Pika (NSS) - ဒီဇင်ဘာ ၁၂

တရုတ်နိုင်ငံတွင်နေထိုင်သောာ အသက်(၆)နှစ်အရွယ်ကလေးငယ်သည် စင်ကာပူနိုင်ငံတွင် ကျင်းပသော World Cube Association Rubik's Cube International ဖွင့်ပွဲတွင် 3x3x3 Rubik’s cubeကို (၅ ဒသမ ၉၇) စက္ကန့်ဖြင့် ဖြေရှင်းနိုင်ခဲ့သောအမျိုးသမီးအဖြစ် ကမ္ဘာ့စံချိန်သစ်တင်နိုင်ခဲ့ကြောင်း သိရသည်။

တရုတ်နိုင်ငံ Jiangsu ပြည်နယ်တွင် နေထိုင်သော Cao Qixian သည် ၎င်း၏ ဝမ်းကွဲတစ်ဦး၏ လှုံ့ဆော်မှုဖြင့် အသက်(၃)နှစ်အရွယ်တွင် Rubik’s cube ကို စတင်ကစားခဲ့ခြင်းဖြစ်ကြောင်း သိရသည်။ Cao Qixian ၏ ဝမ်းကွဲ မောင်နှမသည် ၎င်းကို Rubik’s cube အား အမြန်ဆုံးဖြေရှင်းနိုင်ရန်အတွက် သင်ကြားပေးခဲ့ခြင်းဖြစ်ကြောင်း သိရသည်။

သို့သော်လည်း တစ်နှစ်ခန့်အကြာတွင် Cao Qixian သည် Rubik’s cube ဖြေရှင်းနည်းတွင် အလွန်ကောင်းမွန်လာခဲ့ ပြီးနောက် ၎င်း၏မိဘများက ၎င်းကို နောက်ထပ်သင်ကြားပေးမှုများ လုပ်ဆောင်ခဲ့ခြင်းဖြစ်ကြောင်း သိရသည်။ Cao Qixian သည် Rubik’s cube အား အမြန်ဖြေရှင်းရသည်ကို နှစ်သက်သူဖြစ်ပြီး နေ့စဉ်(၂)နာရီမှ (၃)နာရီထိ လေ့ကျင့် ခဲ့ကြောင်း သိရသည်။

၎င်းမိခင်ဖြစ်သူက "သူမဟာ သုံးလကြာအောင် (၁ဝ)စက္ကန့်နဲ့ဖြေရှင်းနိုင်အောင် ကြိုးစားခဲ့ပေမယ့် (၁၂)စက္ကန့်မှာပဲ ရပ်နေခဲ့ပါတယ်။ သူမအချိန်အကြာကြီးလေ့ကျင့်ခဲ့ပေမယ့် တိုးတက်မှုမရှိခဲ့လို့ လက်လျှော့လုနီးပါးဖြစ်ခဲ့ပါတယ်" ဟု ပြောသည်။

သို့သော်လည်း စင်ကာပူနိုင်ငံတွင်ကျင်းပသည့် World Cube Association (WCA) Rubik’s Cube International ဖွင့်ပွဲတွင် 3x3x3 Rubik’s cubeကို (၆)စက္ကန့်အတွင်း  ဖြေရှင်းနိုင်ခဲ့သော ပထမဆုံး အမျိုးသမီးဖြစ်လာခဲ့ကြောင်း သိရသည်။ 

၎င်း၏ မိခင်ဖြစ်သူက "ကမ္ဘာ့စံချိန်ကို သူမ ချိုးဖျက်နိုင်ခဲ့မယ်လို့ ကျွန်မတို့ ဘယ်တုန်းကမှ မထင်ခဲ့ပါဘူး။ ကျွန်မတို့ အိမ်ပြန်ရောက်တာ (၂)ရက်၊ (၃)ရက်လောက်ရှိပါပြီ။ ဒါပေမယ့် ကျွန်မတို့အိမ်မက်မက်နေတယ်လို့ ထင်နေတုန်းပါပဲ" ဟု ပြောခဲ့သည်။