Pika (NSS) - ဇန်နဝါရီ ၂၂ 

ရုရှားစီးပွားရေး ဂျက်လေယာဉ်တစ်စင်းသည် အာဖဂန်နစ္စတန်နိုင်ငံရှိ တောင်တန်းထူထပ်သောဒေသတစ်ခုတွင် ရေဒါမှ ပျောက်ကွယ်သွားပြီးနောက် ပျက်ကျသွားခဲ့ကြောင်း ရုရှားဖက်ဒရယ်လေကြောင်းပို့ဆောင်ရေးအေဂျင်စီ Rosaviatsia က အတည်ပြုပြောကြားခဲ့သည်။

အဆိုပါဂျက်လေယာဉ်သည် ဇန်နဝါရီလ(၂ဝ)ရက် နံနက်ပိုင်းက အာဖဂန်နစ္စတန်နိုင်ငံ အနောက်မြောက်ပိုင်းရှိ Badakhshan ပြည်နယ်တွင် ပျက်ကျခဲ့ခြင်းဖြစ်ကြောင်း ဒေသတွင်းပြန်ကြားရေး နှင့် ယဉ်ကျေးမှုဌာနအကြီးအကဲ Zabihullah Amiri က ပြောကြားခဲ့သည်။

ထို့အပြင် ရှာဖွေကယ်ဆယ်ရေးအဖွဲ့တစ်ဖွဲ့ကို အဆိုပါဒေသသို့စေလွှတ်ထားကြောင်း Zabihullah Amiri က ထပ်မံ ပြောကြားခဲ့သည်။ ယင်းဂျက်လေယာဉ်သည် ရုရှားကုမ္ပဏီတစ်ခုနှင့် မှတ်ပုံတင်ထားသော Falcon 10 ကော်ပိုရိတ် ဂျက်လေယာဉ်တစ်စင်းဖြစ်ကြောင်း Rosaviatsia ၏ ပြောကြားချက်များအရ သိရသည်။

အဆိုပါဂျက်လေယာဉ်သည် အိန္ဒိယနိုင်ငံမှ Gaya မြို့မှ ဥဇဘက်ကစ္စတန်နိုင်ငံ Tashkent မြို့ကို ဖြတ်ကာ ရုရှားနိုင်ငံ Zhukovsky လေဆိပ်သို့ ဦးတည်သွားနေသည့် လမ်းကြောင်းပေါ်တွင် ရှိနေခြင်းဖြစ်ကြောင်း သိရသည်။ 

ရုရှားစီးပွားရေးဂျက်လေယာဉ်သည် အစောပိုင်းတွင် ထိုင်းနိုင်ငံ Utapao လေဆိပ်မှ စတင်ထွက်ခွာခဲ့ခြင်းဖြစ်ပြီး အမှုထမ်းလေးဦး နှင့် ခရီးသည်(၂)ဦးတို့ လိုက်ပါသွားခဲ့ကြောင်း Rosaviatsia ၏ ဒေတာအချက်အလက်များအရ သိရသည်။ 

ဂျက်လေယာဉ်ပေါ်တွင် ဆေးဘက်ဆိုင်ရာကုသမှုများလုပ်ဆောင်ရန်အတွက် ထိုင်းနိုင်ငံ ပတ္တယားမြို့မှ ထွက်ခွာ လာသော ခင်ပွန်းဖြစ်သူနှင့်အတူ လိုက်ပါလာသည့် ရုရှားအမျိုးသမီးတစ်ဦးတို့ လိုက်ပါလာခဲ့ခြင်းဖြစ်ကြောင်း ဘန်ကောက်မြို့ရှိ ရုရှားကောင်စစ်ဝန်ရုံး၏ ပြောဆိုချက်များအရ သိရသည်။

အဆိုပါဂျက်လေယာဉ်သည် အင်ဂျင်ပိုင်းဆိုင်ရာပြဿနာများကြောင့် ပျက်ကျခဲ့ခြင်းဖြစ်နိုင်ဖွယ်ရှိကြောင်း အာဖဂန် နစ္စတန်နိုင်ငံရှိ တာလီဘန်အစိုးရပြောရေးဆိုခွင့်ရှိသူ Abdul Wahid Rayan က ပြောကြားခဲ့သည်။ Falcon 10 သည် ပြင်သစ်လေယာဉ်ထုတ်လုပ်ရေးကုမ္ပဏီ Dassault Aviation မှ ထုတ်လုပ်ထားသော စီးပွားရေး ဂျက်လေယာဉ် တစ်စင်းဖြစ်ပြီး ၁၉၇၁ ခုနှစ် နှင့် ၁၉၈၁ ခုနှစ်တို့တွင် ထုတ်လုပ်ခဲ့ခြင်းဖြစ်သော်လည်း လက်ရှိအချိန်အထိ ဒုတိယ စီးပွားရေးဈေးကွက်တွင် ရေပန်းစားနေဆဲဖြစ်ကြောင်း သိရသည်။

အာဖဂန်နစ္စတန်နိုင်ငံရှိ တောင်တန်းထူထပ်သောဒေသတွင် ပျက်ကျခဲ့သော လေယာဉ်သည် အိန္ဒိယလေကြောင်း လိုင်းပိုင်မဟုတ်ကြောင်း နယူးဒေလီမြို့ရှိ မြို့ပြလေကြောင်းဝန်ကြီးဌာနက ပြောကြားခဲ့သည်။ 

အဆိုပါလေယာဉ်သည် အိန္ဒိယခရီးသည်တင်လေယာဉ်တစ်စင်းဖြစ်ကြောင်း အစောပိုင်းတွင် မီဒီယာများက မှားယွင်းဖော်ပြခဲ့သည်။ ထို့အပြင် ယင်းလေယာဉ်သည် စင်းလုံးငှားထားသည့် လေယာဉ်တစ်စင်း မဟုတ်ကြောင်း လည်း  မြို့ပြလေကြောင်းဝန်ကြီးဌာန၏ ထုတ်ပြန်ချက်တွင် ရေးသားဖော်ပြထားသည်။