စော (NSS) - ဇန်နဝါရီ ၂၁

မွန်ပြည်နယ်၊ သထုံမြို့တွင်  ဆယ်ကျော်သက်အရွယ် လူငယ်အမျိုးသားတစ်ဦး ကြိုးဆွဲချအဆုံးစီရင်မှုဖြစ်ပွားခဲ့ကြောင်း သိရသည်။

အဆိုပါအမျိုးသားမှာ ယမန်နေ့ (ဇန်နဝါရီလ ၂ဝ ရက်)၊ နံနက် (၈)နာရီဝန်းကျင်အချိန်တွင် သထုံမြို့၊ မြသပိတ် တောင်ရင်ပြင်အောက်ဘက်ရှိ ကျောက်ထုတ်တန်းတစ်ခု၌  ကြိုးဆွဲချခဲ့ခြင်းဖြစ်ကြောင်း အကြင်နာတွဲလက်အသင်း ထံမှ သိရသည်။

“ရင်ပြင်ကို ချဲ့ထားတဲ့အခါကြတော့ အောက်ကနေ ထောက်လေးတွေ ထောက်ထားတယ်။ အဲဒီထောက်ကနေ ကြိုးဆွဲချလိုက်တာ။ ကြိုးကတော့ နိုင်လွန်ကြိုးပါပဲ။ သူရဲ့ဖုန်းမှတ်တမ်းကြည့်ရသလောက် ကောင်မလေးနဲ့ အဆင်မပြေလို့ ကြိုးဆွဲချတဲ့ပုံစံလေး” ဟု အကြင်နာတွဲလက်အသင်းမှ တာဝန်ရှိသူတစ်ဦးက NP News ကို ပြော သည်။

အဆိုပါသေဆုံးသူမှာ အသက် (၁၉)နှစ်အရွယ်ရှိပြီး သထုံမြို့၊ အောက်ကျင်းရပ်ကွက်၊ အုတ်ဖိုတန်းလမ်း၌ နေထိုင်သူ တစ်ဦးဖြစ်ကြောင်း သိရသည်။

၎င်း၏ ရုပ်အလောင်းကို သထုံပြည်သူ့ဆေးရုံ ရင်ခွဲရုံသို့ ပို့ဆောင်ထားကြောင်း သိရသည်။

အလားတူ နေပြည်တော်၊ ဇေယျာသီရိမြို့နယ်တွင် ပြီးခဲ့သည့် (ဒီဇင်ဘာလ ၃ဝ ရက်)၊ မွန်းလွဲ (၁၁)နာရီဝန်းကျင် အချိန်၌ အသက် (၁၇)နှစ်အရွယ် လူငယ်အမျိုးသားတစ်ဦး ကြိုးဆွဲချအဆုံးစီရင်မှုဖြစ်ပွားခဲ့ဖူးသည်။