စော (NSS) - ဇန်နဝါရီ ၈

ရန်ကုန်မြို့၌ YBS ယာဉ်စီးခကို QR Codeဖြင့် ပေးချေနိုင်မည့် Application ကို စတင်မိတ်ဆက်ခဲ့သည့် အခမ်းအနားကို ယနေ့(ဇန်နဝါရီလ ၈ ရက်)တွင် တာမွေမြို့နယ်၊ မာန်အောင်ရပ်ကွက်ရှိ YRTC ရုံးချုပ်၌ ကျင်းပခဲ့သည်။

အဆိုပါ QR Code စနစ်ဖြင့် ယနေ့(ဇန်နဝါရီလ ၈ ရက်) တွင် YBS (13)ယာဉ်လိုင်း၌  စတင်အသုံးပြုနိုင်ပြီဖြစ်ပြီး YBS (55), YBS (57), YBS(58), YBS (24), YBS (28) နှင့် YBS (113) တို့တွင်လည်း နောက်ရက်များ၌ စတင် အသုံးပြုနိုင်ပြီဖြစ်ကြောင်း  သိရသည်။

၎င်း QR Code ကို အသုံးပြုမည့် ခရီးသည်များသည် YBS ကဒ်အား သီးသန့်ဝယ်ယူစရာမလိုဘဲ APP တစ်ခုတည်းဖြင့်သာ ယာဉ်စီးခများကို ပေးချေနိုင်ပြီဖြစ်ကြောင်း သိရသည်။

“ကျွန်တော်တို့ ရှိသမျှလိုင်းတွေ အကုန်လုံးကို အသုံးပြုလို့ရအောင် လုပ်ပါမယ်။ ကျွန်တော်တို့မှာ စနစ်က နှစ်မျိုးရှိ တာကို Flat pay နဲ့ Distance pay ရယ်ဆိုပြီး ရှိတယ်။ Distance pay ရဲ့ဟာကို နောက်မှ အကောင်အထည်ဖော် ဖြစ်မှာပါ။ ကဒ်နဲ့ အတူတူပါပဲ။ အနည်းဆုံး ငွေတစ်ထောင်ကနေ စထည့်ရမယ်။ ကန့်သတ်ချက်တစ်ခုရှိတာက BUS ကား Company တွေရဲ့ ဆုံးရှုံးမှုမဖြစ်အောင်လို့ အနည်းဆုံး အကောင့်ထဲမှာ ငွေကျပ် (၅ဝဝ)လောက် ကျန်နေရ မယ်” ဟု ASTI မှ Chief Operating Officer ဦးကျော်သိန်းက NP News ကို ပြောသည်။

အဆိုပါ Application ၏ အမည်မှာ MPYBS+ ဖြစ်ပြီး   Andorid ဖုန်း Version 6 အနိမ့်ဆုံးမှ စတင်ကာ အသုံးပြုနိုင်ပြီဖြစ်ကြောင်း သိရသည်။

၎င်း QR Code အား ငွေဖြည့်သွင်းခြင်းလုပ်ငန်းစဉ်ကို YPS KIOSK အရောင်းဆိုင်များ၊ G&G အရောင်းဆိုင်များ၊ Mingalar Cinema အဆင်မြင့်ရုပ်ရှင်ရုံများ၊ Capital Suparmart များ နှင့် Wiilington Pharmacy တို့တွင် ဆောင်ရွက်နိုင်ကြောင်း သိရသည်။

အဆိုပါ Application အသုံးပြုပုံများနှင့်ပတ်သက်၍ အသိပညာပေးလုပ်ငန်းစဉ်များကို ဆက်လက်လုပ်ဆောင်သွားမည်ဖြစ်ကြောင်း ASTI မှ ဆိုသည်။

လက်ရှိတွင် MPYBS+ Applicationအား download ပြုလုပ်ထားသူအနေဖြင့် (၅ဝဝ)ကျော်သာ ရှိသေးကြောင်း သိရသည်။