ကျော် (NSS) - ဒီဇင်ဘာ ၈

ထိုင်းနိုင်ငံရောက် မြန်မာအလုပ်သမားများ မည်သူမည်ဝါဖြစ်ကြောင်း သက်သေခံလက်မှတ်(CI) ပြုလုပ်ရာ၌ ပွဲစားများ၏အမြတ်ထုတ်မှုကို ကာကွယ်နိုင်ရန် Mobile Team များဖြင့် ဆောင်ရွက်ပေးသွားမည်ဖြစ်ကြောင်း ထိုင်းနိုင်ငံဆိုင်ရာ မြန်မာအလုပ်သမားသံအရာရှိရုံးမှ သိရသည်။

မြန်မာအလုပ်သမားသံအရာရှိရုံးမှ လက်ရှိအချိန်တွင် ထိုင်းနိုင်ငံ၌ မြန်မာနိုင်ငံသားများအတွက် CI ထုတ်ပေးရေးစခန်း(၅)ခု နှင့် Mobile Team (၃)ခုဖွင့်လှစ်နိုင်ရန်ဆောင်ရွက်လျက်ရှိကြောင်း သိရသည်။

အလုပ်သမားများ အမားစုနေထိုင်လုပ်ကိုင်သည့်နေရာများသို့ Mobile Team များကို လွယ်လင့်တကူ ရွှေ့ပြောင်းဖွင့်လှစ်ပေးခြင်းဖြင့် မြန်မာအလုပ်သမားများအနေဖြင့် CI ပြုလုပ်ရာတွင် လုပ်ငန်းခွင်မပျက်ဆောင်ရွက်နိုင်ခြင်း၊ အလုပ်ရှင်မှလည်း လုပ်ငန်းခွင်အားအရှိန်အဟုန်မပျက်လည်ပတ်နိုင်ခြင်း၊ ပွဲစားများ၏ အမြတ်ထုတ်မှုကိုကာကွယ်နိုင်ခြင်း အကျိုးကျေးဇူးများကိုရရှိနိုင်မည်ဖြစ်ကြောင်း သိရသည်။

ထိုင်းနိုင်ငံတွင် ယာယီနေထိုင်လုပ်ကိုင်ခွင့်(ပန်းရောင်ကတ်)အတွက် အမည်စာရင်းတင်သွင်းခဲ့သည့် မြန်မာအလုပ်သမားများအား ၂၀၂၃ ခုနှစ်၊ အောက် တိုဘာလ ၁ ရက်မှ ၂၀၂၅ ခုနှစ် ဖေဖော်ဝါရီလ ၁၃ ရက်အထိ နေထိုင်လုပ်ကိုင်ခွင့်သက်တမ်းအား ထိုင်းနိုင်ငံအစိုးရက တိုးမြှင့်ပေးခဲ့သည်။

ထို့ကြောင့် မြန်မာအလုပ်သမားများအနေဖြင့် Work Permit လျှောက်ထားခြင်း၊ ကျန်းမာရေးစစ်ဆေးခြင်းနှင့်ကျန်းမာရေးအာမခံဝယ်ယူခြင်းတို့ကို ၂၀၂၄ ခုနှစ်၊ဇန်နဝါရီလ ၁၅ ရက်မတိုင်မီအထိ ကြိုတင်ပြုလုပ်ထားရမည်ဖြစ်ကြောင်း သိရသည်။

Work Permit လျှောက်ထားရာ၌ အလုပ်သမားတစ်ဦးလျှင် ထိုင်းဘတ် ၁၄၅၀၊ ကျန်းမာရေးစစ်ဆေးခြင်းအတွက် ထိုင်းဘတ် ၅၀၀ နှင့် ပြည်သူ့ကျန်းမာရေးဝန်ကြီးဌာနမှ တစ်နှစ်အာမခံအတွက် ထိုင်းဘတ် ၁၆၀၀ (သို့မဟုတ်) ပုဂ္ဂလိကကုမ္ပဏီမှ ၆ လ အာမခံအတွက် ထိုင်းဘတ် ၉၉၀ နှင့်လူမှုဖူလုံရေးအာမခံစနစ်၌ အကျုံးမဝင်သူများသည် တစ်နှစ်အာမခံ ဝယ်ယူရမည်ဖြစ်ကြောင်း သိရသည်။

ထို့ကြောင့် အလုပ်သမားတစ်ဦးလျှင် အနည်းဆုံး ထိုင်းဘတ် ၂၉၄၀ မှ အများဆုံး ထိုင်းဘတ် ၃၅၅၀ ကုန်ကျမည်ဖြစ်ကြောင်း မြန်မာအလုပ်သမားသံအရာရှိရုံးမှ သိရသည်။

ထို့ပြင် Work Permit နှင့် ကျန်းမာရေးစစ်ဆေးမှုပြုလုပ်ပြီးသော အလုပ် သမားများသည် ၂၀၂၄ ခုနှစ်၊ အောက်တိုဘာလ ၃၁ ရက်မတိုင်မီတွင် Biometrics data ကောက်ယူခြင်း၊ လူဝင်မှုကြီးကြပ်ရေးဗျုရိုတွင် ထိုင်းနိုင်ငံအတွင်းနေထိုင်ခွင့် ရရှိရန်ဆောင်ရွက်ပြီးနောက် Department of Provincial Administration (သို့မဟုတ်) Bangkok Metropolitan Administration ဌာနများတွင် မှတ်ပုံတင်ခြင်းတို့ကို ဆက်လက်ဆောင်ရွက်ရမည်ဖြစ်ကြောင်း သိရသည်။

ထို့အတူ မြန်မာအလုပ်သမားများအနေဖြင့် ၂၀၂၄ ခုနှစ်၊ အောက်တိုဘာလ ၃၁ ရက်မတိုင်မီအထိ CI (သို့မဟုတ်) Passport ဆက်လက်လျှောက်ထားရမည်ဖြစ်ကြောင်း သိရသည်။

အဆိုပါ လုပ်ငန်းများဆောင်ရွက်ရန်စီစဥ်နေမှုများကို အလုပ်သမားရေးရာများပူးပေါင်းဆောင်ရွက်ရန် မြန်မာ-ထိုင်းနှစ်နိုင်ငံ အလုပ်သမားဝန်ကြီးများတွေ့ဆုံဆွေးနွေးရေးအတွက် ထိုင်းနိုင်ငံသို့ရောက်ရှိနေသည့် အလုပ်သမားဝန်ကြီးဦးမြင့်နောင်မှ ယမန်နေ့ (ဒီဇင်ဘာလ ၇ ရက်)က ကြည့်ရှုစစ်ဆေးခဲ့ကြောင်း သိရသည်။