NSS - ဒီဇင်ဘာ ၁၃

မန္တလေးတိုင်း၊ မတ္တရာမြို့နယ်ရှိ ကျေးရွာလမ်းပေါ်တွင် အမျိုး သားတစ်ဦးကို PDF အဖွဲ့က သေနတ်ဖြင့် ပစ်ခတ်သတ်ဖြတ်သွားခဲ့ကြောင်း ရဲတပ်ဖွဲ့က သတင်းထုတ်ပြန်ထားသည်၊

ဖြစ်စဉ်မှာ ပြီးခဲ့သော ဒီဇင်ဘာလ ၁၁ ရက်၊ နံနက် ၁၁ နာရီ ၁၀ မိနစ်အချိန်တွင် မတ္တရာမြို့နယ်၊ စကျင်ကျေးရွာရှိ ရွာလယ်လမ်းပေါ်တွင် အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

အဆိုပါကျေးရွာတွင်နေထိုင်သည့် ဦးအေးလွင်ဦး(ခ)ဂတုံး(၄၄) နှစ်သည့် ကျေးရွာရှိ “အေးချမ်းရိပ်” လက်ဖက်ရည်ဆိုင်မှ နေအိမ်သို့ပြန်လာစဉ် အထက်ပါနေရာအရောက်၌ PDF အဖွဲ့က သေ နတ်ဖြင့် ပစ်ခတ်ကာ မြေပုန်ကန်ကျေးရွာဘက်သို့ မောင်းနှင်ထွက်ပြေးသွားခဲ့ကြောင်း သိရသည်။

ထိုသို့ ပစ်ခတ်ခံရမှုကြောင့် ဦးအေးလွင်ဦး(ခ)ဂတုံး၏ ဦးခေါင်းနှင့် ရင်ဘတ်တို့တွင် ကျည်ဖောက်ဝင်ဒဏ်ရာ (၃)ချက်ရရှိကာ အခင်းဖြစ်နေရာ၌ သေဆုံးသွားခဲ့ကြောင်း သိရသည်။

အလားတူ နေ့လည် ၁၂ နာရီ ၄၀ မိနစ်အချိန်တွင် ကချင်ပြည်နယ်၊ ဝိုင်းမော်မြို့နယ်၊ လဘန်ကျေးရွာတွင် အမျိုးသားတစ်ဦးအား PDF အဖွဲ့က သေနတ်ဖြင့် ပစ်ခတ်သတ်ဖြတ်သွားခဲ့ကြောင်း ရဲတပ်ဖွဲ့က ဆက်လက်သတင်းထုတ်ပြန်ထားသည်။

အဆိုပါကျေးရွာတွင် နေထိုင်သည့် ဦးဒေါင်လွမ်း(၇၁)နှစ်သည် ၎င်း၏နေအိမ်၌ ရှိနေစဉ် PDF အဖွဲ့ဝင် (၂)ဦးက ဆိုင်ကယ်တစ်စီးဖြင့်ရောက်ရှိလာပြီး သေနတ်ဖြင့်ပစ်ခတ်ကာ ထွက်ပြေးသွားခဲ့ကြောင်း သိရသည်။

ထိုသို့ ပစ်ခတ်ခံရမှုကြောင့် ဦးဒေါင်လွမ်း၏ မေးစေ့ နှင့် ဝဲနား ထင်တွင် ကျည်ဖော်ဝင်ဒဏ်ရာ (၂)ချက်ရရှိကာ အခင်းဖြစ်နေရာ၌ သေဆုံးသွားခဲ့ကြောင်း သိရသည်။

ထို့ကြောင့် ပြစ်မှုကျူးလွန်သူများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေးယူနိုင်ရေးလုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း သိရသည်။