ကျော် (NSS) - ဒီဇင်ဘာ ၁၅

ရှမ်းပြည်နယ်၊ တာချီလိတ်မြို့တွင် နေအိမ်ခြံဝင်းအတွင်းထိဝင်၍ ဓားပြခြိမ်းခြောက်ကာ ရွှေဆွဲကြိုးလုယက်သူ ၃ ဦးအနက် ၂ ဦးကို အခင်းဖြစ်ပြီးနောက်တစ်ရက်တွင်ဖမ်းမိခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

ဖြစ်စဥ်မှာ ပြီးခဲ့သည့် ဒီဇင်ဘာလ ၁၁ ရက်၊ နေ့လည် ၃ နာရီခွဲခန့်က တာချီလိတ်မြို့၊ ဆန်ဆိုင်း(ခ)ရပ်ကွက်ရှိ နေအိမ်ခြံဝင်းတစ်ခုအတွင်း၌ ဖြစ်ပွားခဲ့ခြင်းဖြစ်ကြောင်း သိရသည်။

ယင်းနေ့က ဦးစိုင်းလုံလျဲန်းသည် တာချီလိတ်မြို့၊ ဆန်ဆိုင်း(ခ) ရပ်ကွက်ရှိ ၎င်း၏အဘွားဖြစ်သူနေ အိမ်သို့သွားရောက်စဥ် အဘွားဖြစ်သူမရှိသဖြင့် ခြံဝင်းအတွင်း၌စောင့်ဆိုင်းနေစဥ် အမျိုးသားတစ်ဦးဝင်ရောက်လာပြီးနောက် ဓားမြှောင်ပြခြိမ်း ခြောက်မှုပြုလုပ်ခဲ့ကြောင်း သိရသည်။

"ဦးစိုင်းလုံလျဲန်းလည်ပင်းမှာဝတ်ထားတဲ့ ရွှေဆွဲကြိုးကို ဓား မြှောင်ပြခြိမ်းခြောက်ပြီးလုယက်သွားတာ။ လုပြီးတာနဲ့ခြံအပြင်မှာစောင့်နေတဲ့ သူ့လူနှစ်ယောက်နဲ့အတူ ထွက်ပြေးသွားတာ။ ဆွဲ ကြိုးတန်ဖိုးက သိန်း(၆၀)လောက်ရှိတယ်။ ဖမ်းမိပြီးတဲ့အချိန်စစ်ဆေးကြည့်ရသလောက် သူတို့တွေက ထောင်ထွက်တွေပါ" ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

ဖြစ်စဥ်မှပြစ်မှုကျူးလွန်သူများအား ဖမ်းဆီးရမိရေးအတွက် တာချီလိတ်မြို့မရဲစခန်းမှအမှုဖွင့်လှစ်ကာ လုံခြုံရေးအဖွဲ့ဝင်များနှင့်ပူးပေါင်း၍ စုံစမ်းစစ်ဆေးမှုများပြုလုပ်ခဲ့ကြကြောင်း သိရသည်။

ထို့ကြောင့် ပြစ်မှုကျူးလွန်သူ (၃)ဦးအနက် ကျော်မြင့်နှင့်ခိုင်မင်းသူ(ခ)ဇော်မင်းသူတို့အား အခင်းဖြစ်စဥ်ကအသုံးပြုခဲ့သည့် ဓားမြှောင်၊ လုယူသွားခဲ့သော ရွှေဆွဲကြိုးတို့နှင့်အတူ ဒီဇင်ဘာလ ၁၂ ရက်တွင် ဖမ်းဆီးရမိခဲ့ကြောင်း သိရသည်။

ထိုသို့ ဖမ်းဆီးရမိခဲ့ပြီးနောက် စစ်ဆေးမှုများဆက်လက်ပြုလုပ်ကာ ဖမ်းဆီးရန်ကျန်ရှိနေသူတစ်ဦးကို ထပ်မံဖမ်းဆီးရမိရေးအတွက် စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။