ဂျန်ဇက် (NSS) - ဇန်နဝါရီ ၂၅ 

ထိုင်းနိုင်ငံ ချွန်ဘူရီပြည်နယ် စီရက်ချာဒေသတွင် ဇန်နဝါရီ ၂၃ ရက် ဓါးထိုးမှုဖြစ်ပွားခဲ့ရာ မြန်မာအမျိုးသမီးတစ်ဦး ဒဏ်ရာရခဲ့ကြောင်း ထိုင်းသတင်းများတွင် ဖော်ပြထားသည်။

ချွန်ဘူရီပြည်နယ် Sriracha ရဲစခန်းမှ ရဲမှူးကြီး ဆူချက် ချာရိုအမ်ရီသည် ဓါးထိုးမှုဖြစ်ပွားသည်ဆိုသောသတင်းကိုလက်ခံရရှိခဲ့ပြီးနောက် သွားရောက်စစ်ဆေးခဲ့ရာ မြန်မာအမျိုးသမီး အေးဝေနှင်း ဆိုသူကို ဓါးဒဏ်ရာများဖြင့် တွေ့ရှိခဲ့ကြောင်း သိရသည်။

ထိုင်းရဲတပ်ဖွဲ့က အသက် ၂၅ နှစ်အရွယ်ရှိ အေးဝေနှင်းသည် ဘယ်ဖက်ပုခုံးတွင် ပြင်းထန်သော ဒဏ်ရာရရှိခဲ့သည့်အတွက် နီးစပ်ရာဆေးရုံကို အမြန်ဆုံးတင်ပို့ခဲ့ရကြောင်း ပြောသည်။မြန်မာအမျိုးသမီး နှင့် ခင်ပွန်းဖြစ်သော မြန်မာနိုင်ငံသားဟန်ဝင်းတို့သည် စကားများရာမှတဆင့် ဓါးထိုးမှုဖြစ်ပွားခဲ့ခြင်းဖြစ်ကြောင်း၊ ခင်ပွန်းဖြစ်သူသည် ဓါးထိုးမှုကျူးလွန်ခဲ့ပြီးနောက် အလုပ်သမားစခန်းမှ ထွက်ပြေးသွားခဲ့ရာ ဖမ်းဆီးနိုင်ရန် ကြိုးပမ်းနေကြောင်း ထိုင်းရဲတပ်ဖွဲ့က ပြောသည်။

စီရက်ချာဒေသ Soi Phunsin ရွာအနီးရှိ အလုပ်သမားတန်းလျားတွင်နေထိုင်သည့် အသက် ၂၉ နှစ်အရွယ်ရှိ Mrs. Yupha က မြန်မာနိုင်ငံသား ဟန်ဝင်းသည် အရက်ကြိုက်သူတစ်ဦးဖြစ်ပြီး အရက်သောက်ရန်အတွက် ဇနီးဖြစ်သူထံမှ ဘတ် ၄ဝဝဝ တောင်းရမ်းချိန်တွင် စကားများရန်ဖြစ်ခဲ့ကြောင်း၊ ဇနီးဖြစ်သူထံမှ တောင်းဆိုသည့် ငွေကြေးမရသည့်အတွက် ဟန်ဝင်းသည် ဇနီးဖြစ်သူကို ဓါးဖြင့်ထိုးခဲ့ခြင်းမျိုးဖြစ်ကြောင်း ပြောဆိုထားသည်။

ထိုင်းရဲတပ်ဖွဲ့သည် အလုပ်သမားတန်းလျားမှ ထွက်ပြေးသွားသည့် မြန်မာနိုင်ငံသား 

ဟန်ဝင်းကို ဖမ်းဆီးစွဲချက်တင်ရန် စုံစမ်းစစ်ဆေးနေပြီး ဖမ်းဆီးမိပါက လူသတ်ရန်ကြိုးပမ်းအားထုတ်မှုဖြင့် စွဲချက်တင်သွားဖွယ်ရှိနေကြောင်း ထိုင်းသတင်းများက ဖော်ပြထားသည်။