NSS - ဇန်နဝါရီ ၂၂

မွန်ပြည်နယ်၊ ကျိုက်ထိုမြို့နယ်တွင် မြေးဖြစ်သူကို ကျောင်းကြိုရန်စောင့်နေသည့် အသက်(၇၅)နှစ်အရွယ် အဘိုးအိုတစ်ဦး KNU/PDF အဖွဲ့ဝင်တစ်ဦး၏ လုပ်ကြံသတ်ဖြတ်ခြင်းကိုခံခဲ့ရကြောင်း ရဲတပ်ဖွဲ့က သတင်းထုတ်ပြန်ထားသည်။

ပြီးခဲ့သော ဇန်နဝါရီလ ၁၉ ရက်၊ မွန်းလွဲ ၃နာရီ ၄၀မိနစ်အချိန်တွင် ကျိုက်ထိုမြို့နယ်၊ မုပ္ပလင်ကျေးရွာရှိ အခြေခံပညာအထက်တန်း ကျောင်းအနီး၌ အထက်ပါကဲ့သို ဖြစ်ပွားခဲ့ခြင်းဖြစ်ကြောင်း သိရသည်။

အဆိုပါကျေးရွာတွင်နေထိုင်သည့် ဦးတင်အေး(၇၅)နှစ်သည် ၎င်း၏မြေးဖြစ်သူကို ကျောင်းကြိုရန် စောင့်ဆိုင်းနေစဉ် KNU/PDF ပူးပေါင်းအဖွဲ့ဝင်တစ်ဦးက ဆိုင်ကယ်ဖြင့်ရောက်ရှိလာကာ သေနတ်ဖြင့်ပစ်ခတ်ထွက်ပြေးသွားခဲ့ကြောင်း သိရသည်။

ထိုသို့ ပစ်ခတ်ခံရမှုကြောင့် ဦးတင်အေးတွင် ကျည်ထိမှန်ဒဏ်ရာများရရှိကာ အခင်းဖြစ်ပွားရာနေရာ၌ သေဆုံးသွားခဲ့ကြောင်း သိရသည်။

ထို့ကြောင့် ပြစ်မှုကျူးလွန်သူအား ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေးတို့အတွက် လုံခြုံရေးတပ်ဖွဲ့ဝင်များက စုံစမ်းစစ်ဆေးမှုများ ဆက်လက်ပြုလုပ်လျက်ရှိကြောင်း သိရသည်။