NP News - မတ် ၁၄

ရုပ်ရှင်သရုပ်ဆောင် မင်းရာဇာနှင့် ၎င်း၏ဇနီးအပါအဝင် (၃)ဦးကို အလုပ်ကြမ်းနှင့်ထောင်ဒဏ် (၅)နှစ်စီ တရားရုံးက ပြစ်ဒဏ်ချမှတ်လိုက်ကြောင်း သတင်းရရှိသည်။

၎င်းတို့အား မတ်လ ၁၃ ရက်တွင် ရန်ကုန်တိုင်း၊ မြောက်ဥက္ကလာပမြို့နယ်တရားရုံးက အထက်ပါကဲ့သို့ အမိန့်ချမှတ်ခဲ့ခြင်းဖြစ်ကြောင်း ရှေ့နေအသိုင်းအဝိုင်းက အသိပေးပြောဆိုထားသည်။

ပြီးခဲ့သော ၂ဝ၂ဝ ပြည့်နှစ်အတွင်း သရုပ်ဆောင်မင်းရာဇာအပါအဝင် (၃)ဦးသည် အိမ်ဖော်အမျိုးသမီးငယ် တစ်ဦးအား ကိုယ်ထိလက်ရောက်အနိုင်ကျင့်သည်ဟုဆိုကာ ရာဇသတ်ကြီးဥပဒေ ပုဒ်မ ၃၂၆ အပြင်းအထန်နာကျင်စေမှုဖြင့် တရားစွဲဆိုခံခဲ့ရခြင်းဖြစ်သည်။

အဆိုပါအမှုဖြင့် သရုပ်ဆောင်မင်းရာဇာ၊ ဇနီးဖြစ်သူ မဖူးပွင့်ငုံနှင့် ကိုအောင်လွင်စိုး(ခ)ရခိုင်လေးတို့ကို ယမန်နေ့က အလုပ်ကြမ်းနှင့်ထောင်ဒဏ် (၅)နှစ်စီ ပြစ်ဒဏ်ချမှတ်ခဲ့ခြင်းဖြစ်ကြောင်း အိမ်ဖော် အမျိုးသမီးငယ်ဘက်မှ လိုက်ပါဆောင်ရွက်နေသည့် ရှေ့နေတစ်ဦးက အသိပေးပြောဆိုထားသည်။

ထို့ပြင် သရုပ်ဆောင် မင်းရာဇာအနေဖြင့်လည်း မုဒိမ်းမှု ပုဒ်မ ၃၇၆ ဖြင့်ပါ တရားစွဲဆိုခံထားရခြင်းဖြစ်ပြီး ၎င်းအမှုနှင့်ပတ်သက်၍ ခရိုင်တရားရုံးတွင် ဆက်လက်တရားရင်ဆိုင်နေရဆဲဖြစ်ကြောင်း သိရသည်။

ရုပ်ရှင်သရုပ်ဆောင် မင်းရာဇာ အပါအဝင် (၃)ဦးသည် ပြီးခဲ့သော ၂ဝ၂ဝ ပြည့်နှစ်အတွင်း ကရင်ပြည်နယ် ဘက်သို့ သွားရောက်စဉ်အချိန်တွင် ကရင်လက်နက်ကိုင်အဖွဲ့အစည်းတစ်ခုက ဖမ်းဆီးခဲ့ကာ သက်ဆိုင်ရာ အစိုးရထံသို့ ပြန်လည်လွှဲပြောင်းပေးအပ်ခဲ့ကြောင်း သိရသည်။

ထို့နောက် ၂ဝ၂၁ ခုနှစ်အတွင်း အမှုများပိတ်သိမ်းခဲ့သည့်ဖြစ်စဉ်များ၌ သရုပ်ဆောင်မင်းရာဇာတို့၏ အမှုများမှာပါဝင်ခဲ့ပြီး အိမ်ဖော်အမျိုးသမီးငယ်ဘက်မှ ရှေ့နေများက ၎င်းအမှုများ မပိတ်သိမ်းသင့်ကြောင်း ပြန်လည်လျှောက်ထားခဲ့ရာတွင် တရားရုံးမှ ပြန်လည်လက်ခံပြီး ယခုကဲ့သို့ အမိန့်ချမှတ်ခဲ့ခြင်းဖြစ် ကြောင်း သိရသည်။