မြူနစ် (NSS) - ဇန်နဝါရီ ၆

ပြီးခဲ့သော ၂၀၂၃ ခုနှစ်၌ မီးလောင်မှုကြောင့် ကျပ် (၃၅)ဘီလျံကျော် စံချိန်တင်ဆုံးရှုံးခဲ့ပြီး သောင်းကျန်းသူများ၏ ရှို့မီးကြောင့် အမျာဆုံး ဆုံးရှုံးမှုဖြစ်ပေါ်ခဲ့ကြောင်း သိရသည်။

၂၀၂၃ ခုနှစ် ဇန်နဝါရီလမှ ဒီဇင်ဘာလအထိ မြန်မာနိုင်ငံတစ်လုံး၌ မီးလောင်မှုဖြစ်ပွားခဲ့သည့်အကြိမ်ရေသည် (၁၃၆၂) ကြိမ်ရှိခဲ့ကြောင်း မြန်မာနိုင်ငံမီးသတ်ဦးစီးဌာန၏ သတင်းအချက်အလက်များအရ သိရသည်။

အဆိုပါမီးလောင်မှုဖြစ်စဉ်များအနက် သောင်းကျန်းသူများ၏ ရှို့မီးကြောင့် ဖြစ်ပွားခဲ့သော မီးလောင်မှုအကြိမ်အရေသည် (၁၀၅)ကြိမ်ရှိခဲ့ကြောင်း သိရသည်။

ထို့ပြင် မီးလောင်မှုဖြစ်စဉ်များကြောင့် အိမ်အဆောက်အဦး (၄၀၀၀)နီးပါး၊ စက်ရုံ/အလုပ်ရုံ (၂၀)နီးပါး၊ ဂိုဒေါင်ပေါင်း (၁၅၀) နီးပါးအပါအဝင် အခြားသောပျက်စီးဆုံးရှုံးများ ဖြစ်ပေါ်ခဲ့ကြောင်း သိရသည်။

၂၀၂၃ ခုနှစ်အတွင်း ဖြစ်ပွားခဲ့သော မီးလောင်မှုဖြစ်စဉ်များကြောင့် ခန့်မှန်းပျက်စီးဆုံးရှုံးမှုတန်ဖိုးသည် ငွေကျပ် (၃၅)ဘီလျံကျော်ရှိခဲ့ကြောင်းလည်း မီးသတ်ဦးစီးဌာန၏ အချက်အလက်များတွင် ဖော်ပြထားသည်။

“အရင် ၂၀၂၂ နှစ်ထက် ၂၀၂၃ က မီးလောင်မှုဖြစ်စဉ် နည်းပါတယ်။ ဒါပေမဲ့ ဆုံးရှုံးမှုတန်ဖိုးက အရမ်းများတယ်။ အရင် နှစ်ထက် (၂၈) ဘီလျံလောက် ပိုများသွားတယ်။ ကျင်စန်းကျော့ဂိတ်မှာ မီးလောင်တုန်းက (၁၂)ဘီလျံကျော် ဆုံးရှုံးသွားတယ်။ နောက်ပြီးတော့ ရခိုင်မှာရှိတဲ့ ပုဏ္ဏားကျွန်းဈေးမီးလောင်တယ်။ ဆိုင်ခန်းပေါင်း (၁၂၀၀)ကျော် လောင်သွားတယ်။ ဆုံးရှုံးမှုတန်ဖိုး များပါတယ်။ ပြီးတော့ လျှပ်စစ်ရုံးတွေ မီးရှို့ခံရတာရှိတယ်။ စစ်ကိုင်းမှာဆိုရင် ရွာလုံးကျွတ် အိမ်တွေ မီးထဲ ပါသွားတယ်။ ဒီနှစ်က သောင်းကျန်းသူတွေရဲ့ ရှို့မီးကြောင့် ဆုံးရှုံးတာ များပါတယ်” ဟု မီးသတ်ဦးစီးဌာနနှင့်နီးစပ်သော အရာရှိတစ်ဦးက NSS ကို ပြောသည်။

ပြီးခဲ့သောနှစ်၌ ရှမ်းပြည်နယ်၊ မူဆယ်မြို့ရှိ ကျင်စန်းကျော့နယ်စပ်ဂိတ်တွင် တအာင်းလက်နက်ကိုင်အဖွဲ့ TNLA ၏ Drop ဗုံး ပစ်ခတ်မှုကြောင့် ဂိတ်အတွင်းရပ်ထားသည့် ကုန်တင်ကားအစီးရေ (၁၀၀)ကျော်နှင့် လူသုံးကုန်ပစ္စည်းများစွာ ပျက်စီးဆုံးရှုံးခဲ့ရသည်။

ထို့ပြင် လက်နက်ကိုင်အဖွဲ့များ၏ လုပ်ရပ်များကြောင့် ပုဏ္ဏားကျွန်းဈေး၊ လွိုင်ကော်ဈေးအပါအဝင် လျှပ်စစ်ရုံးများသည်လည်း မီးလောင်ပျက်စီးမှုများ ဖြစ်ပေါ်ခဲ့သည်။

ပြီးခဲ့သော ၂၀၂၂ ခုနှစ်အတွင်း၌ မီးလောင်မှုအကြိမ်ရေ (၁၅၀၇)ကြိမ်ဖြစ်ပွားခဲ့ရာ ပျက်စီးဆုံးရှုံးတန်ဖိုးသည် ငွေကျပ် (၆) ဘီလျံကျော်သာ ရှိခဲ့သည်။