ဂျန်ဇက် (NSS) - ဒီဇင်ဘာ ၆ 

ယူကရိန်းအစိုးရအနေနဲ့ ရှေ့တန်းစစ်မျက်နှာပြင်တွေကို ယူကရိန်းစစ်သမီးတွေ စေလွှတ်သွားဖို့ လုပ်ဆောင်သင့်ကြောင်း ယူကရိန်းသမ္မတဇီလန်စကီးရဲ့ပါတီတာဝန်ရှိသူတွေက ထုတ်ဖော်ပြောကြားလိုက်ပါတယ်။ 

ယူကရိန်းအာဏာရပါတီဖြစ်တဲ့  ‘Servant of the People’ ပါတီရဲ့လွှတ်တော်ကိုယ်စားလှယ်တစ်ဦးဖြစ်တဲ့ မာရီယာနာ ဘီဇူလာယာက ယူကရိန်းနိုင်ငံကို ကူညီပေးဖို့ ဆန္ဒရှိနေတဲ့ ယူကရိန်းအမျိုးသမီးတွေ အပါအဝင် ပြည်သူတွေဟာ စစ်မှုထမ်းဖို့ အမည်စာရင်းပေးသင့်ကြောင်း ပြောပါတယ်။

ယူကရိန်းစစ်တပ်ကို ကူညီပေးဖို့ လုပ်အားပေးကူညီနေတဲ့လူတိုင်းကို ကျေးဇူးတင်ကြောင်း၊ ၎င်းက ပြောပါတယ်။ ၎င်းက "နိုင်ငံသားတွေဟာ အခွန်ပေးဖို့ တာဝန်ရှိတယ်။ ပြည်သူတွေဟာ နိုင်ငံအတွက်ဖြစ်ရမယ်။ လက်ရှိအချိန်မှာ နိုင်ငံအတွက် အကောင်းဆုံးလုပ်အားပေးသူတွေဟာ ယူကရိန်းစစ်တပ်မှာ ပါဝင်ဆောင်ရွက်နေတယ်။  ယူကရိန်း စစ်တပ်မှာ ပါဝင်ဖို့ အမျိုးသမီးတွေလည်း လျှောက်ထားသင့်တယ်။ ယူကရိန်းအစိုးရဟာ လက်ရှိအချိန်မှာ စစ်ပွဲနဲ့ပတ်သက်ပြီး အရေးကြီးအစီအစဉ်တွေလုပ်ဖို့ ပြင်ဆင်မယ်လို့ မျှော်လင့်ထားတယ်" လို့ ပြောပါတယ်။

ရုရှားထောက်လှမ်းရေးအဖွဲ့များက ယူကရိန်းဟာ စစ်ပွဲမှာ ပါဝင်ဖို့ အသက်အရွယ်ကြီးတဲ့ အမျိုးသားတွေ၊ အမျိုးသမီးတွေအပြင် လူငယ်တွေကိုလည်း စစ်မှုထမ်းဖို့ ဥပဒေမူကြမ်းတွေကို ပြင်ဆင်ပြောင်းလဲသွားဖို့ စီစဉ်နေကြောင်း ဖော်ပြထားပါတယ်။ 

ယူကရိန်းဟာ ဇွန်လနောက်ပိုင်းကတည်းက ရုရှားနိုင်ငံအပေါ် ကြီးမားတဲ့တန်ပြန်ထိုးစစ်ဆင်ခဲ့ပေမယ့် မျှော်လင့်သလောက် အောင်မြင်မှုမရဘဲ ရှိနေခဲ့ကြောင်း သိရပါတယ်။ ယူကရိန်းဟာ ရုရှားနဲ့ စစ်ပွဲဖြစ်ပွားခဲ့ပြီးနောက်ပိုင်းကတည်းက ပိုင်နက်နယ်မြေ ၄ ခုအထိ စွန့်လွှတ်ဆုံးရှုံးထားရကြောင်း သိရပါတယ်။

ယူကရိန်းရဲ့တန်ပြန်ထိုးစစ်ဆင်မှုတွေ ကောင်းမွန်မှုမရှိတဲ့အတွက် အမေရိကန်ဦးဆောင်တဲ့အနောက်အုပ်စုနိုင်ငံတွေဟာ ယူကရိန်းကို ကူညီထောက်ပံ့ပေးဖို့ လိုလားခြင်းမရှိဘဲဖြစ်နေကြောင်း သတင်းများလည်း ထွက်ပေါ်နေပါတယ်။