စော (NSS) - ဇန်နဝါရီ ၁၀

၂၀၂၃ ခုနှစ်တွင် ရန်ကုန်-မန္တလေး အမြန်လမ်း၌ သတ် မှတ်အရှိန်ထက် ကျော်လွန်မောင်းနှင်သော ယာဉ်များကို  ဖမ်းဆီးအရေးယူခဲ့ရာ အမှုပေါင်း (၁၃၀၀၀)ကျော်ရှိခဲ့ကြောင်း နေပြည်တော် အမြန်လမ်းမကြီး ရဲတပ်ဖွဲ့မှူးရုံးထံမှသိရသည်။

အမြန်လမ်း၌ သတ်မှတ်ထားသည့်အရှိန်နှုန်းထက် ကျော်လွန်မောင်းနှင်သောယာဉ်များကို ဖမ်းဆီးကာ သက်ဆိုင်ရာတရားရုံးများသို့ တရားစွဲတင်ပို့ခဲ့သည့် အမှုပေါင်း(၁၃၀၁၉)မှုရှိကြောင်း သိရသည်။

“ဒဏ်ငွေချမှတ်တယ်ဆိုတဲ့နေရာမှာလည်း တရားရုံးတစ်ရုံးနဲ့တစ်ရုံးတော့ မတူဘူးပေါ့။ တစ်ချို့ကျအနည်း ဆုံးပြစ်ဒဏ်ချတယ်။ တစ်ချို့ကျတော့လည်း ထိထိရောက်ရောက်ဖြစ်အောင်ဆိုပြီး ဒဏ်ငွေရဲ့အမြင့်ဆုံးပြစ်ဒဏ်ချတာရှိတယ်။ လှည်းကူးမြို့နယ် တရားရုံးရယ်၊ နေပြည်တော် မော်တော်ယာဉ် တရားရုံးရယ်၊ တံတားဦးမြို့နယ် မော်တော်ယာဉ်တရားရုံးတို့မှာဆိုရင် အမြင့်ဆုံးဒဏ်ငွေဖြစ်တဲ့ ဒဏ်‌ငွေတစ်သိန်းထိ ချမှတ်ပါတယ်။ ဖြူးနဲ့သီကုန်းမှာဆိုရင် ဒဏ်ငွေငါးသောင်းနဲ့ တစ်သိန်းကြားပေါ့။ တရားသူကြီးရဲ့ဆုံးဖြတ်ချက်နဲ့ ဒဏ်ငွေချပါတယ်” ဟု နေပြည်တော်ရှိ အမြန်လမ်းမကြီးရဲတပ်ဖွဲ့မှူးရုံးမှ တာဝန်ရှိသူတစ်ဦးက NSS ကိုပြောသည်။

အမြန်လမ်း၌ဖြစ်ပွားနေသည့် အမှုများကို လှည်းကူးမြို့ နယ် မော်တော်ယာဉ်တရားရုံး၊ ဖြူးမြို့နယ် မော်တော် ယာဉ်တရားရုံး၊ ဇမ္ဗူသီရိမြို့နယ်ရှိ မော်တော်ယာဉ်တရားရုံး၊ မိတ္ထီလာမြို့နယ် မော်တော်ယာဉ်တရားရုံး နှင့် တံတားဦးမြို့နယ် မော်တော်ယာဉ်တရားရုံးများတွင် အရေးယူလျက်ရှိကြောင်း သိရသည်။

“ကျွန်တော်တို့က အရှိန်နှုန်းတိုင်းတာတဲ့ စက်တွေကို လမ်းမကြီးတစ်လျှောက်မှာ ဖြန့်ခွဲထားပြီးတော့ နေရာပေါင်းစုံက မော်တော်ယာဉ်တွေ သတ်မှတ်အရှိန်နှုန်းထက် ကျော်လွန်မောင်းနှင်တာ မရှိစေဖို့  စက်နဲ့တိုင်း တာပါတယ်။ တိုင်းတာတဲ့အခါမှာ မော်တော်ယာဉ်တွေ ကျော်လွန်တဲ့အရှိန်ကော၊ ယာဉ်ရဲ့ ပုံရိပ်ကိုကော တစ်ခါတည်းဖမ်းပြီးတော့ လမ်းမကြီးတစ်လျှောက်မှာရှိတဲ့ လမ်းအသုံးပြုခကောက်ခံတဲ့တိုးဂိတ် နဲ့ Mini တိုးဂိတ်တွေမှာ တာဝန်ချထားတဲ့ တပ်ဖွဲ့ဝင်တွေကို ပို့ပါတယ်။ ပို့လိုက်တဲ့ ပုံတွေနဲ့ တိုက်ဆိုင်ပြီးတော့မှ အဲဒီကားတွေကို ၂၀၁၀ ပြည်နှစ် မော်တော်ယာဉ် စီမံခန့်ခွဲမှု ဥပဒေနဲ့ ကျွန်တော်တို့က အမှုဖွင့်ပြီးတော့မှ သက်ဆိုင် ရာ မြို့နယ်တရားရုံးတွေမှာ ဒဏ်ငွေဆောင်စေပါတယ်” ဟု ၎င်းကပြောသည်။

လက်ရှိတွင် ရန်ကုန်-မန္တလေး အမြန်လမ်း၌ ယာဉ်အမျိုး အစားပေါ်မူတည်၍ မောင်းနှင်ရမည့် ကီလိုမီတာများကို သတ်မှတ်ထားကြောင်း သိရသည်။

ထို့ကြောင့် အိမ်စီးယာဉ်များအတွက် တစ်နာရီလျှင် ကီလိုမီတာ (၁၀၀)၊ ခရီးသည် express ယာဉ်များအတွက် ကီလိုမီတာ (၉၀) နှင့် Light Truck၊ Hijet၊ Telematics စနစ်တပ်ထားသည့် ကုန်တင်ယာဉ်များအတွက်  ကီလိုမီတာ (၆၀)အဖြစ် သတ်မှတ်ထားကြောင်း သိရသည်။

အလားတူ အမြန်လမ်း၌ ပြီးခဲ့သော ၂၀၂၃ ခုနှစ်အတွင်း  အသက်ကယ် ခါးပတ်မပတ်သည့် အမှုပေါင်း (၁၉၀၆)မှု ရှိပြီး တစ်မှုလျှင် ဒဏ်ငွေ ကျပ်(၃)သောင်းစီ ဒဏ်ရိုက်ကြောင်း သိရသည်။