်ကားလမ်းပေါ်ရှိ ကျုံအိတ်တံတားကို KNU/PDF ပူးပေါင်းအဖွဲ့က မိုင်းခွဲဖျက်ဆီးမှုကြောင့် တံတားတစ်ခြမ်းပြိုကျပျက်စီးသွားခဲ့ပြီး တံတားပေါ်တွင် ဖြတ်သန်းမောင်းနှင်နေသည့် မော်တော်ယာဉ် ၃ စီးပြုတ်ကျကာ ပြည်သူတစ်ဦးသေဆုံးခဲ့ဖူးသည်။