စော (NSS) - ဒီဇင်ဘာ ၃၀

မြန်မာနိုင်ငံ၏ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ပြည်တွင်းပြည်ပခရီးသွားစစ်တမ်းများကို ကောက်ယူမည်ဖြစ်ကြောင်း ဟိုတယ်နှင့်ခရီးသွားလာရေးဝန်ကြီး ဒေါက်တာသက်သက်ခိုင်က ပြောသည်။

ပြည်ထောင်စုဝန်ကြီးက ယမန်နေ့(ဒီဇင်ဘာလ ၂၉ ရက်)တွင် နေပြည်တော်ရှိ ဟိုတယ်နှင့် ခရီးသွားလာရေးဝန်ကြီးဌာနတွင် ကျင်းပသော ခရီးသွားစစ်တမ်းများ စတင်ကောက်ယူခြင်း အခမ်းအနား၌ အထက်ပါကဲ့သို့ပြောကြားခဲ့ခြင်းဖြစ်သည်။

မြန်မာနိုင်ငံသို့ လာရောက်လည်ပတ်သည့် နိုင်ငံခြားသားခရီးသွားစစ်တမ်းကို ရန်ကုန်အပါအဝင် မန္တလေး၊ တာချီလိတ်၊ မြဝတီ၊ ကော့သောင်း နှင့် မူဆယ်မြို့များရှိ အပြည်ပြည်ဆိုင်ရာ ဝင်ပေါက်များနှင့် နယ်စပ်ဝင်ပေါက်များတွင် ကောက်ယူသွားမည်ဖြစ်ကြောင်း သိရသည်။

ပြည်တွင်းခရီးသွားစစ်တမ်းကို နေပြည်တော်၊ ရန်ကုန်၊ မန္တလေး အပါအဝင် မြို့ပေါင်း (၁၉)မြို့ရှိ ခရီးသွားဆွဲဆောင်ရာနေရာများ၊ ဝင်/ထွက်ပေါက်များ၊ မီးရထားဘူတာရုံများတွင် ‌ကောက်ယူသွားမည်ဖြစ်ကြောင်း သိရသည်။ ပြည်တွင်းခရီးသွားစစ်တမ်းကိုလည်း ယနေ့(ဒီဇင်ဘာလ ၃၀ ရက်)မှ စတင်၍ ကောက်ယူသွားမည်ဖြစ်ကြောင်း သိရသည်။

ထို့ကြောင့် ရရှိလာသည့် ကိန်းဂဏန်းအချက်အလက်များ နှင့် သုတေသနတွေ့ရှိချက်များကိုအခြေခံ၍ ဟိုတယ်နှင့်ခရီးသွားလုပ်ငန်းများ ဖွံ့ဖြိုးတိုးတက်ရေးကို ထိရောက်စွာဆောင်ရွက်နိုင်မည်ဖြစ်ကြောင်း ဟိုတယ် နှင့် ခရီးသွားလာရေးဝန်ကြီး ဒေါက်တာသက်သက်ခိုင်ကပြော သည်။

မြန်မာနိုင်ငံ၌ ကိုဗစ်(၁၉)ရောဂါ စတင်ဖြစ်ပွားခဲ့သည့်အချိန်မှစ၍ ပြည်ပခရီးသွားဝင်ရောက်မှုနှင့် ပြည်တွင်းခရီးသွားလည်ပတ်မှုများ သိသာစွာကျဆင်းခဲ့ပြီး လက်ရှိဖြစ်ပေါ်နေသည့် နိုင်ငံရေးအခြေအနေကြောင့်လည်း ခရီးသွားဝင်ရောက်လည်ပတ်မှုသည် လျော့နည်းနေသေးကြောင်း သိရသည်။