သန့်ဇင် (NSS) - မေ ၁၃

မန္တလေးတိုင်းဒေသကြီး၊ မိတ္ထီလာမြို့ရှိ ကိုယ်ပိုင်အထက်တန်းကျောင်း(၃) လွှာမှ ကျောင်းသူတစ်ဦးခုန်ချအဆုံးစီရင်မှုဖြစ်ပွားခဲ့ကြောင်း ဒေသခံလူမှုကူညီရေးအသင်းထံမှ သိရသည်။

ဖြစ်စဉ်မှာ ယမန်နေ့(မေလ ၁၂ရက်)၊ နံနက် ၈နာရီခွဲအချိန်ခန့်က မိတ္ထီလာမြို့၊ အောင်ဆန်းမြို့သစ်၊ အမှတ်(၁)ရပ်ကွက်၊ အောင်မြင်လမ်းရှိ ကိုယ်ပိုင်အထက်တန်းကျောင်းတွင် ဖြစ်ပွားခဲ့ခြင်းဖြစ်ကြောင်း သိရသည်။

“ကိုယ်ပိုင်ကျောင်းက (၃)ထပ်ကနေခုန်ချတာပါ။ ဘာကြောင့်ခုန်ချတာလဲတော့ မသိဘူး။ ခုန်ချတာကလည်း စာသင်ဆောင်ကနေခုန်ချတာ။ Grade 12 ကကျောင်းသူလေးပါ”ဟု ဒေသခံလူမှုကူညီရေးအသင်းမှ တာဝန်ရှိသူတစ်ဦးက NSS ကိုပြောသည်။

ခုန်ချအဆုံးစီရင်သူမှာ မုန်တိုင်ကျေးရွာအုပ်စု၊ ခံပင်အိုင့်ကျေးရွာမှ အသက် (၁၈)နှစ်အရွယ် GRADE 12 ကျောင်းသူအမျိုးသမီးတစ်ဦးဖြစ်ပြီး ထိခိုက်ဒဏ်ရာများပြင်ထန်စွာရရှိကာ နေပြည်တော်ဆေးရုံကြီးတွင် ဆေးကုသမှုခံယူစဉ် သေဆုံးသွားခဲ့ကြောင်း သိရသည်။

“ခုန်ချတော့ ခေါင်းတွေလက်တွေခြေထောက်တွေထိတယ်။ ခြေထောက်တော့ကျိုးသွားတယ်။ ဒဏ်ရာတွေကတော့အများကြီးပဲ။ အဲဒါနဲ့ဆေးရုံပို့ပြီး နေပြည်တော်ဆေးရုံရောက်တော့ ဆုံးသွားတယ်။ အဲဒီဖြစ်စဉ်ဖြစ်ပြီးတော့ အခုထိတော့ကျောင်းက ပိတ်ထားတယ်” ဟု ၎င်းကဆက်လက်ပြောသည်။

အဆိုပါသေဆုံးသူအမျိုးသမီးကို ယနေ့ နေ့လည်ပိုင်းက ခံပင်အိုင့်ကျေးရွာသုသာန်တွင် သင်္ဂြိုလ်ပေးခဲ့ပြီး ဖြစ်စဉ်နှင့်ပတ်သက်၍ သက်ဆိုင်ရာက စုံစမ်းစစ်ဆေးလျက်ရှိကြောင်း သိရသည်။