ဂျန်ဇက် (NSS) - ဒီဇင်ဘာ ၂၃

ကုလသမဂ္ဂ လုံခြုံရေးကောင်စီက ဂါဇာဒေသစစ်ပွဲ ယာယီအပစ်ခတ်ရပ်စဲထားဖို့ တိုက်တွန်းတောင်းဆိုခဲ့ပေမယ့် အစ္စရေးကတော့ ဟားမက်စ်ခေါင်းဆောင်တွေကိုအပြီးသတ် သုတ်သင်နိုင်ချိန်အထိ စစ်ပွဲကို ဆက်လက်တိုက်ခိုက်သွားမယ်လို့ ဆိုပါတယ်။

ဂါဇာစစ်ပွဲအပစ်ခတ်ရပ်စဲဖို့ တိုက်တွန်းတောင်းဆိုမယ့်ဆုံးဖြတ် ချက်ခွင့်ပြုနိုင်ဖို့ ကုလသမဂ္ဂ လုံခြုံရေးကောင်စီအဖွဲ့ဝင်နိုင်ငံတွေကြားတွေ့ဆုံဆွေးနွေးခဲ့ပေမယ့် အမေရိကန်အစိုးရက ဗီတိုအာဏသုံး ပိတ်ပင်ထားဆီးခဲ့တဲ့အတွက် ဆုံးဖြတ်ချက်ချမှတ်ဖို့ နှောင့်နေးခဲ့ရပါတယ်။ ဒါပေမယ့်အဆိုပါ ဆုံးဖြတ်ချက်မူကြမ်းထဲမှာ စကားလုံးအသုံးနှုန်းပြင်ဆင်ခဲ့ပြီးနောက် မဲခွဲဆုံးဖြတ်ခဲ့ရာ အမေရိကန်နိုင်ငံက ကန့်ကွက်မှုမရှိဘဲကြားနေအဖြစ်သာ ရပ်တည်ခဲ့ပါတယ်။  

အစ္စရေး နိုင်ငံခြားရေးဝန်ကြီး အလီကိုဟန်က "အစ္စရေးနိုင်ငံက တော့ စစ်ပွဲကို ဆက်တိုက်သွားမှာပါ။ ဒီစစ်ပွဲကတရားဝင်တယ်" လို့ပြောပါတယ်။ 

အစ္စရေးစစ်တပ်အနေနဲ့ ဂါဇာမြို့အတွင်း ထိုးစစ်ဆင်တိုက်ခိုက်မှုတွေ ဆက်လက်လုပ်ကိုင်သွားမှာဖြစ်ကြောင်းဆိုပါတယ်။အစ္စရေးနဲ့ဟားမက်စ် လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်း ပါလက်စတိုင်းကျန်းမာရေးဝန်ကြီးက အစ္စရေးရဲ့တိုက်ခိုက်မှုကြောင့် လူပေါင်း ၂၀၀၀၀ ကျော် သေဆုံးထားပြီး လူပေါင်း ၅၀၀၀၀ ကျော် ဒဏ်ရာရထားကြောင်းသိရပါတယ်။ 

အစ္စရေးစစ်ဘက်ကပြောရေးဆိုခွင့်ရှိသူတစ်ဦးက အစ္စရေးစစ်တပ်ဟာ ဟားမက်စ်အဖွဲ့ ရဲ့ဝင်္ကပါလို ရှုပ်ထွေးတဲ့ မြေအောက်ဥမင်လိုဏ်ခေါင်းတွေကို ဖျက်ဆီးနေကြောင်း၊ ဟားမက်စ်ခေါင်းဆောင်တွေ အခြေစိုက်နေတဲ့ ဥမင်လိုဏ်ခေါင်းရုံးချုပ်ကို တိုက်ခိုက်သွားမှာဖြစ်ကြောင်းပြောပါတယ်။ 

အစ္စရေးဟာ ဟားမက်စ်အဖွဲ့ခေါင်းဆောင်တွေကိုအမြစ်ပြတ်ချေမှုန်းနိုင်ဖို့ နဲ့ ပြန်ပေးဆွဲခံထားရသူတွေအမြန်ဆုံး ပြန်လွှတ် ပေးဖို့ရည်ရွယ်ချက်နဲ့ ဂါဇာဒေသကို အောက်တိုဘာလ ၇ ရက်ကတည်းက တိုက်ခိုက်နေခဲ့ကြောင်းသိရပါတယ်။