ယွန်း (NSS) - ဇန်နဝါရီ ၁၈

1980 model နှင့် ၎င်းမတိုင်မီယာဥ်များကို ရှေးဟောင်း Classic မော်တော်ယာဥ်အဖြစ်သတ်မှတ်၍ ဒဏ်ကြေးဖြင့် ပြန်လည်မှတ်ပုံတင်ခွင့်ပေးမည်ဖြစ်ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာနက ဇန်နဝါရီလ(၁၇)ရက်က အသိပေးထုတ်ပြန်ထားသည်။ 

ရှေးဟောင်း Classic မော်တော်ယာဥ်များအား တန်ဖိုးထားထိန်းသိမ်းရေး နှင့် သမိုင်းဝင်ယာဥ်များအဖြစ် တရားဝင်မှတ် တမ်းတင်ခွင့်ပြုနိုင်ရေးအတွက် ကုန်းလမ်းပို့ဆောင်ရေးညွှန်ကြားမှုဦးစီးဌာနက အထက်ပါကဲ့သို့ ဆောင်ရွက်ခဲ့ခြင်းဖြစ်သည်။

ထို့ကြောင့် ကုန်းလမ်းပို့ဆောင်ရေးညွှန်ကြားမှုဦးစီးဌာနတွင် ယခင်က မှတ်ပုံတင်ထားရှိပြီး သက်တမ်းတိုး ဆက်လက်ဆောင်ရွက်ခြင်းမရှိသည့်အတွက် မှတ်ပုံတင်ဖျက်သိမ်းပြီးဖြစ်သည့် 1980 model နှင့် ၎င်းမတိုင်မီယာဥ်များကို ရှေးဟောင်း Classic မော်တော်ယာဥ်အဖြစ် သတ်မှတ်ဒဏ်ကြေးဖြင့် ပြန် လည် မှတ်ပုံတင်ဆောင်ရွက်ပေးမည်ဖြစ်ကြောင်း ထုတ်ပြန်ထားသည်။

မှတ်ပုံတင်ခွင့်ဆောင်ရွက်ရာတွင် မူလကမှတ်ပုံတင်ထားရှိခဲ့သော ယာဥ်များကိုသာ ပြန်လည်ဆောင်ရွက်ခွင့်ပေးမည်ဖြစ်ပြီး ရောက်ရှိယာဥ်အမှတ်သစ်ဖြင့် သတ်မှတ်ပေးမည်ဖြစ်ကြောင်း သိရသည်။

“ကညနရဲ့မူဝါဒအရ (၅)နှစ် ဆက်တိုက် သက်တမ်းတိုးခြင်းမရှိရင် ဖျက်သိမ်းမယ်ဆိုတဲ့မူဝါဒရှိတယ်။ အဲဒီတော့ တစ်ချို့က classic ကားတွေက (၅)နှစ်ကျော်သွားတော့ ဆက်လက်ဆောင်ရွက်ခြင်းမရှိတော့ဘူး။ အဲဒီကားတွေအကုန်လုံးကို ထိုက်သင့်တဲ့အခနဲ့ ပြန်ပြီးတော့မှတ်ပုံတင်ခွင့်ပေးတာပါ။ ၂၀၂၂ လောက်မှာ ဒီလိုပဲတစ်ခါကြေညာခဲ့သေးတယ်။ အဲဒီတုန်းက စိတ်ဝင်စားမှုက နည်းတော့ လာတဲ့အစီးကလည်းနည်းပါးခဲ့တယ်။ အခုကတော့ ထပ်ပြီးကြေညာတာပေါ့။ အဓိကကတော့ အဲဒီလိုကားမျိုးတွေကို သမိုင်းဝင်ကားပုံစံမျိုးနဲ့ မှတ်တမ်းပြန်တင်ပေးတာ။ 1980 နဲ့ မတိုင်ခင်က ကားဖြစ်နေပေမဲ့ မောင်းနှင်ခြင်းလည်းမရှိဘူး၊ သုံးလို့မရတဲ့ကားမျိုးဆိုရင်လည်း မရပါဘူး” ဟု မြန်မာ့မော်တော်ယာဥ်ထုတ်လုပ်ရေးနှင့် ဖြန်ဖြူးရေး ရောင်း ချရေးလုပ်ငန်းရှင်များအသင်းမှ အထွေထွေ အတွင်းရေးမှူးချုပ် ဦးကျော်စွာထွန်းမြင့်က NSS ကို သုံးသပ်ပြောကြားထားသည်။

ပြန်လည်မှတ်ပုံတင်ဆောင်ရွက်ခြင်းအား သက်ဆိုင်ရာ တိုင်းဒေသကြီး/ပြည်နယ်/ခရိုင် ကုန်းလမ်းပို့ဆောင်ရေးညွှန်ကြားမှုဦးစီးဌာနရုံးများတွင် ဖေဖော်ဝါရီလ (၁)ရက်မှစ၍ ဇူလိုင်လ(၃၁) ရက်အထိ (၆)လအတွင်း ဆက်သွယ်ဆောင်ရွက်ရန် ထုတ်ပြန်ချက်တွင် ဖော်ပြထားသည်။

ထို့ပြင် အသေးစိတ်အချက်အလက်များကို သိရှိလိုပါက www.motc.gov.mm၊ www.myanmarrtad.com တို့တွင် လေ့လာနိုင်ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာနက အသိပေးထုတ်ပြန်ထားသည်။