ယွန်း (NSS) - ဒီဇင်ဘာ ၁၈

ပဲခူးမြစ်ကူးတံတား(သန်လျင်တံတားအမှတ်-၃) တံတားဆက်ခြင်း အထိမ်းအမှတ် ရွှေမူလီတပ်ဆင်ခြင်းအခမ်းအနားကို ယမန်နေ့ (ဒီဇင်ဘာလ ၁၇ ရက်)က ကျင်းပခဲ့ပြီး တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ခဲ့ကြောင်း နစကမှ သိရသည်။

ပဲခူးမြစ်ကူးတံတား တည်ဆောက်ရေးစီမံကိန်းကို ဂျပန်နိုင်ငံ၊ အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(JICA)နှင့် မြန်မာနိုင်ငံရှိ စီမံကိန်းနှင့် ဘဏ္ဍာရေးဝန်ကြီးဌာန၊ ဆောက်လုပ်ရေးဝန်ကြီးဌာနနှင့် သက်ဆိုင်ရာဝန်ကြီးဌာနများမှ စီမံကိန်းအကောင်အထည်ဖော်ရေးသဘောတူညီချက်အရ ၂၀၁၃ ခုနှစ်တွင်စတင်၍ စီမံကိန်းလုပ်ငန်းအဆင့်အလိုက် အဆင့်ဆင့်ဆောင်ရွက်ခဲ့ကြောင်း သိရသည်။

တံတားတည်ဆောက်ရေးလုပ်ငန်းများကို ပြီးခဲ့သည့် ၂၀၁၉ ခုနှစ် မေလမှ လုပ်ငန်းစတင်ဆောင်ရွက်ခဲ့ရာ (၄)နှစ်ကျော်ကာလအတွင်း လုပ်ငန်းပြီးစီးမှု ၉၄ ရာခိုင်နှုန်းရှိနေပြီး ၂၀၂၄ ခုနှစ်တွင် လုပ်ငန်းပြီးစီးရေးလျာထားကြောင်း သိရသည်။

အဆိုပါတံတားသည် စုစုပေါင်းအရှည် (၈၆၃၈) ပေရှိကာ (၄) လမ်းသွားတံတားဖြစ်ပြီး တံတားအမျိုးအစားသည် သံမဏိကြိုးဆိုင်းတံတား (Cable Stayed Bridge)၊ Steel Box နှင့် PC Box အမျိုးအစားဖြစ်၍ တံတားခံနိုင်ဝန်သည် ယာဉ်တစ်စီးချင်း (၇၅) တန်ဖြစ်ကြောင်း သိရသည်။

လုပ်ငန်းဆောင်ရွက်မှုများပြီးစီးပါက သန်လျင်တံတားအမှတ်-၁ တွင် ဖြစ်ပေါ်လျက်ရှိသည့် ယာဥ်ကြောပိတ်ဆို့မှုများအား ဖြေရှင်းပေးနိုင်ကြောင်း နစကဥက္ကဋ္ဌက အသိပေးပြောကြားထား သည်။ 

တံတားပြီးစီးပါက သီလဝါအထူးစီးပွားရေးဇုန် နှင့် သန်လျင်ဒေသဖွံ့ဖြိုးတိုးတက်လာမည်သာမက အရှေ့-အနောက်စီးပွားရေးစင်္ကြံလမ်းမကြီးကို အသုံးပြု၍ ဘားအံ-မြဝတီအထိ ဆက်စပ်သွားလာနိုင်ပြီး မွန်ပြည်နယ်၊ ကရင်ပြည်နယ်ဖွံ့ဖြိုးတိုးတက်မှုကိုလည်း အကျိုးပြုနိုင်ကြောင်း ၎င်းက ဆက်လက်ပြောသည်။

အလားတူ သီလဝါအထူးစီးပွားရေးဇုန်ကို အကြောင်းပြု၍ ပြည် တွင်း၊ ပြည်ပစီးပွားရေးလုပ်ငန်းများ တိုးပွားလာနိုင်ပြီး ရန်ကုန်မြို့အပါအဝင် ရန်ကုန်တောင်ပိုင်းခရိုင်မြို့နယ်များဖြစ်သည့် သန်လျင်၊ ကျောက်တန်း၊ ခရမ်း၊ သုံးခွဒေသရှိ ပြည်သူများ၏ လူမှုစီးပွားဘဝတိုးတက်လာနိုင်ကြောင်း သိရသည်။

တံတားတည်ဆောက်ရေးစီမံကိန်းအတွက် JICA က သက်သာသော အတိုးနှုန်း ODA ချေးငွေ ဂျပန်ယန်း(၃၁)ဘီလီယံဖြင့်တည်ဆောက်နေပြီး ပြန်ဆပ်ကာလကို နှစ်(၄ဝ) သတ်မှတ်ထားကြောင်း သိရသည်။